hósdagur 28. mai 2020síða 58

ÁRIÐ VERÐUR NEYVAN LÍKA GOTT SUM Í FJØR - Korona-kreppan hevur ikki ávirkað sjálvt framleiðsluvirksemið, tí vit vórðu liðug við fyrsta part av makrelinum, áðrenn kreppan tók seg upp. Hinvegin tekur tað tíð at selja, og marknaðurin er ógvuliga tamur, sigur Jóhan Páll Joensen, stjóri í Pelagos í Fuglafirði U ppsjóvarvirkið Pelgos í Fuglafirði hevði eitt gott ár í fjør við 33,6 miljónum krón­um í avlopi eftir skatt. Árið fyri - í 2018 - var avlopið 35,9 miljónir krónur eftir skatt. Hetta eru flott úrslit. Jóhan Páll Joensen, stjóri, sigur, at virkið plagar at taka ímóti umleið 50.000 tonsum av makreli og sild um árið, men hann ivast í, um tey fara at røkka so frægum nøgdum í ár. - Vit vórðu liðug við makrelin longu síðst í januar, og tá høvdu vit keypt umleið 15.000 tons. Nú er steðgur í framleiðsluni, og vanliga byrjar makrelvertíðin aftur í august. Síðan verður vanliga arbeitt tað mesta av árinum. Stjórin sigur, at tað vanliga er, at byrjað verður aftur við makreli í august, og síðan plagar virkið at keypa sild í okt­ober og út í november. - Um nakar makrelur verður eftir til seinni í heyst, vita vit sjálvsagt ikki í løtuni. Tað veldst um, hvussu fiski­skapurin hjá skipunum verður í heyst, og um nøkur makrel­kvota verður eftir, tá sildin er liðug. Trekur marknaður Jóhan Páll Joensen vísir á, at korona-kreppan hevur ikki ávirkað arbeiðið á virkinum, tí tey vóru liðug við fyrsta part av vertíðini í ár, áðrenn korona-kreppan tók seg upp. - Tí hevur heldur einki framleiðsluvirksemi verið á virk­in­um, síðan Føroyar fóru niður í ferð á grækarismessu, og tað verða nakrir mánaðir enn, áðrenn regluliga virksemið verð­ur tikið uppaftur. Stjórin í Pelagos ásannar tó, at marknaðurin undir krepp­uni hevur verið ógvuliga tamur, sum hann tekur til. - Vit selja vanliga okkara framleiðslu frá februar til út í aug­ust, men vit hava týðiliga merkt, at marknaðurin er tam­ur. Vanliga hava vit nógv á goymslu hesa tíðina av árin­um, men tað gongur seinni út av goymslunum í ár enn onnur ár. Eg vil siga, at goymslurnar minka seint, legg­ur hann aftrat. Ymiskar fyritreytir Spurdur, hvat tað kann merkja, at makrelur á goymsluni er keyptur í einari tíð, har korona ikki var ein trupulleiki - og nú skal seljast undir ella eftir korona? - Vit stúra ikki fyri at brenna inni við fiskinum, men tað gongur ógvuliga seint at selja út av goymsluni. Tú keyp­ir upp á tær fyritreytir, tú kennir, tá tú keypir fiskin. Við­hvørt verður keypt ov dýrt, og viðhvørt verður keypt bílig­ari. Nú mugu vit bara síggja, hvussu hetta fer at laga seg, sigur Jóhan Páll Joensen. Stjórin leggur aftrat, at framleiðslan hjá virkinum verður seld á altjóða marknaðinum, og tí er váðin serliga tengdur at búskaparstøðuni í viðkomandi keyparalandi. Heldur lakari ár Jóhan Páll Joensen vísir á, at tey á Pelagos fylgja við støð­uni í teimum londum, sum selt verður til, og soleiðis royn­ir virkið at minka um møguligar váðar. - Vit vænta eitt heldur lakari úrslit í ár, tí framleiðslan verður neyvan líka stór í ár sum í fjør, leggur stjórin aftrat. Stjóri: Jóhan Páll Joesen. Nevnd: Jan Petersen, nevndarformaður, Anfinnur Olsen, nevndarlimur og Odd Eliasen, nevndarlimur. Pelagos er stovnað hin 27. januar í 2014. Eigarar eru: Á Enni P/F, Fuglafjørður, Framherji Sp/f, Fuglafjørður, Havsbrún P/F, Glyvrar og Palli hjá Mariannu P/F, Klaksvík. FAKTA - Vit stúra ikki fyri at brenna inni við fiskinum, men tað gongur ógvuliga seint at selja út av goymsluni, sigur Jóhan Páll Joensen, stjóri í Pelagos Samrøða 26 TEKSTUR VILMUND JACOBSEN