hósdagur 19. september 2013síða 35

nr. 108 · 20. september 2013 7 Nevnd burturúr Í komandi Summar útgávunum fara vit at hyggja nærri at børnum, sum eru nevnd burturúr. Vit fregnast um søgurnar handan serligu nøvnini, og hvørjar tankar foreldrini hava gjørt sær, áðrenn børnini fingu navn. Lesarar eru vælkomnir at senda inn uppskot um børn við serligum nøvnum – og søgum tengdar at nøvnunum – til post@sosialurin.fo Rannvá G. Fossaberg rannva@sosialurin.fo - Fyri okkum hevur eitt barnanavn stóran týdning. Navnið og barnið, sum ber tað, renna jú saman og verða til eitt, bæði hjá barninum sjálvum og teimum, sum kenna barnið, sigur Jonhard Eliasen, pápi Treysta. Í sambandi við nøvini hjá børnunum, sum eru trý í tali, hava Jonhard Eliasen og Elin Holm valt ikki at kalla tey upp. - Í staðin hava vit roynt at funnið fram nýggj nøvn við at leita í ymsum norðurlendskum orða- og navnasøvnum. Fyri øll børn okkara hevur verið galdandi, at vit ikki hava havt skund við at navngeva. Ymist er, sum hevur havt týdning, men navnið skal helst siga okkurt um barnið, greiðir Jonhard Eliasen frá. Vóru í iva Tá yngsti sonurin skuldi hava navn, vóru tey bæði foreldrini eitt sindur í iva um navnið. - Vit noyddust at geva okkum góða tíð fyri at finna út av ‘temperamentinum’ hjá honum og síðan at finna okkurt, ið passaði. Eins og áður skrivaðu vit langan lista við nøvnum, sum vit hildu vera í lagi. Listin fevndi bæði um nøvn, sum longu funnust og nøvn, vit høvdu roynt at smíðað sjálvi, fortelur Jonhard Eliasen. Tey fóru síðani øvugta vegin við at minka um listan við at útiloka eitt navn fyri og annað eftir. - At enda stóð bert Treysti eftir á listanum. Hetta hildu vit hóskaði væl, tí hesin lítli var góður í sær og áhaldin, sigur Jonhard Eliasen og vísir á, at tey nærmastu í familjuni vóru glað fyri navnið. - Ommur og abbar og onnur av teim­um nærmastu tóku væl ímóti navnin­um og vóru ikki so bilsin. Tey høv­du longu við nøvnunum hjá stóra­beigg­ja­num og systrini hjá Treysta vant seg við óvanlig nøvn, sigur Jonhard Elia­sen, sum sipar til nøvnini Eiri og Leik, sum systkini hjá Treysta eita. - Fólk annars hildu eisini, at navnið var fitt, men tey spurdu kanska meira enn ta einu ferðina um navnið, tí tey ikki høvdu hoyrt hetta áður. Torført við serstøkum nøvnum Sum heild halda Jonhard Eliasen og Elin Holm, at fólk halda tað vera gott, at nýggj nøvn koma við í hóp­in av nøvnum, sum kunnu gev­ ast føroyskum børnum. Men tey vi­ta eisini, at tað ikki er so líkatil at geva børnum serstøk nøvn. - Her ynskir lóggávuvaldið, sum á so mongum øðrum økjum, at legg­ja seg út í privat viðurskifti. For­eld­ur hava í útgangsstøði ikki fræl­si at geva børnum sínum navn, tey sjálvi ynskja, greiðir Jonhard Elia­sen frá og heldur fram: - Í fyrsta umfari kunnu foreldur velja millum nøvn, sum longu eru á navnalistanum, sum víst verður til í navnalógini. Um navnið, tey ynskja, ikki finst á hesum lista, mugu foreldrini í gongd við kontórvaldið, sum umsitur navnalógina. Hetta fer fram eftir reglum, sum finnast í navnalóggávuni. Navnanevndin, sum varð stovnað við navnalógini, hevur í hesum føri stórt tulkingarvald, sigur Jonhard Eliasen, sum hevði ynskt, at tað var lættari at geva børnum serstøk nøvn. - Væl er skiljandi, at lóggávuvaldið ynskir, at børn ikki skulu fáa nøvn, sum verða teimum til ampa. Men vit halda, at lógin – ella umsitingin av henni - kundi verið meira liberal, enn hon er. Vit hava verið gjøgnum kvørnina 3 ferðir. Úrslitið av einu royndini vórðu vit ikki so fegin um. Hinar báðar gingu væl. - Navnið skal helst siga okkurt um barnið. Harafturat skal tað ikki vera ov langt og skal ljóða væl. Treysti hildu vit hóskaði væl, tí hesin lítli var góður í sær og áhaldin. Tað siga Jonhard Eliasen og Elin Holm, ið eru foreldur at seks ára gamla Treysta Foreldur: Elin Holm og Jonhard Eliasen Bústaður: Tórshavn Treysti Treysti Holm, 6 ár Navnið skal hóska til persónin