fríggjadagur 24. juni 2011síða 46

Sosialurin nr. 72 · 24. juni 2011 14 Matstova Leo Poulsen leo@sosialurin.fo Síðani matstovumentanin tók seg upp fyri nøkrum árum síðani og fram til í dag, hevur trendurin verið, at matskráin skal vera so útlendsk sum tilber. Tað hev­ur staðið upp á pizza, spaghetti, pasta og annan italienskan mat, ella kines­iskt, turkiskt, spanskt... Og ikki eitt einasta ilt orð um tað. Før­oyingar hava veruliga trongt til at víðka sín kulinariska sjónarring. Men í allari hesari víðkanini er miðdepilin nær­um blivin burtur. Og tað gav Remy á Kamarinum og Allan Hjaltalin eitt gott hugskot. Teir lótu upp eina matstovu við mati, sum mamma borðreiddi við. Báðir hava drúgvar royndir í mat­ stovuvinnuni. – Eg havi starvast innan matstovu­ vinnuna í mong ár, og havi staðið fyri matar­seðlinum á fleiri matstovum, bæði uttanlands og í Føroyum, sigur Remy á Kamarinum. Allan Hjaltalin er útlærdur bakari, men hevur starvast sum kokkur, bæði á landi og sum skipskokkur. – Vit hava arbeitt saman leingi við at gera mat til veitslur av ymiskum slag, og vit hava leingi gingið og spælt okk­um við tankanum um at lata upp okk­ara egnu matstovu, sigur Remy á Kamar­inum. Teir hava hugt eftir fleiri hølum, men tá teir fingu gomlu Rio Bravo høl­ ini í boði, tóku teir av. Serlig matskrá Men skal tú hava eina matstovu, so eru karmarnir ikki nóg mikið, tú skal eisini hava eina matarskrá. – Tað var soleiðis, at vit spurdu okk­ um sjálvar, hvat vit høvdu vilja havt, fóru vit inn á eina matstovu, og tað stóð okkum skjótt greitt, at tað skuldi verða ein matskrá við mati, sum vit fingu frá mammu, tá vit vuksu upp, sigur Remy á Kamarinum. Hann hevur síðani sett saman eina matskrá, sum ikki líkist nakrari aðr­ari í býnum. Til sjálvtøkuborðið á døg­ urða eru heilt vanligir rættir so sum karry­bollar, hakkibúffar, stoktur fiskur, kotelettir, smáir búffar, kjøtstrimlar og millión­búffur. Eisini eru vanlig smá epli, eplabátar og rís at velja ímillum. Og sjálvandi salat. – Vit ætla at variera matskránna eitt sindur soleiðis, at ikki allir rættirnir alla tíðina verða teir somu. Men summir av rættunum koma kortini at ganga aftur. Tað sæst beinanvegin hvat tað er, gestirnir vilja hava, og teir populerastu rætt­irnir verða fastir, meðan vit koma at skifta millum hinar, sigur Remy á Kamarinum. Afturvið er so tað vanliga sum hoyrir til ymsu rættirnar, so sum sós, súltaðar agurkir, reyðkál og remulada. – At drekka afturvið matinum hava vit sjálvandi vín og øl, men til sjálv­ tøkuborðið á døgurða er tað mest vatn og serliga sodavatn, sum fólk vilja hava afturvið, sigur Remy á Kamarinum. Nýggj fimm-rættar-skrá Sjálvtøkuborðið á døgurða er frá klokk­ an 11.30 til 13.30, men tað er kortini ikki tað einasta, matstovan 11 hevur at bjóða upp á. – Nei, vit hava eisini opið um kvøld­ arnar við einari a la carte matskrá. Vit hava roynt at hildi okkum til eina rím­ iliga einfalda matskrá við neytakjøti, reinsdjórakjøti, fiski og onkrum øðrum, sigur Remy á Kamarinum. Í heila tikið halda teir seg upp at upp­skriftini hjá Bo Bech um einfalda mat­skrá, einki pulvur, eingir skjótir »smutt­vegir«, alt verður bygt upp frá grund­ini. Men teir báðir hava í eina tíð arbeitt við einari nýggjari, spennandi og