fríggjadagur 20. februar 2009síða 2

2 sosialurin 20. februar 2009 Rákið – hús & heim 7 góð ráð til føstulávint 1. Keyp CE-merkta sminku og tilfar til ítriv 2. Vel vørur uttan anga 3. Smyr eitt tjúkt lag av feitum svanamerktum andlitskremi sum undirlag, áðrenn sminkan verður løgd á 4. Ansa eftir at fáa alt burtur, tá sminkan verður vaskað av aftur 5. Brúka svanamerkt lím. Har mugu ikki vera ftalat og klorerað loysingarevni í 6. Vaska hendurnar á børnum væl, um tey hava verið við til at mála og líma 7. Keypið ikki ítrivsvørur, so sum glimmur, máling ella lím, um tað er vandamerkt Kelda: Umhvørvisstovan Føstulávint og sminka 7 góð ráð at spara streym SEV sigur, at el-rokningin kann minka 10 - 15 prosent, um tú bert broytir nakrar av gerandisvanunum hjá tær og tínum húski. 1. Tá ið vanligar gløðiperur bresta, skiftið tá út við "spariperur" - serliga í teimum rúmum, har ljósið er tendrað í nógvar tímar hvønn dag. 2. Sløkk á vegginum fyri elektriskum og elektroniskum tólum, so sum uppvaskimaskinu, sjónvarpi og teldu, tá ið tólini ikki eru í nýtslu. Gomul tól kunnu stjala nógvan streym. Royn at sløkkja fyri sjónvarpi, selektorboks og DVD-spælara við einum avbrótara, t.d. einum forleingjaraskinnara við einum reyðum avbrótara. Ger tað somuleiðis lætt at sløkkja bæði teldu, printara, hátalarar og subwuffara. 3. Keyp altíð elvørur við lágari elnýtslu, hygg serliga eftir, hvussu stór standby-nýtslan er. Eitt gamalt køliskáp ella gomul frystiboks ella telda kunnu lættliga brúka nógvan streym. Vel altíð hvítvørur eftir orkupílunum, har A-merkið er hitt besta. 4. Set tendri -/ sløkkiklokku á ljósið uttandura, soleiðis at hetta bert lýsir, tá ið tørvur er á tí. Sum dømi kunnu nevnast smáar, uttandura ljósperur/ljósketur, sum bert lýsa, tá ið onkur hevur gleði av at tær lýsa. 5. Ansa eftir pumpuni til oljufýrið. Skrúa t.d. pumpuna niður um summarið. 6. Royn at fáa øll í familjuni at hava góðar elvanar. Fyll vaski- og uppvaskimaskinuna, áðrenn tú setir hesar í gongd. Nýt eftirhitan í bakarovninum. Lat bert lítið av vatni í grýtuna, tá ið eplini skulu kókast. Legg frystar vørur í køliskápið at tiðna. Tað er best fyri vøruna, og samstundis sparir tú streym. 7. Eygleið streymnýtsluna. Les elmálaran av hvørja viku og skrivið talið niður. Soleiðis ber til at síggja úrslitið av betri elvanum. Um elnýtslan brádliga veksur, ber til at finna orsøkina beinanvegin og harvið steðga vøkstrinum. Kelda: SEV Útisavnið í Hoyvík Á útisavninum Heima á Garði í Hoyvík kanst tú vitja ein gamlan føroyskan garð við sethúsum, úthúsum, amboðum og mongum øðrum, ið hoyrdi til gerandislívið í Føroyum fyrr. Sethúsini á Hoyvíksgarði verða søgd at vera frá umleið 1812, men eru í dag innrættað sum tey vóru o.u. 1920. Matrikulgjøldini eru hækkað Matrikulgjøldini í Føroyum hava í nógv ár verið nógv tey lægstu í norðurlondum. Tí hevur Løgtingið, eftir tilmæli frá Umhvørvisstovuni og Innlendismálaráðnum, nú gjørt av at hækka gjøldini, við gildi frá fríggjadegnum 13. februar 2009. Hetta merkir, at allar matrikulerar umsóknir eins og umbønir um kort og líknandi, ið er innkomnar frá hesum degi, verða avgreiddar eftir teimum nýggju gjøldunum. Umsóknir, ið eru innkomnar áðrenn 13. februar 2009, verða avgreiddar eftir teimum gomlu gjøldunum. Fríðaðir bygningar Ein bygningur, sum verður mettur at hava nóg stórt byggilistarligt ella søguligt virði av týdningi fyri tjóðina, kann verða friðaður. Vanliga skulu bygningarnir vera eldri enn 100 ár. Í serstøkum førum kunnu yngri bygningar verða friðaðir. Í sambandi við friðing av einum bygningi kann eisini umliggjandi øki upp til 100 m frá mentanarminninum verða friðað, um so er, at tað er ein týðandi partur av teirri heild, sum ynskt verður at tryggja við friðingini. Tað kann t.d. vera ein urtagarður, eitt serligt tún, og tað kann eisini vera eitt størri øki, um tað hevur týdning fyri varðveitingina av søguliga umhvørvinum, sum mentanarminnið er liður í, sigur Fornminnissavnið.