hósdagur 29. august 2013síða 43

nr. 99 · 30. august 2013 7 Nevnd burturúr Í komandi Summar útgávunum fara vit at hyggja nærri at børnum, sum eru nevnd burturúr. Vit fregnast um søgurnar handan serligu nøvnini, og hvørjar tankar foreldrini hava gjørt sær, áðrenn børnini fingu navn. Lesarar eru vælkomnir at senda inn uppskot um børn við serligum nøvnum – og søgum tengdar at nøvnunum – til post@sosialurin.fo Rannvá G. Fossaberg rannva@sosialurin.fo – Longu áðrenn triðja barnið hjá Honna og Tórheðin var borið í heim, høvdu tey avgjørt, at bleiv tað ein drongur, skuldi hann eita Dagur. - Navnið Dagur hevur ligið mær á hjarta í mong ár. Tað er ljómar lætt og hevur vakrar bendingarformar. Men av ymsum orsøkum fekk eldri sonurin ikki hetta navn. Navnið gjørdi regluliga vart við seg í mínum huga; tað líkasum skuldi nýtast, og maðurin fataði, at so var og gjørdist eisini glaður fyri navnið. So til hetta triðja barn okkara var ongantíð nakar ivi, greiðir Hanna Jensen frá, og heldur fram: - Sum heild hava vit verið upptikin av, at eitt navn skal skilja ein persón frá øðrum, so at tað reint praktiskt ikki er nakar ivi um, hvør er hvør – tað er væl ein av grundunum fyri navnagávu. Tí hava vit áhuga fyri nøvnum, sum á onkran hátt hugtaka. Eldru børnini eru uppkallað, men har er tað eftirnavnið Tórheðinsson og Tórheðinsdóttir, sum skilja nøvnini frá, sigur Hanna Jensen. Fólk vóru ovfarin Tá familja og onnur hoyrdu navnið á dronginum, fingu Hanna og Tórheðin Jensen ymsar reaktiónir frá fólki. - Tey í familjuni vóru eitt sindur ovfarin, og tað hoyrdist, at hetta kendist teimum óvanligt, men flestu vóru opin, jalig og heilsaðu navninum vælkomnum, fortelur Hanna Jensen. Reaktiónin upp á navnið var ikki heilt tann sama frá øðrum fólkum. - Tað var sera ymiskt, men rættiliga mong úttryktu, at tey vóru hugtikin av navninum, og at tað var vakurt. Hesi hava beinanvegin vant seg við tað og við navnið og við at benda tað. Fleiri góvu tá og hava síðani givið til kennar, at tey høvdu umhugsað navnið til sín egna son, sigur Hanna Jensen. Snævurskygni í mun til navnagávu hava tey bæði foreldrini eisini merkt, tá tey hava sagt navnið á Degi. - ”Kann mann eita so?” ”Ella meinar tú tað? Tað er øgiligt tit eru spesiell” og ”Tú meinar Dávur?”. Eg havi enntá kjakast við fólk um navnið hjá barni mínum og um, hvat mann kann eita og ikki. Sjálv eri eg ómetaliga opin fyri kreativari navnagávu og fari fegin í kjak um hesi viðurskifti. Fyrstnevndur og einnevndur Navnið Dagur er kent og nýtt í øllum Norðanlondum uttan Danmark og Føroyum – og tó hevur tað verið nýtt nakað í Danmark fyrr og er kent sum millumnavn har. Eisini eru orðini Day og Tag nýtt sum nøvn í øðrum londum, í Føroyum hevur eingin fyrr itið Dagur, sum mann veit um. - Navnið er so fult av ljósi, vón og náði. Tað umboðar nýggja byrjan, virksemi, dagsverk, møguleikar – tann partin av samdøgrinum, har menniskja kann útinna nakað, seta í verk sínar dreymar frá morgni og til myrkrið og náttin fellur á. Tað var hesin vakurleiki, sum kom til mín fyrstu ferð eg hoyrdi hetta orð sum fólkanavn, sigur Hanna Jensen. Navnið hevur stóran týdning fyri Honnu og Tórheðin Jensen. - Navnið hevur sama týdning sum tað hevði, áðrenn yngsti sonurin varð føddur og sum tá vit góvu honum navnið beint eftir føðingina: Munurin er bert, at nú er tað hann, sum er Dagurin, ein ljós glæma í okkara lívi. - Sum heild hava vit verið upptikin av, at eitt navn skal skilja ein persón frá øðrum, so at tað reint praktiskt ikki er nakar ivi um, hvør er hvør – tað er væl ein av grundunum fyri navnagávu. Tí hava vit áhuga fyri nøvnum, sum á onkran hátt hugtaka. Tað sigur Hanna Jensen, sum er mamma Dag. Foreldur: Hanna og Tórheðin Jensen Bústaður: Norðragøta Dagur Dagur Tórheðinsson, 4 ár Navnið skal hugtaka