ser­ligari fimm rættir matskrá, sum teir ætla at innføra um nakrar vikur. – Talan er um eina fimm rættir skrá, sum byggir á føroyskar rávørur. Hetta verður ein eksperimenterandi matar­ skrá, ið skal appelera til smakksansin. Men sigast skal, at hóast matskráin er grundað á føroyskar rávørur, so skal talan eisini verða um góðsku. Vit brúka ikki føroyskt, bara tí tað er føroyskt, sigur Allan Hjaltalin. Av tí at hendan matarskráin er á fyri­reikandi støði vilja teir báðir ikki siga so nógv annað um, hvussu hon fer at síggja út. Óvæntað vælumtókt Tá farið verður undir eitthvørt virksemi er tað við einari vón um, at gangast skal væl, og hjá 11 hevur gingið yvir alla væntan. – Vit høvdu ein tanka um, at fáa 15- 20 fólk til sjálvtøkuborðið á døgurða, men vit hava rættiliga verið tiknir á bóli. Talið av gestum á døgurða ligg­ ur millum 60 og 100, og vit hava upp­ livað, at bíðirøð stendur langt niður í trapp­urnar. Tað er ikki dagur, at fólk ikki mugu bíða eftir borði, so vit mugu siga, at tað hevur gingið væl higartil, sigur Remy á Kamarinum. Matstovan læt upp miðan mars, men longu nú siga teir báðir, at teir hava fingið kundar, sum mugu kallast stam­gestir. – Okkara motto hevur alla tíðina verið, at eingin er ov høgur og eingin ov lágur at vitja matstovuna 11, og her koma eisini øll sløg av fólki, sigur Remy á Kam­arinum. Hann heldur, at tað eru tvær orsøkir til, at matstovan er so væl umtókt. – Tað er serliga heimliga matskráin, sum dregur, og so eisini tað, at vit liggja í lægra enda av prísstøðinum, sum ger munin, sigur Remy á Kamarinum. Men júst tað, at so nógv fólk vitjar matstovuna, hevur gjørt, at teir báðir hava ætlanir um at økja um sitiplássini, uttan tó at minka um komfortin hjá einstaka gestinum. – Vit leggja dent á, at fólk skulu hava albogarúm, men við stóra gestatalinum í huga, samstundis sum vit halda, at vit saktans kunnu útnytta hølini betri, fara vit at fáa fleiri sitipláss, sigur Allan Hjaltalin. Langir arbeiðsdagar Stóra sukse'in hevur eisini merkt, at teir báðir hava havt ógvuliga nógv at gera, og harvið eisini ógvuliga lítla frítíð. – Ja, tað hevur verið strævið, men tíbetur hava vit ógvuliga góð starvsfólk, so tað er vorðið til onkran frídag inn ímill­um, sigur Remy á Kamarinum. Men teir kendu bransjuna og vóru innstillaðir upp á langar arbeiðsdagar framm­an undan. Og tað var eisini framm­an undan, at teir skuldu finna eitt rám­andi navn til matstovuna. – Vit kannaðu nøvn og býir í kendu vínøkjunum í eitt nú Fraklandi, men vit funnu einki har vit kundu siga, at hattar er tað. Tí kom tað so líðandi, at brúka gøtunummarið sum navn á mat­ stovuni, sigur Allan Hjaltalin. Soleiðis kom matstovan at eita 11. – Vit hildu, at tað riggaði, júst tí talan var um 11, tvey eitt tøl. Eg haldi ikki tað hevði riggað, um vit lógu á numm­ar 12 ella 18, men júst 11 virkar, sigur Allan Hjaltalin. Men hóast matstovan bert hevur góðar tríggjar mánaðir á baki er 11 longu kend sum staðið, har tú fært mamm­usa mat. 11 bjóðar mammusa mat Matstovan 11 í Tórsgøtu 11 bjóðar øðrvísi mat enn vanligu døgurða­ buffet'irnar. Har er matskráin hakkibúffur, karrybollar, fiskaflak, kotelettir, búffur, stutt sagt matur, sum mamma plagdi at gera Hugnalig matstova mynd: Jens Kristian Vang