mánadagur 19. september 2011síða 26

Mánadagur 19. september 2011 · Nr. 108 26 Sosialurin Ítróttarblaðið Fernando Torres – ein hálv milliard Hann er dýrasta keypið í bretlandi nakrantíð, men hevur bara skotið tvey mál síðani skiftið í vetur. Í gjár sóu vit báðar útgávurnar av Fernando Torres Tróndur Arge Hansara fyrsti dystur í Premier League var á Anfield móti Chelsea í 2007. Liverpool hevði um summarið tapt Champions League finaluna og Liverpool venjarin vildi hava styrk. Millum keypini var Atletico Madrid framherjin, Fernando Torres. Hann kostaði nakað yvir 200 milliónir, men øll vóru ikki vís í hvussu spaniólin fór at roynast í Premier League. Longu í fyrsta dystinum er tó greitt, at Liverpool hevur rakt seymin á høvdið. Steven Gerrard sendir bóltin út í vinstru til “El Nino”, sum hann eisini verður róptur. Hann steðgar á og við eitt setur hann ferð á og kemur framvið Chelsea verjuni. Neyvleikin á bæði dribbling og skotinum er í topp og Liverpool hevur funnið sín nýggja nummar níggju. Broyttur Torres Í kappingarárinum 2008/09 endar Liverpool á øðrum plássi og hevur sum heild eitt gott kappingarár. Liverpool er á veg móti toppinum og undan kappingarárinum árið eftir gera ymiskir miðlar eisini Liverpool til ein av favorittinum til at vinna Premier League. Men okkurt er broytt. Real Madrid er farið avstað við Xabi Alonso og bæði Steven Gerard og Fernando Torres eru nógv skaddir. Liverpool endar á einum sjeynda plássið og eftir kappingarenda verður Rafael Benitez koyrdur. Í fjør verður Roy Hodgson settur sum venjarin, men handan leiktjøldini er lítið skil á og tað er øllum greitt, at Liverpool er eitt ósunt felag. Roy Hodgson megnar tó at tryggja sær, at Fernando Torres ongan veg fer, men hann er ikki tann sami. Bóltførleikin er vekk og verju­ leikararnir hava lætt við at steðga honum. Hann brúkar megin­partin av tíðini at skeldast við mót­støðu­ leikarar og ikki minst dómaran. Vekk er eisini stríðsviljan, ið dámdi Liveprool viðhaldsfólkunum so væl. Nærdystirnar og verjukendu renningarnar eru nærum ikki at síggja. Fernando Torres er ikki tann sami. Skiftið til Chelsea – tann ógloymandi 31. januar Í januar mánaði í ár verður Roy Hodgson avloystur av Kenny Dalglish og Liverpool reisur seg eftir eitt sera vánaliga kappingarbyrjan. Fernando Torres byrjar eisini at líkjast sær sjálvum og málini koma við styttri millumbilum. 31. januar 2011 stendur fastur í minninum hjá bæði Liverpool og Chelsea viðhaldsfólki. Tað er dagurin, tá flytingarvindeyga letur aftur. Søgan um Fernando Torres og Chelsea er ikki heilt nýggj, men sum dagurin gerst tað alsamt meiri greitt, at Fernando Torres ikki er sinnaður at halda fram í Liverpool. Søgurnar byrjar eisini at ganga um, at Liverpool vil hava Andy Carroll frá Newcastle umframt áleið 150 milliónir, áðrenn teir eru sinnaðir at lata Fernando Torres skifta. Newcastle vil ikki selja fyri minni góðar 300 milliónir og tí endar Chelsea við at skula av við eina lítla hálva milliard fyri Fernando Torres. Skiftið gerst eitt tað mest umtalaða í nýggjari tíð. Fyrsti dysturin móti Liverpool Í Chelsea fegnast tey um nýggja 9’arin, men ivast um hann og Didier Drogba kunnu spæla saman. Í Liverpool eru viðhaldsfólkini deild í tveir bólkar. Tey sum hata Fernando Torres fyri tað hann gjørdi og tey sum skilja hann. Fyrsti dysturin hjá Chelsea við spanska framherjanum á liðnum er móti Liverpool á Stamford Bridge. Dystrin er ein