hósdagur 5. mars 2020síða 54

30 FÓTBÓLTUR 2020 FÓTBÓLTSBLAÐIÐ HJÁ MIÐLAHÚSINUM ARGJA BÓLTFELAG Á Argjum hava teir í fleiri ár vónað og arbeitt fram ímóti, at dagsskráin fór at skifta frá, at liðið skal varðveita plássið í bestu deildini og til at kappast um plássini miðskeiðis á talvuni. Tølini lýsa væl, hvussu gongdin hevur verið og er. Eftir uppflytingina í 2013 endaði AB á sjeynda plássi, í 2014 og 2015 á áttanda plássi, og í 2016 bar níggjunda plássið niðurflyting við sær. Í 2018 slapp AB undan niðurflyting, hóast liðið endaði á níggjunda plássi, og í fjør endaði AB á sjeynda plássi. Ofta hevur gongdin hjá AB verið soleiðis, at liðið fyrra partin av kappingini hevur verið aftast, og hóttanini av niðurflyting hevur verið heilt stór. Tá ið kappingin so hevur verið hálvrunnin, er úrtøkan støðugt vaksin, og so er tað eydnast at sleppa undan at flyta niður. Orsøkin til óstøðugu gongdina plagar at vera nógvar skiftingar á liðnum, og at fleiri spælarar eru lagstir aftrat mitt í kappingini. Hetta hava ofta verið fyrrverandi AB spælarar heima í summarfrí frá lestrinum á flatlondum. Í løtuni er støðan soleiðis, at dagsskráin ikki fær verið onnur enn, at AB skal stríðast fyri at sleppa undan at flyta niður. Stórur partur av nevndini er skiftur út, og spælarafrágongdin hevur verið óvanliga stór. Á Argjum hava teir lagt stóran dent á at styrkja lokala samleikan. Tí er tað órógvandi, at fleiri lokalir stuðulsspælarar nú eru givnir. Her verður hugsað um Jobin Drangastein, Beinir Henriksen, Jónas Stenberg og Heðin Stenberg. Sorin Anghel hevur verið venjari á Argjum í 2015, 2018 og í 2019. Hann veit, hvat tað snýr seg um, nú hann byrjar av nýggjum. Rógvi N. Poulsen, sum er høvuðsungdómsvenjari, hevur eisini ábyrgd av fysisku venjingini hjá besta hópinum. Silas Eyðsteinsson og Bjarti Vitalis Mørk kappast um plássið millum stólparnar. Sørin Samuelsen, Pedro T. Anton og Dávid Langgaard eru millum miðverjarnar, og saman við teimum eru Jákup Pauli Breckmann og Gert Drangastein vongverjar. Á miðvøllinum er veteranurin Rógvi N. Poulsen saman við Bjarna Skála, Ragnar Skála, Janus Svabo Samuelsen og 24 ára gamla Jesper Van Den Heyden úr Belgia, sum er spildurnýggjur í føroyskum fótbólti. Møguleikar í fremstu røð eru Bartal Skaalum Petersen, Hans Jákup Annfinsson, Filip í Liða og Bjarki C. Nielsen og veteranurin Adeshina Lawal, sum er nýggjur á Argjum. Í venjingardystunum hava úrslitini ikki verið góð. Tað hevur gingið illa at mynda álopsspæl og vinna seg til upplagdar málmøguleikar, og tølini siga, at Sorin Anghel og hansara menn hava nógv at arbeiða við, um tað skal eydnast at byrgja fyri stórum tapum. Teir hava roynt at fáa onkrar av teimum, sum hava takkað fyri seg, at taka eitt tørn aftrat, og tað er ikki óhugsandi, at onkur spælari fer at leggjast aftrat teimum, sum eru á listanum. Um tað verður, sum tað plagar at vera, so fara nýggir spælarar at hjálpa til í summar, og so kann tað vera, at tað fer at eydnast at røkka málinum, sum er sleppa undan niðurflyting. ARGJA BÓLTFELAG STOVNAÐ 15. AUGUST 1973 FORMAÐUR Marius Thomassen 10 V I T T I P P A HÓPURIN Stór spælarafrágongd hevur við sær, at AB helst skal stríðast fyri at sleppa undan niðurflyting AB ER AFTUR Á BERUM Mál 1 Silas Eyðsteinsson 16 Bjarti Vitalis Mørk Verja 2 Pedro Tarancon Anton 3 Dávid Langgaard 6 Gert Drangastein 18 Jákup Pauli Breckmann 19 Sørin Samuelsen Miðja 7 Jasper Van Der Heyden 8 Janus Svabo Samuelsen 10 Bjarni Skála 21 Rógvi N. Poulsen 23 Ragnar Skála Álop 9 Tóki á Lofti 11 Hans Jákup Annfinsson 17 Bartal Skaalum Petersen 20 Filip í Liða 22 Bjarki C. Nielsen 30 Adeshina Lawal Venjari Sorin Anghel Hjálparvenjari Tonny Brimsvík Tilgongd Adeshina Lawal, Janus Samuelsen, Dávid Langgaard, Pedro Tarancon Anton, Silas Eyðsteinsson, Bjarti V. Mørk Frágongd Heri Mohr, Mikkjal Hentze, Jónas Stenberg, Bárður Olsen, Leivur H. Joensen, Beinir Henriksen, Tobias Larsen, Lukas Giessing, Jobin Drangastein, Heðin Stenberg, Eli Christiansson