týsdagur 17. september 2013síða 14

september 2013 Sosialurin 2 Hondbóltur 2013-2014 Sjáldan man ein einstakur spælari hava havt so stóran týdning og so stóra ávirkan, sum Barbara Brauer hevur havt tað síni trý ár í Neistanum og føroyskum kvinnuhondbólti. Hon skjeyt eini 900 mál hesi trý árini og gjørdi sum oftast sera stóran mun, tí hon var sterk og hevði drúgvar royndir. – Einki er at ivast í, at Barbara lyfti Neistan eitt hakk longur upp, men nú er tað so, at vit skulu vísa, at vit klára okkum uttan hana. Fleiri siga, at vit ikki høvdu verið nakað síðsta ár, um vit ikki høvdu hana, men nú fáa vit so at síggja. Vit skulu so royna at fáa skotið hasi 250 málini, Barbara skjeyt, og ætla okkum í báðar finalurnar, sigur Kári Horn, sum annað árið á rað er venjari hjá Neistanum. Hetta er hansara barndómsfelag, men fyri at royna nakað nýtt, fór hann næstsíðsta kappingarár til Vágs, har tað bleiv til silvur í steypakappingini og bronsu í landskappingini fyrsta árið sum seniorvenjari. Í fjør var hann so venjari hjá Neistanum og megnaði at vinna tvey gullmerki. – Tað krevur sítt at vera venjari í einum so sigursvandum felag sum Neistanum. Síðsta vetur var tað eitt krav, at vit skuldu vinna gull í bæði lands- og steypakappingini, og í vetur er tað eisini eitt krav, at tvífalda gullið skal verjast, sigur Kári. – Eg skal nokk hava fleiri spælarar við, tí vit skulu hava størri breidd í spælið hjá okkum. Talan er um nøkulunda sama liðið, men onkrar ungar eru komnar aftrat, so vit eru til dystin fús. Vit vita, at tað er okkum, hini liðini fara at jagstra, og tað dámar mær bara væl, tí tað vísir, at tey hava virðing fyri okkum, um eg kann siga tað soleiðis. Annan spælistíl Kvinnurnar hjá Neistanum hava í síðstuni koyrt harðar venjingar fýra ferðir um vikuna, og tær hava vant eitt sindur øðrvísi enn undan síðsta kappingarári, tí umstøðurnar eru ikki heilt tær somu. – Vit fara helst at broyta spælistíl, tí tað er greitt, at vit skulu spæla upp á ein annan máta, tá Barbara ikki longur er har. Síðstu trý árini hava vit spælt øgiliga nógv fimm ímóti fimm, tí hini liðini mestsum altíð valdu at mansverja hana, so tí fyrireika vit okkum uppá, at tað kanska verður øðrvísi nú, sigur Kári Horn. – Men vit fáa at síggja, hvat hini gera, tí eg ivist ikki í, at hini fara at mansverja onkra aðra í staðin, men tað hava vit so eisini fyrireikað okkum uppá. Neistin er søguliga nógv mest vinnandi felag í kvinnuhondbóltinum, og síðani 1943 er tað blivið til heili 39 meistaraheiti. Síðstu trý árini hevur Neistin sitið á trúnuni, men tað var eftir einki at hava vunnið í 13 ár. – Nú vit aftur fara í gongd, so rokni eg við, at VÍF og Kyndil fara at verða tey, vit koma at kappast mest við. Men øll liðini hava styrkt seg, so kanska verður tað ein javnari kapping. Eg ímyndi mær nógvar avgerandi og javnar dystir hetta kappingarárið, sum verða avgjørdir í síðstu løtu, sigur Kári Horn. Ár1 uttan Brauer – Vit skulu nú vísa, at vit klára okkum uttan Barbaru Brauer, og ætlanin hjá okkum er so avgjørt at verja gull og koma í báðar finalurnar aftur, sigur venjarin hjá Neistanum, Kári Horn Málverjar Fríða Petersen Kristina D. Christensen Útispælarar Nicoleta Radu Hansen Eir M. Berg Súsanna P. Nólsoy Birita Jacobsen Jacklin Durhuus Rúna Wardum Eyðvør Á Dunga Birita Wardum Annika Thomsen Rakul Augustinussen Barbara N. Johannesen Halldis H. Johansen Marjun F. Danberg Kristianna Balle Súna Mørk Bára Hansen Gerda F. Heldarskarð Kristina Clementsen Venjari Kári Horn