góð mynd upp á tíðina hjá Fernando Torres í Chelsea. Hann verður taklaður um koll, rakar ikki málið og verður útskiftur til stóra gleði fyri við­ haldsfólkini hjá Liverpool. Umframt tað, so vinnur Liverpool dystin 1-0. Tað gongur strilti hjá Fernando Torres at raka málið yvirhøvur í Chelsea troyggjuni. Bretsku bløð­ ini skriva síðu upp og síðu niður um bretska metkeypið, sum ikki rakar málið og tykist verða ein skuggi av sær sjálvum. Hann skorar eittans mál fyri Chelsea áðrenn kappingarenda. Nýtt kappingar – nýggjur Torres Fyri fyrstu ferð síðani Fernando Torres kom til enskan fótbólt, hevur hann frí frá landsliðsfótbólti í summar steðginum undan hes­um kappingarárinum. Í fyrsta dyst­ in­um móti Stoke er nakað av tí gamla Fernando Torres at síggja aftur. Hann er lættur á fótum og bóltførleikin byrjar at líkjast aftur. Málið kemur ikki, men avrikið er av teimum bestu í bláu troyggjuni. Í Champions League dystinum móti Bayer Leverkusen leggur hann upp til bæði málini, sum Chelsea skorar. Champions League fótbóltur er ein av høvðusorsøkunum, at spanski framherjin velur at skifta til Chelsea, sambært sær sjálvum. Tvær útgávur í sama dysti Í gjár sóu vit tvær ymiskar útgávur av Fernando Torres. Fyrra útgávan var nakað, sum minnur um mannin, ið bergtók Liverpool viðhaldsfólk við sínum frálíku driblingum og ikki minst nógvu málum. Í 83 minuttir og 24 sekund spældi spaniólin ein góðan dyst. Hann var upphavsmaður til størsta Chelsea møguleikan í fyrra hálvleiki, tá hann legði bóltin fyri føturnar á Ramires, sum brendi upp á tað skammiligasta. Tíðliga í seinna hálvleiki kemur so forloysandi málið hjá manninum við 9-talinum. Ikki tí, støðan er framvegis 3-1 til Manchester United, men málið er eitt av teimum heilt góðu. Renn­ ingin er røtt og hegnisliga fær hann lyft bóltin upp um David De Gea í málinum. Tá klokkan vísur 83 minuttir og 24 sekund er ongin í iva, Fernando Torres is back. Enn eina ferð er renningin inn um verjuna hjá Man­ chester United frálík. Hann kemur eisini framvið málverjanum og so… Onkursvegna megnar Fernando Torres ikki at skora fyri opnum máli úr fimm metra frástøðu. Hvørki Fernando sjálvur, við- og mótstøðu-leikararnir ella áskoð­ ararnir trúgva sínum egnu eygum. Fernando Torres hevur brent ein tann størsta møguleikan í Premier League søguni. Júst sum Chelsea viðhaldsfólkini hildu at bretska metkeypið var komi seg - brendi hann. Í dag er Fernando Torres aftur á ítróttarforsíðunum kring heimin fyri enn ein brendan málmøguleika, heldur enn fyri góða avrikið. Er avrikið móti Manchester United ein ábending um, at Fernando Torres er á veg aftur til formin, ið gjørdi hann til ein av heimsins bestu framherjum, ella er risa av­ brennarin ein staðfesting av at tíðin er farin frá Fernando Torres? trondur@sosialurin.fo Barclays Premier League nr. lið dystir vunni javnt tapt mál stig 1 Manchester United 5 5 0 0 21-4 15 2 Manchester City 5 4 1 0 17-5 13 3 Chelsea 5 3 1 1 8-6 10 4 Newcastle 5 2 3 0 4-2 9 5 Stoke 5 2 2 1 3-5 8 6 Aston Villa 5 1 4 0 6-4 7 7 Everton 4 2 1 1 6-4 7 8 Liverpool 5 2 1 2 6-7 7 9 Queens Park Rangers 5 2 1 2 4-6 7 10 Wolverhampton 5 2 1 2 4-6 7 11 Tottenham 4 2 0 2 7-8 6 12 Sunderland 5 1 2 2 6-4 5 13 Norwich 5 1 2 2 5-7 5 14 Swansea 5 1 2 2 3-5 5 15 Wigan 5 1 2 2 4-7 5 16 Blackburn 5 1 1 3 7-10 4 17 Arsenal 5 1 1 3 6-14 4 18 Fulham 5 0 3 2 4-7 3 19 Bolton 5 1 0 4 8-13 3 20 West Bromwich 5 1 0 4 3-8 3 teir arga torres