hósdagur 10. september 2020síða 36

SEPTEMBER 2020 12 LÝSINGARBLAÐ FRÁ MIÐLAHÚSINUM MENN HONDBÓLTUR 2020/21 KÍF Joakim Jürs Ragnar Gaard Rúni Joensen Jón Súni Kjærbæk Poul Finnur Egholm Egin Hallgrímsson Hans Eli Sigurbjørnsson Rani Højgaard Ási Dam Nicklas Selvig Andrias Nielsen Hjalti Hammer Matras Teitur Joensen Bárður Dam Tony Weyhe Atli Lamhauge Hammer Hörður Fannar Sigþórsson Verjuskansin er aftur í Kollafirði Síðsta kappingarár lá KÍF í hølunum á oddaliðunum. Í ár er hópurin eitt vet breidri, og tað skal gagnnýtast. - Vit vilja gjarna vera við har tað er stuttligt at spæla, og vónandi spæla eina finalu ella tvær, sigur heimvendi verjuskansin, Tony H. Weyhe. KÍF var í ferð við eitt rímiligt kappingarár, tá ið korona-smittan breyt kappingina av í mars. Koll­firðingar vóru í hølunum á oddaliðunum, og megn­aðu eisini at koppa teimum nú og tá, men nógv­ir skaðar í einum frammanundan heldur tunn­um hópi skapti sínar avbjóðingar. Serliga var tað stabiliteturin, ið haltaði, og hvat er tá betur enn at fáa sín verjuskansa inn aftur á liðið. Tony H. Weyhe er nevniliga tilreiðar at fara í aftur reyðu KÍF-troyggjuna og veita liðnum betri breidd og stabilitet. - Hondbóltshugurin er í hvussu er til staðar og bara vaksin meðan man hevur verið burtur, sigur heimkomni Tony H. Weyhe. Heimaftur Tony H. Weyhe hevur í nógv ár verið ein av stinnastu verjuleikarunum í føroysku kappingini, men síðstu tvey árini hevur hann verið í Danmark í lestrarørindum. Hesi bæði árini hevur hann rað­ fest lesnaðin og familjuna, og hevur tískil ikki spælt hondbólt. - Eg havi tó hildið kroppin á einum nøkur­ lunda støði við tí fyri eyga at spæla hondbólt tá eg flutti heimaftur. Ætlanin er at vera 100% við aftur, sigur Tony, sum tó í longri tíð hevur stríðst við ein fótskaða, ið hann ætlar sær at skurðviðgerast fyri. Hetta er framhaldssøgan um KÍF og skaðar, og tveir aðrir leikarar, Ási Dam og Nicklas Selvig, eru skurðviðgjørdir í hondini og missa helst fyrsta partin av kappingini. KÍF-hópurin er tó heldur breidri í ár og helst betur bjálvaður til skaðar, og KÍF kann ikki útilokast at spæla við frammi ímóti oddinum, har teir eisini vóru í fjør - og serliga kunnu vera tað í ár, nú kappingin tykist meiri opin. Verjan Tað hevur verið ein drúgvur steðgur í hond­bólts­ venj­ingunum frá mars og fram til í summar, og tað hava teir í KÍF tikið hædd fyri. - Eftir ein so drúgvan steðg, so hevur tað verið neyðugt at byrja varligari fyri at fyrireika kroppin upp á hondbólt aftur. Hóast tað, so hava vit havt fleiri skaðar, og av somu orsøk hevði tað ikki undrað meg, um tað tekur tíð til liðið ordiliga kemur í gongd og er samanspælt, sigur Tony H. Weyhe. Tony H. Weyhe er strikuspælari, og á tí plássinum er KÍF kanska serliga væl mannað við Hørði F. Sigtórssyni og Atla Lamhauge. - Eg vænti at størsti leikluturin hjá mær kem­ ur at vera í verjupartinum, har man nokk hevur havt sína styrki ígjøgnum tíðina. Vónandi kann man gera ein mun har, sigur Tony. - Vónin er, at vit fáa eina góða verju upp at koyra saman við málmanninum, so vit kunnu fáa nógv av teimum løttu kontramálunum, sigur Tony og skoytir upp í, at álopsparturin helst aft­ ur í ár fer at dúva nógv upp á dygdirnar og málini hjá Hans Eli Sigurbjørnssyni og Nicklasi Selvig. Jøvn kapping Tony H. Weyhe heldur, at teir á KÍF-liðnum í ár hava fjølbroyttar dygdir. - Vit hava nógvar typur av spælarum, sigur hann. - Nakrir eru kvikir, og so hava vit nakrar, ið eru tungir og sterkir. Vit hava ikki yngsta hópin í landinum, men heldur ein rættiliga royndan hóp, har tað eru menn, ið hava nógvar dystir í bestu hondbóltsdeildini, vísir Tony á. Hann sigur seg vænta eina javna kapping í ár. - Men eg havi VÍF sum favoritt. Teir hava ikki havt nakra frágongd, men eru styrktir, sigur Tony. - Eg haldi eisini at H71 og Neistin eru góð boð uppá at kappast í toppinum. Síðani er Team Klaksvík eitt sindur av einum svørtum hesti. Teir kunnu við sínari útlendsku styrki yvirraska í ár, heldur Tony, sum at enda avdúkar málsetningin hjá KÍF. - Vit vilja gjarna vera við har tað er stuttligt at spæla, og vónandi spæla eina finalu ella tvær, sigur Tony H. Weyhe. KÍF menn Føroyameistaraheiti: 2 (2013, 2014) Steypasigrar: 1 (2013) Toppskjúttar kappingarárið 2019/2020 Nicklas Selvig, 109 mál Rúni Joensen, 64 mál Hans Eli Sigurbjørnsson, 63 mál