mikudagur 18. juli 2012síða 31

31 Mikudagur 18. juli 2012 · Nr. 82 Sosialurin Hugskot og viðmerkingar – send sms til 225000 Tað er tú, sum tekur endaliga avgerð um tína útbúgving, men nú kanst tú fáa svar upp á spurningar um lestur her í Sosialinum. Holger Arnbjerg, sum starvast á Altjóða Skrivstovuni, og Bjørg Róin, lærari á Føorya Studentaskúla í Hoydølum, vegleiða teg um tínar møguleikar innan útbúgving og um tey fíggjarligu viðurskiftini. Holger og Bjørg arbeiða dagliga við at vegleiða fólki, sum ætla sær undir útbúgving í Føroyum ella uttanlands, antin tað er styttri ella longri útbúgving, verklig ella ástøðilig. Tú kanst senda spurningar um útbúgvingar til post@sosialurin. fo, og so svara Holger og Bjørg tær her í Sosialinum. Á hvørjum ári fara hundratals føroyskar pisur undir víðari lestur, bæði í Føroyum og uttanlands. Hetta er ein sera spenn­andi tíð, ið krevur nógva fyrireiking, og sum eisini hevur nógvar spurningar við sær. Tí skipa Eik, MFS (Meginfelag Før­ oyskra Studenta) og ASK (Altjóða Skriv­ stovan) fyri Pisudøgum á hvørjum ári. Í ár verður eisini høvi at hitta umboð fyri Ráðgevingina fyri føroyingar í Danmark. Tiltakið er ætlað tær, ið fer undir víðari lestur uttanlands, og endamálið er at geva tær høvi at seta spurningar, fáa góð ráð og tosa við onnur, ið eru í somu støðu sum tú, soleiðis at tú kemur so væl frá byrjan sum gjørligt. Pisudagar 2012 Mikukvøldið 1. august kl. 19.30 – á deildini hjá Eik í Klaksvík Hóskvøldið 2. august kl. 19.30 – á Ungdómsdeildini hjá Eik í miðbýnum í Havn Fríggjakvøldið 3. august kl. 18.30 – á Miðnámsskúlanum í Suðuroy Skrá • Holger Arnbjerg, ið hevur drúgvar royndir við at vegleiða, fer at greiða frá, hvussu tú kanst brúka ASK í sambandi við hægri lesnað – bæði áðrenn og aftaná at tú ert farin í gongd. Harafturat hevur hann nógv góð ráð um, hvussu tú kemur væl frá lestrarbyrjan • Umboð fyri Eik geva tær góð ráð um fíggjarlig viðurskifti, m.a. hvussu tú stovnar eina NemKontu og týdningin av at leggja eina góða fíggjarætlan • Umboð fyri MFS greiða frá praktiskum viðurskiftum og hvussu tú sum lesandi kanst fáa gleði av MFS. Eisini verður høvi at práta við MFS-umboð úr ymsum londum • Randi Johannesen, ið dagliga ráðgevur føroyingum í Danmark, gevur tær góð ráð um m.a. skattafrádrátt, ferðaískoyti, lestrarstuðul og bústaðarviðurskifti • Aftaná framløgurnar verða luttakararnir bólkaðir, alt eftir hvar tey fara at lesa. Í bólkunum verður høvi at tosa við onnur ung, ið eru/fara uttanlands í lestrarørindum og seta nærri spurningar til ASK, MFS, Eik og Ráðgevingina fyri føroyingar í Danmark • At enda verður møguleiki at “mingla” og fáa sær okkurt leskiligt til góman. EIK – MFS - ASK Pisudagar 2012 ERT TÚ KOMIN INN Á EINA ÚTBÚGVING Í ÚTLANDINUM? HYGG HER! Spurnarsíðan Spyr og fá svar um útbúgvingar. Allar. Allastaðni. Hey Holger + Bjørg! Eg havi søkt til Markedsføringsøkonomi í DK. Nú leiti eg mær