mikudagur 11. apríl 2012síða 30

Mikudagur 11. apríl 2012 · Nr. 42 30 Sosialurin Hugskot og viðmerkingar – send sms til 225000 Ítróttur venjararnir um byrjanina Jógvan Martin Olsen Víkingur Steypakappingin: (vunnu 1-0 á B36) – Tað var ein javnur dystur, har vit vóru greitt betri í fyrra hálvleiki og teir betri partar av seinna hálvleiki. Yvir allan dystin meti eg, at vit vóru betra liðið. Vit góvu minni burt og høvdu fleiri møguleikar, hóast vit vórðu trýstir løtur í seinna hálvleiki. Teir vórðu tó sanniliga eisini trýstir í fyrra hálvleiki. Jú, eg eri væl nøgdur, sigur Jógvan Martin Olsen. Landskappingin: (níggju stig eftir tríggjar dystir) – Tað hava verið tættir dystir. Fyrsti dystur var á Tvøroyri, har TB gav góða móstøðu í fyrra hálvleiki og blivu betri sum dysturin leið. Kanska vóru vit hepnir, men vit góvu minni burt og skaptu nógv sjálvir. Á heimavølli spælir B68 upp við okkum, men teir koma ikki til nógv. Tað sama var galdandi ímóti EB/Streymi; teir koma til møguleikar í byrjanini, men vit vóru betri yvir 90 minuttir. So allar dystirnir hava verið tættir og spennandi, vísir Jógvan Martin á áðrenn vit spyrja hann, um teir hugsa um at binda um í verjuni, nú teir bara hava latið eitt mál ígjøgnum í fýra dystum. – Um vit taka dystin ímóti EB/Streymi, so eru vit fullkomiliga spælstýrandi og tað sama ímóti B36. Eg vil ikki verjukendir, heldur tvørturímóti. Vit hava tveir álopssinnaðir bakkar, sum hava virkað sum vongleikarar, sigur succés-venjarin hjá Víkingi. Sigfríður S. Clementsen HB Steypakappingin: (vunnu 3-1 á TB) – Vit eru sjálvandi væl nøgdir, sigur Sigfríður og vísir á nøkur ting, ið serliga rigga væl. – Tað er hugburðurin og tað, at vit hava bóltin og spæla fótbólt. Tað er meiri samanhangur í tí heila, heldur hann. Landskappingini: (sjey stig eftir tríggjar dystir) – Vit hava havt eina góða byrjan og víst góðar taktir, hetta væl vitandi um at vit fáa truplari uppgávur frameftir, enn vit hava havt higartil. Nógv ting rigga í mun til fjør. Hugburðurin hevur verið góður og vit hava fingið teir leikararnar afturat, sum vit høvdu brúk fyri. Vit hava verið rímiliga skaðafríir higartil og samanumtikið sær tað skilabetri út enn í fjør. Vit hava havt profilar úti einkultar dystir, men teir, sum koma inn, hava gjørt tað gott, sigur Sigfríður S. Clementsen. Flemming Christensen ÍF Steypakappingin: (taptu 2-4 ímóti EB/Streymi) – Vit taptu 2-4, so eg eri ikki serliga væl nøgdur, men soleiðis er tað. EB/Streymur eru sterkir í steypakappingini, og tað kendi eg á teimum. Vit vildu gjarna vinna dystin, men eg mátti eisini taka fyrilit fyri, at vit hava spælt nógvar dystir innan stutta tíð. Nú kunnu vit so venda eyguni ímóti Effodeildini, og tað er positivt. Landskappingin: (sjey stig eftir tríggjar dystir) – Sjálvandi eri eg nøgdur. Sera væl nøgdur, enntá. Vit hava fingið stig á fleiri ymiskar mátar og hava verið konsentreraðir. Vit byrja við at gera eitt comeback, og tað gevur moral. Næsta dystin vinna vit klárt og í triðja dystinum eru vit klárt betri enn B36. Vit vóru yvirlegnir og burdu vunnið stórt, men megna so bara at javna í yvirtíðini. Men samaumtikið eri eg sera væl nøgdur, sigur Flemming Christensen. Hann metir tað vera ilt at spáða um góða gongdin fer at halda fram, men hann veit, hvat tað krevur. – Tað er ilt at siga. Liðini kenna hvønn annan væl, og vit skulu vera klárir til hvønn einasta dyst. Í steypakappingini gjørdu vit trý mistøk og tapa so 2-4. Í Føroyum spæla liðini í stóran mun uppá at revsa mistøk, vísir danin á. Mikkjal Thomassen B36 Steypakappingin: (taptu 0-1 ímóti Víkingi) – Vit vistu, at tað í steypakappingini fór at verða 50/50. Vit høvdu gott tak á teimum í fjør. Nú høvdu teir heimavøll og vit høvdu kanska størri kjansir, men alt í alt 50/50. Úrslitið er ikki nakað, vit gráta um. Tað eru eisini positiv ting við ikki at koma langt í steypakappingini, tað sóu vit jú í fjør. Vit gjørdu okkara besta, men tað fall ikki til okkara fyrimun. Vit gjørdu greitt undan kappingarárinum, at steypakappingin avgjørt hevði lægstu raðfesting, sigur meistara-venjarin. Landskappingin: (sjey stig eftir tríggjar dystir) – Vit eru væl nøgdir við kappingarbyrjanina. Sjey stig fyri tríggjar dystir er gott samasvarandi við átta stig fyri fýra dystir í fjør. Tilgongdin hevur verið góð, men týðandi leikarar hava verið skaddir. Jákup á Borg, Høgni Eysturoy, Ingi Højsted eru skaddir og eisini Atli Danielsen hevur havt trupulleikar við rygginum. Vit eru optimistiskir og gerast sterkari sum apríl- mánaði líður, sigur Mikkjal Thomassen. Kári Reynheim NSÍ Steypakappingin: (taptu 2-4 ímóti KÍ) – Eg eri ikki nøgdur við tapið og at lata fýra mál inn. Seinastu fimtan minuttirnar av fyrra hálvleiki vóru øgiliga góðir, men annars ikki. Vit eru í so slappir í seinna bóltinum – bóltunum, sum eingin eigur, sigur Kári stutt um dystin. Landskappingin: (fýra stig eftir tríggjar dystir) – Vit hava gjørt tað gott. Vit hava verið væl skipaðir. Liðini, vit hava spælt ímóti, hava ikki skapt nógv, tó at vit sjálvir hava verið óneyvir tá ið tað ræður um at skjóta mál. Í verjupartinum hevur riggað heilt væl í mun til spælið á hinari hálvuni, tó at vit síggja stóra framgongd, sigur Kári Reynheim.