hósdagur 3. desember 2020síða 46

22 Faroe Ship: GOTT ÁR HÓAST ALT Korona hevur havt ávirkan á føroyska útflutningin, og tað hevur eisini merkt virksemið hjá Faroe Ship í ár. Nógv at gjørt Tað hevur verið nógv at gjørt. Í nøgd hevur innflutningurin verið á leið tann sami sum í fjør, meðan útflutningurin er eitt vet lægri, sigur Bogi P. Nielsen, stjóri hjá Faroe Ship. Hann greiðir frá, at í ár hevur Faroe Ship flutt sera nógvar bingjur við uppisjóvarfiski langvegis við skipum hjá Maersk, sum Faroe Ship er umboð hjá í Føroyum. Tað hevur verið nógv meiri av tí, men samstundis hevur tað verið nógv minni av feskum fiski. Vit sigla nógv til Stóra Bretland við feskum fiski, og tað er ein berandi marknaður hjá okkum, men tann parturin hevur verið væl minni í ár, sigur stjórin hjá Faroe Ship. Hann greiðir frá, at tíðliga í ár, áðrenn korona rakti, gjørdi Faroe Ship nakrar rationaliseringar, og saman við øðrum átøkum, ger tað sítt til, at Faroe Ship hóast alt hevur havt eitt gott ár. Havnaútbyggingin hevur órógvað Útbyggingin av Tórshavnar Havn, har Faroe Ship hevur sítt høvuðssæti og størsta partin av sínum virksemi, er eisini nakað, sum tey merkja til dagligt. Vit hava havt nokk so nógv eyka arbeiði av havnaútbyggingini. Havnaútbyggingin bleiv nógv seinkað, men tíbetur vóru nýggju skipini hjá okkum eisini seinkað, tí um tey komu til tíðina, so var havnin als ikki klár til, at tey kundu leggja at bryggju her, sigur Bogi P. Nielsen. Nýggju skipini eru komin, og tey fáa lagt at bryggju nú, men tað er framvegis ikki heilt optimalt. Tað er framvegis eitt byggirót á havnalagnum, so vit gleða okkum til, at tað eisini kemur í rættlag, sigur stjórin á Faroe Ship. Hjá Fróða: MEIRA VARIN UM 2021 Málingahandilin hjá Fróða hevur havt eitt gott ár í ár. Tað sigur stjórin og eigarin Fróði Sigvardsen, sum er væl nøgdur, men samstundis er hann eitt sindur varin um útlitini fyri komandi ár. Privata virksemið vaks Hjá okkum hevur árið verið eitt sindur betri enn í fjør. Eg haldi, at umsetningurin er eini 10 prosent hægri í ár í mun til í fjør, men vit hava altíð havt vøkstur, sigur Fróði Sigvardsen. Hann greiðir frá, at tá ið korona rakti Føroyar, sást hetta eisini aftur hjá teimum. Tá vaks sølan til privatkundar nógv. Tað var serliga í tíðarskeiðnum frá mars til mai, at sølan til privatkundar øktist nógv, og onkursvegna kann man siga, at árið hjá okkum gjørdist betri orsaka av korona, sigur Fróði Sigvardsen. Hann leggur tó afturat, at økingin í sølu til privatkundar eisini hevur havt nógv størri arbeiðstrýst við sær. Vit hava havt nógv fleiri avgreiðslur í handlinum av tí sama, og tað krevur sjálvsagt meiri av okkum, sigur hann. Saknar stórar verkætlanir komandi ár Spurdur um útlitini fyri 2021, sigur Fróði Sigvardsen, at hann er eitt sindur varin um útlitini. Vit selja nógv til stórar verkætlanir, og um tú hyggur eftir, hvørjar verkætlanir eru endaðar í ár, so er talan um rættiliga nógvar. Vit kunnu nevna Hotel Hilton, Hotel Brandan, Hotel Føroyar, Skúlin á Fløtum, nýggja politistøðin, Sundsverkið og H-bygningurin á Landssjúkrahúsinum. Hetta eru alt stórar verkætlanir, sum antin eru lidnar ella ikki mangla so nógv, og tað fara vit at merkja. Tí samstundis er so at siga ongin stór verkætlan sett í gongd. Vit vita eisini, at rættiliga nógvir útlendskir handverkarar, sum hava verið í Føroyum arbeitt fyri føroyskar fyritøkur, nú eru farnir heimaftur, sigur Fróði Sigvardsen. Hann sigur seg tó vóna, at onkur stór verkætlan fer at vera sett í gongd skjótt, tí tað hevur stóran týdning fyri teirra virksemi og virksemið hjá øðrum veitarum í byggivinnuni, at tað altíð eru verkætlanir í gongd. SOLEIÐIS GEKK 2020 SOLEIÐIS GEKK 2020