eftir ráðgeving, hvussu og hvat eg skal gera fyri at fáa SU og alt, har til hoyrir. Eg seti tað upp í punktum: • Hvat skal eg gera fyri at fáa SU • Hvussu fái eg mær danskt CPR-nummar • Er tað neyðugt at flyta meg til danskan banka Vónandi fært tú svara mær hesum. Vh. W Hey W Tú skalt ikki søkja um SU, fyrr enn tú ert komin inn á eina útbúgving og í mesta lagi ein mánað fyri útbúgvingar­ byrjanina – til dømis 1. august, um tú byrjar 1. september. Tá ið tú flytur til Danmarkar, skalt tú beinanvegin fara til kommununa fyri at fáa eitt danskt cpr. nr., sum verður sent til tína donsku adressu innan 8-10 dagar. Síðani skalt tú fara á Borgerservice skrivstovuna og fáa tær Nem-ID (digitala undirskrift), sum tú kanst brúka at søkja um SU ígjøgnum “Min-SU” á heimasíðuni hjá www.su.dk Tú skalt minnast til at geva bankanum hjá tær – gjarna einum føroyskum banka – boð um, at tú hevur eitt cpr. nr., so at tú kanst fáa tær eina Nemkonto, har pengarnir frá SU verða sendir. Tær nýtist ikki at skifta banka, men kanst brúka ein føroyskan banka og fáa SU-pengarnar settar inn á tína Nem-konto, og tú kanst saktans brúka eina konto, sum tú hevði frammanundan, um tú vilt tað. MFS og ASK hevur í byrjanini av august tiltak í samstarvi við Eik Banka, har øll praktisk viðurskifti av hesum slagi verða gjøgnumgingin. Tú kanst eisini lesa meira um hetta á www.radgevingin.dk ella á www.mfs.fo. Vónandi svarar hetta tínum spurningum.. Vh. Bjørg og Holger Góðan dagin Vónandi kunnu tit vegleiða meg. Eg varð student nú í summar og fekk eitt rímiliga gott prógv, men eg haldi ikki, at tað er nóg gott til, at eg kann sleppa inn á tað útbúgvingina, sum eg í nógv ár havi droymt um at sleppa inn á í Danmark. Hvat kann eg gera fyri at fáa ein møguleika at sleppa inn á mína ynskiútbúgving? Takk fyri xxx Svar til xxx Í Danmark kanst tú søkja inn gjøgnum antin kvotu 1 ella kvotu 2. Søkir tú ígjøgnum kvotu eitt, er tað bert miðaltalið á tínum prógvið, sum avger, um tú verður upptikin ella ikki. Ein kvotu 2 umsókn er samstundis eisini ein kvotu 1 umsókn. Søkir tú ígjøgnum kvotu 2, er tað miðaltalið og onnur viðurskifti, tað verður hugt eftir. Upptøka umvegis kvotu 2 er ein eyka møguleiki fyri tey, sum ikki kunnu sleppa inn gjøgnum kvotu 1. Útbúgvingarstovnarnir avgera, hvussu prosenttalið av teimum, sum verða upptikin gjøgnum kvotu 2, skal vera, og tað er ymiskt, hvussu hetta prosenttalið er, men nógva staðni sleppa bert 10% inn gjøgnum kvotu 2, so kappingin er hørð. Vit mæla til, at tú í góðari tíð setur teg í samband við ein lestrarvegleiðara á tí útbúgvingarstovni, har tú ynskir at sleppa inn, fyri at vita, hvat tey har leggja dent á í eina umsókn gjøgnum kvotu 2. Tað kann vera sera ymiskt, hvat teir ymisku útbúgvingarnir leggja dent á. Eisini kanst tú fara inn á heimasíðunum hjá útbúgvingarstovninum og har lesa um, hvat tey hyggja eftir í umsóknum gjøgnum kvotu 2. Vh. Bjørg og Holger