hósdagur 10. september 2020síða 60

SEPTEMBER 2020 36 LÝSINGARBLAÐ FRÁ MIÐLAHÚSINUM HONDBÓLTUR 2020/21 Framvegis ov fáir dómarar - Dómarastandurin kundi verið betri enn hann er í løtuni, staðfestir Thomas Juul S. Thomsen, umboð fyri dómaranevndina. Seks pør eru tøk, men nakrir eru í eldra lagi. Vónin er at ungir dómarar setast við, men tað vísir seg at vera trupult. Seks pør Tað hevur í nógv ár manglað dómarar í føroyskum hondbólti, og soleiðis er aftur í ár. - Dómarastandurin kundi verið betri enn hann er í løtuni. Tíverri, staðfestir Thomas Juul S. Thomsen, sum er í dómaranevndini hjá Hondbóltssambandi Føroya, og sum eisini sjálvur hevur verið dómari í nógv ár. - Í løtuni eru seks pør tøk, sum hava dømt í bestu deildini fyrr. Vit vóna at okkurt nýtt par fer at setast við í ár, sigur Thomas Juul. Arnar Dam og Gert Hansen, sum hava tikið sær av nógvum týð­andi dystum síðstu árini, døma ikki í ár vegna skaða. Tað er tó orsøk til ugga, tí hóast støðan óivað kundi verið frægari viðvíkjandi tali av dómarum, so hevur tað higartil malið runt. - Farna kappingarár bleiv eingin dystur útsettur av tí at tað manglaðu dómarar. So tað er jaligt, at allir dystirnir blivu avgreidd­ir, sigur Thomas Juul. - Dómararnir eiga stórt rós uppiborið fyri at fáa kappingina at koyra soleiðis at eingir dystir verða útsettir tí at dómarar ikki eru tøkir, leggur hann afturat. Gera tiltøk Tað er ikki besta støðan at vera í, at tað ikki er eitt størri tal av dóm­arum. Nógv hvílir á teimum somu herðunum. - Dómararnir eru teir somu, sum við ov stuttum millumbili døma somu feløgini, sigur Thomas Juul. Hondbóltssamband Føroya hevur tó roynt at fingið fleiri dóm­ arar at døma. - HSF hevur í fleiri ár skipað fyri dómaraskeiðum runt í landinum, og so seint sum síðsta kappingarár fóru umboð fyri dómaranevndina runt til øll feløg í Føroyum at skipa fyri dómara­ skeiðum. Tíverri sæst hetta ikki aftur í talinum av dóm­arum, tí tað leggjast ikki fleiri dómarar afturat dóm­ara­familj­uni, staðfestir Thomas Juul. - Hetta er ein avbjóðing, sum hevur verið í nógv ár, og sum tað verður arbeitt víðari við, sigur hann. Illa viðfarnir Tað er ilt at meta um júst hví tað er so trupult at fáa tilgongd av nýggjum dómarum, men Thomas Juul heldur tað ikki vera til nakra hjálp, at dómarar verða so illa viðfarnir í hallunum kring landið. - Um man ferðast runt í hallunum í Føroyum og hoyrir hvat tað verður rópt og sagt um dómarar, so skilji eg væl, at fólk setast aftur, sigur Thomas Juul. - Tað er nógv, sum ikki sømir seg at verða sagt frá áskoð­ara­ bonk­unum. Eg havi ongar trupulleikar vði at fólk rópa okkurt, ið hoyrir til spælið, men nógv er á so lágum støði, at um ein situr og um­hugsar at døma, og so hoyrir hvat tað verður sagt, ja so skilji eg væl at fólk setast aftur, sigur hann. Tískil vónar hann, at fólk hugsa seg betur um framyvir. - Eg vóni at fólk runt um í Føroyum vanda sær betur um orðini, tá ið tey fara til hondbólt, sigur Thomas Juul. Góðar løtur Hóast manglandi virðingina frá nógvum áskoðarum, so eru tað eisini góðar løtur, sum dómarar fáa. Tað heldur Thomas Juul, og hann tosar av egnum royndum. - Fyri tað fyrsta, so mennist ein nógv sum persónur og leiðari av tí at man skal taka skjótar og rættar avgerðir upp á stutta tíð. Hetta ger, at man skal vera on allatíð tá ið man dømir. Tað eru nógvar avgerðir, sum skulu takast, sigur hann. - Sjálvur hevði eg nógvar góðar løtur sum dómari, slær Thomas Juul fast. - Fyri tað fyrsta, so kemur ein runt í øllum landinum og kemur at kenna nógv fólk, sum hava ábyrgdina av hondbóltinum. Umframt hetta fært tú nógvar stuttligar og avbjóðandi upp­liv­ing­ ar, sum tú hevur í minninum restina av lívinum, sigur Thomas Juul. - Eg vildi ikki verið tær fyri uttan, og hvør veit, kanska floytan kemur úr skuffuni aftur í framtíðini, sigur hann. Dómaraskeið Síðsta vikuskifti skipaði Hondbóltssamband Føroya fyri dóm­ara­ skeið­um, og har var uppmøtingin á góðari leið. - Sum tað sær út í løtuni, so vera vit í Føroyum noydd til at fáa fleiri ungar dómarar at døma. Tað eru nógvir dómarar, sum døma í dag, sum eru í eldra endanum. So har vera vit noydd at fáa fleiri yngri dómarar at tíma at døma hondbólt, sigur Thomas Juul. - Dómaraskeiðini um vikuskiftið eydnaðust væl. Vónandi legst onkur afturat at døma. Dómaranevndin leggur nógv fyri at skúla og vegleiða nýggjum dómarum, so at teir kunnu hjálpast í gongd á bestan hátt, sigur Thomas Juul víðari. Hann sigur, at um onkur hevur ein hondbóltsdómara í búkinum, so er ikki at smæðast. - Tað er ikki at halda seg aftur, sigur Thomas Juul. - Tað er bara at bjóða seg fram, um ein ynskir tað, og so er at venda sær til HSF. Tað eru nógvar góðar upplivingar at fáa sum dómari í Føroyum, og so er tað ein gularót, at vit í løtuni ikki hava nakað altjóða dómarapar. Tað má vera málið hjá okkum at fáa eitt altjóða par aftur, sigur Thomas Juul S. Thomsen at enda. Dómarapør 2020/2021 Bárður Brimvík - Jógvan Skeel Nolsøe Uni Wardum - Hannis Wardum Dánjal Samuelsen - Heri Petersen Jákup Sverri Kass - Daniel Rapa Jákup Símun Simonsen - Gunnar Djurhuus Rógvi Danielsen - Bárður Danielsen