mánadagur 18. november 2013síða 23

23 Mánadagur 18. november 2013 · Nr. 133 Sosialurin Hugskot og viðmerkingar – send sms til 225000 Kæru ungu, evnaríku listafólk! Setanarrøða til Ung í Føroyum 2013 Helena Dam á Neystabø forkvinna í Mentanarnevnd Tórshavnar Býráðs Ung í Føroyum er ungdómslista­ stevna fyri øll ung í Føroyum millum 13 og 19 ár. Her sleppur tú at vísa tíni egnu avrik fram fyri øðrum ungum, at vera við á listaverksmiðjum og framføra fyri almenninginum í Norðurlandahúsinum. Ung í Føroyum er staðið, har tit ungu siga, hvat ungdómsmentan er!! Tað er mær ein stórur heiður, at verða biðin um at seta stevnuna UNG Í FØROYUM. Fyri tað fyrsta, tí at tað er av størsta týdningi at skapa bestu karmarnar um føroyska ungdómsmentan, og fyri tað næsta, tí at tað er ungdómurin sum til allar tíðir hevur myndað tann samfelagsliga, listarliga og mentanarliga framburð, sum flytur samfeløg og lond framá. Tit eiga framtíðina Tað eru tit ungu, ið eru framtíðin og sum skapa framtíðina. Eg vóni at vit eru samd um, at mentan og list er týðandi partur av tí samleika, sum tit ungu fara at skapa um framtíð Føroya. Alheimurin er komin nærri, og tit ungu eru fyrst at taka nýggj rák til tykkara og eisini at skapa nýggj rák. Eg ivist ong løtu í, at tað sum tit fara at arbeiða við í ymsu Ung í Føroyum-verkstovunum júst fer at snúgva seg um at tvinna tykkara hugaheim saman við teimum altjóða rákum, sum er ein so stórur partur av gerandisdegi tykkara, umvegis samskiftistøkni og sosialar miðlar, sum fylla at kalla hvørja løtu í gerandisdegi tykkara. Endamálið er at fáa ungdómsmentan at blóma Vit eru øll samlað til hesa stevnuna við tí endamáli, at fáa føroyska ungdómsmentan og list fram í ljósið, og at fáa hesa at blóma. UNG Í FØROYUM er eitt høvi hjá tykkum ungu at fáa eitt veruligt innlit í listaligt arbeiði. Tit arbeiða í “verksmiðjum” og hava “verksmiðjuleiðarar”, ið eru yrkis­listafólk. Hesi kunnu vegleiða tykkum og hjálpa tykkum at gera hugskot til veruleika. – bert hugflogið setur mørk. 10 % talent og 90 % hart arbeiði Kanska fara tit eisini at ásanna, at talentið er bara ein lítil procent­ partur av tí sum krevst, um man veruliga vil gera seg galdandi á lista- og mentanarpalli Føroya. Onkur sigur 10 % talent og 90 % hart arbeiði, er tað sum krevst. Ung í Føroyum hevur 12 ár á baki her í Norðurlandahúsinum – og henda fantastiska traditión hevur haft stóran týdning fyri mong ung – sum nú er vorðin eldri. Ein kvinna, sum seinni hevur arbeitt sum stórasystkin í verk­ ætlanini, sigur nakað soleiðis um týdningin Ung í Føroyum hevur haft í hennara lívi: ”Fyri skjótt 10 árum síðan var eg til mína fyrstu Ung í Føroyum stevnu. Hetta var ein ótrúliga stór uppliving, sum síðani hevur givið mær nógvar møguleikar innan mentanarheimin. Eg fari nokk ikki heilt skeiv, um eg sigi, at Ung í Føroyum hevur lagt lunnar undir mína karrieru innan sjónleik, film og projektleiðslu. Í løtuni eri eg í ferð við at út­ búgva meg til dramaturg, og í út­ búgvingini hava mínar royndir bæði sum luttakari, stórasystkin, projekt­leiðari og seinast sum samskipari av felagssýningini, givið mær nógv. Serliga tá eg skal arbeiða við onkrum ástøðiligum, so kann eg seta tað í perspektiv við alt tað, sum eg havi eygleitt á teimum mongu Ung í Føroyum stevnunum”. Latið upp eygu og oyru So góðu tit øll, latið eygu, oyru og allar sansir upp hesar dagar. Lurtið eftir tí íblástri sum kem­ur til tykkara, samstarvið og brúkið hvønn annan upp á tann góða mátan. Eg ivist ikki í, at tit koma at knýta vina- lista- og mentanar- sambond fyri lívið hetta langa vikuskiftið. Tøkk til Hedvig og Rakel At enda vil eg fegin takka Hedvig Kapnas Westerlund og Rakel Helms­dal fyri teirra ótroyttiliga innsats bæði at skapa og menna tiltakið Ung í Føroyum. Gjøgnum øll árini hava tit slóðað, skipað fyri og endurnýggjað listastevnuna Ung í Føroyum, sum hevur haft ómeta­ ligan týdning fyri so nógvar spírar á lista- og mentanarpalli okkara. Sum umboð fyri Tórshavnar Býráð og Mentanarnevndina, vil eg fegin takka tykkum báð­um hjartaliga, eins væl og Norður­landa­ húsinum, sum altíð hevur latið hurðarnar á víðan vegg fyri Ungum í Føroyum. Vóni at tit framhaldandi fara at halda lív í “teimum ungu í Føroyum”. - Tey eru eftir øllum at døma við at blíva ein mangulvøra – í Føroyum. Tórshavnar Býráð vil fegin stuðla undir øll tiltøk, sum kunnu menna karmar og trivnað fyri ungdómi bæði í Føroyum og í Tórshavnar Kommunu Eisini ein hjartans tøkk til tykkum verkstovuleiðarar. Eg veit at tit leggja nógva orku í, at ung­ dómsstevnan verður so væleydnað sum møguligt – ár eftir ár. Gerið tykkum til reiðar! Og so til tykkum, sum vóru so heppin at sleppa at vera við til Ung í Føroyum 2013. Gerið tykkum til reiðar. Gerið tykkum ómak og drívið á. Tíðin flýgur avstað tá ið man fyrst er komin í gongd, og longu sunnudagin skulu tit á pall. Minnist til mentan og list er tað roknistykkið, har tvey pluss tvey ikki er fýra, men kanska fýra ferðir fýra. Men tað er upp til tykkum. Góðan arbeiðshug. Sosialurin 341800 fyrst og fremst www.in.fo