hósdagur 5. mars 2020síða 52

28 FÓTBÓLTUR 2020 FÓTBÓLTSBLAÐIÐ HJÁ MIÐLAHÚSINUM LYKLASPÆLARIN Pætur Dam Jacobsen Beint upp undir kappingarbyrjan varð greitt, at Pætur Dam Jacobsen tekur enn eitt tak í apelsinlittu troyggjuni hjá Skála. Pætur hevur verið liðformaður og undangongumaður, og tað verður roknaður sum stórur styrkur, at hann heldur fram á liðnum. Pætur er arbeiðssamur og stýrandi miðvallari, sum ferðast nógv millum báðar brotsteigirnar. GJØGNUMBROTIÐ Djóni Jansson Petersen 20 ára gamli Djóni Petersen hevur verið kring besta liðið á Skála seinastu tvey árini. Í fjør spældi hann nakrar dystir og stóð seg væl. Nú liggur í kortunum, at Djóni skal inn á liðið at spæla, og hann hevur førleikar og hugburð til at spæla í bestu deildini. VENJARIN Bill McLeod Jacobsen Klaksvíkingur Bill McLeod Jacobsen er royndur venjari. Hann byrjaði á ungum árum yrkisleiðina sum venjari, og hann hevur vant feløg sum B68, 07 Vestur og AB, umframt at hann í fleiri ár var venjari hjá U21 landsliðnum. Nú skal Bill aftur í royna seg í bestu deildini, og hann hevur átikið sær uppgávuna á Skála, har stórar broytingar hava verið í hópinum. MÁLIÐ Omanfyri strikuna Skála hevur mist nógvar spælarar síðan í fjør, og tí skulu nýggir spælarar inn á liðið. Kortini hevur Skála dygdirnar til at standa seg í deildini. Málið verður at halda seg omanfyri niðurflytingarstrikuna og síðani vita, hvussu langt avrikini kunnu bera liðið. Dygdir eru í spælarunum og liðnum BILL MCLEOD JACOBSEN BILL BYRJAR Á BERUM Nýggi Skálavenjarin heldur, at hansara royndir koma spælarunum til góða, nú talan er um óroynt lið, sum í fyrstu umførunum skal dystast við tey stóru JÓANNES HANSEN Bill Jacobsen er nýggjur venjari á Skála. Teir hava tuskað undir Mýruhjalla síðani fyrst í november. Teir, sum hava vant síðani tá, eru í góðari kropsligari venjing. Kortini heldur venjarin, at teir framvegis hava langt á mál. -Tað eru bara nakrir dagar síðani, at hópurin varð fullmannaður. At liðformaðurin Pætur Dam Jacobsen fyri trimum vikum síðani gjørdi av, at hann skuldi taka eitt tørn aftrat, hevur stóran týdning fyri liðið og felagið, heldur venjarin. Í fýra teimum fyrstu umførunum er talan um torførar avbjóðingar. Sunnudagin á útivølli ímóti NSÍ og so ímóti TB í Trongisvági. Fyrsti heimadysturin verður ímóti KÍ. So verður landsliðssteðgur, og fyrsta avbjóðingin eftir landsliðssteðgin verður á heimavølli ímóti B36. – Hetta sær ræðandi út, men vit síggja ikki so dapurt upp á tað. Um vit ikki vinna úrtøku, so verður tað, sum tað verður roknað við. Um vit vinna úrtøku, so verður tað betri, enn tað verður roknað við. So vit hava einki at missa. Og hvussu rokna tit sjálvir við, at tað fer at ganga? – Nú leggja vit dent á taktiskar venjingar, og so fáa vit at síggja, hvussu tað verður. Eftir landsliðssteðgin bíða AB, Víkingur, ÍF, EB/Streymur og HB. Har eru fleiri dystir, sum vera heilt áhugaverdir, og eg vóni, at vit tá vera heilt væl fyri. Eru tit ikki í nóg góðari venjing? – Einki lið er í toppvenjing nú. Sum hjá øllum øðrum so væntar okkum dystarvenjing. Kappingin er long, og tað ræður um at leggja soleiðis til rættis, at liðið støðugt verður væl fyri. Í tí taktiska renna vit kapp við tíðina, og nógv av hesum ætla vit næstu vikurnar at fáa tak á. Øðrvísi spælskipan Tvey tey undanfarnu árini var Skála kent fyri at leggja nógv fyri í framrættaða spælinum. Sambært venjaranum verður tað øðrvísi í ár. – Royndirnar eru færri, og liðið er øðrvísi skrúvað saman. Tí fara vit at leggja stóran dent á at fáa verjuspælið at rigga, og so vóna vit, at teir fremstu fara at megna nógv í innanhýsis spæli, sigur Bill Jacobsen. Ætlanin hevur verið, at Aksel B. Danielsen skuldi vera fremsti maður, og at teir tríggir aftanfyri skuldu vera Ronni Møller-Iversen, Heðin Klakstein og Andreas Egeberg Jacobsen, sum nú fer at fáa fleiri møguleikar at spæla seg inn á liðið. Ætlanin verður ikki veruleiki nú beinanvegin. Aksel B. Danielsen er skaddur í liðbandi í knænum og bíðar eftir at verða skurðviðgjørdur. Hann verður neyvan førur fyri at spæla undan summarsteðginum, og tí verður neyðugt at finna aðra loysn. – Vit eiga fleiri ungar og evnaríkar spælarar, sum fara at fáa møguleikan. Avgerandi er tað, at vit allir trúgva, at tað fer at bera til, og tað gera spælararnir. Onkrir fara ivaleyst at megna at lyfta størri ábyrgd, enn teir higartil hava havt høvi at gera, heldur Bill Jacobsen. Hevur ofta verið undirtippaður 45 ára gamli Bill Jacobsen telist millum best útbúnu venjararnar í landinum. Hann hevur nógvar royndir, men tað eru nøkur ár síðani, at hann hevði ábyrgd av liði í fremstu røð í eitt heilt kappingarár. Tað var í 2011, at Bill stóð á odda fyri B68. Hetta var fjórða árið hjá honum á Toftum. Manningarligu fyritreytirnar vóru ikki av teimum bestu, men tað eydnaðist øll árini at vinna fleiri enn 30 stig. Besta árið var í 2009, tá ið Bill og B68 vunnu 43 stig og endaðu á fimta plássi. Umframt at vera felagsvenjari var Bill Jacobsen frá 2007 og fram til 2017 venjari hjá U-21 landsliðnum. –  Spælararnir kenna søguna. U-21 landsliðið er mest sum hvørja ferð undirtippað, men kortini er tað eydnast at vinna ímóti Russlandi og Georgia og at spæla javnt ímóti Danmark, Rumenia, Póllandi og Finnlandi. Tað eydnaðist, tí spælararnir vóru fokuseraðir alla tíðina, teir runnu nógv, vóru raskir í nærdystunum og tordu av bjóða av og spæla og ikki bara sparka, tá ið teir vóru kroystir. Tað eru hesar dygdirnar, sum skulu til, um tað skal eydnast okkum á Skála at vinna. Eg haldi, at dygdirnar eru í spælarunum og liðnum, og so fáa vit at síggja, hvat tað verður til, sigur Bill Jacobsen.