hósdagur 27. august 2020síða 54

22 Í vikuni kom flakatrolarin hjá JFK Troli, Sjúrðarberg á Klaksvík. Skipið er fyrrverandi Skálafjall, sum varð bygdur á Skála Skipasmiðju í 1987. Áðrenn Skálafjall fór av landinum, hevði skipið eisini nøvnini, Beinir og Akraberg. Sjúrðarberg, sum nýggja navnið á fyrrverandi Skálafjalli er, hevur í seinastuni verið skrásettur í Póllandi. Ymiskar umvælingar eru gjørdar umborð, áðrenn skipið kom til Føroya, og nú verður nýggj flakalinja sett upp, áðrenn loyst verður til fyrsta túr. 25-26 miljónir Hanus Hansen, stjóri í JFK Troli, segði við KvF í vikuni, at keypsprísurin fyri Sjúrðarberg er umleið 18,6 miljónir krónur og við umvælingum og dagføringum kostar skipið nú einar 25-26 miljónir krónur. Seinastu tvey árini hevur Gadus fiskað alla kvotuna hjá JFK í Barentshavinum. - Tá vit seldu gamla Sjúrðarberg, høvdu vit 9. 500 tons av botnfiski í Barentshavinum. Gadus hevur fiskað millum 8.000 og 10.000 tons um árið, og tað var hetta, sum Gadus kláraði at fiska - alt eftir, hvussu árið royndist. Stjórin vísir á, at tá var ikki grundarlag fyri tveimum skipum hjá felagnum. - Síðan uppboðssølan av fiskirættindum í Barents­ havinum fór aftur í søguna, og kvotan er býtt, soleiðis sum hon hevur verið býtt síðan í áttatiárunum, eigur JFK aftur meira fisk at fara eftir. Tí hevur felagið eisini brúk fyri tveimum skipum, til nýggja skipið kemur um tvey ár. Hanus Hansen vísir á, at JFK nú hevur 12.300 tons at fiska í Barentshavinum. - Undir skipanini, sum var til og við í fjør, skuldi tú keypa ein fittan part av kvotuni. Her skuldi tú koyra títt boð í ein brævbjálva og vóna tað besta. Reiðarin heldur ikki, at tað ber til at hava skip og manningar gangandi heima og bíða upp á, at tú kanska vinnur í hesum brævbjálvanum, sum hann tekur til. Eitt ella tvey skip Ætlandi kemur nýggi Gadus til sjómannadagin í Klaksvík í 2022. - Hvørt vit tá fara at selja Sjúrðarberg aftur ella ei, veldst alt um, hvussu verður við fiskirættindum til ta tíð. Men, tað er ikki óhugsandi, at vit fara at hava Sjúrðarberg til at fiska kongafisk og kanska eitt sindur av toski. Stjórin í JFK Troli vísir á, at kvotur veksa og minka, men í løtuni heldur hann, at tað sær rímiliga gott út í so máta. - Men, um eini trý ár kunnu kvoturnar verða minkaðar - ella, tær tá kanska verða enn størri, enn tær eru í dag. Tað vita vit sjálvsagt ikki. Alt veldst tískil um, hvør kvotustøðan verður. Hinvegin er greitt, at vit í øllum førum ikki fara at hava meira enn tvey skip til hesar kvotur. Hanus Hansen sigur, at tá nýggja skipið kemur um tvey ár, verður antin Gadus ella Sjúrðarberg seldur, kanska báðir, leggur hann aftrat. JFK eigur aftur ein Sjúrðarberg - Hvørt vit fara at selja Sjúrðarberg aftur ella ei, tá nýggja skipið kemur, veldst alt um, hvussu verður við fiskirættindum til ta tíð. Men, tað er ikki óhugsandi, at vit fara at hava Sjúrðarberg til at fiska kongafisk og kanska eitt sindur av toski, sigur Hanus Hansen, stjóri í JFK Troli VILMUND JACOBSEN - MYNDIR: OLIVUR JOENSEN