týsdagur 11. februar 2014síða 20

februar 2014 Sparkz, Sisters Point, MbyM, Pajar og Duffy- skógvar. Hesi eru merkini, sum Halla Gullfoss hevur vitjað og keypt frá til Events, meðan hon herfyri var á Copenhagen Fashion Week og keypti inn til 2014. – Eg havi ikki so nógvar leverandørar í Danmark, men hasi merkini eru væl umtókt millum kundar­nar í Events, og eg havi eisini keypt ymiskt inn til handilin frá hasum merkjunum, sigur Halla Gullfoss. Hon leggur seg eftir at keypa vørur, sum kunnu síggjast í handlinum longu nú í vár. – Pastellitir, hvítt og djóraprent er tað, sum verður nógv at síggja í mótamyndini 2014, sigur Halla Gullfoss og heldur fram: – Samanumtikið haldi eg, at stílurin, vit koma at síggja, er rættiliga avslappaður og kanska eisini eitt sindur sporty. Í Events fara vit framvegis at síggja nógv til sneakers, troyggjur, draktir og sett. Eitt must í garderobuni er okkurt hvítt. Vit fara at síggja nógv hvítt í jakkum, buksum og toppum, greiðir Halla Gullfoss frá. Í sama viðfangi sum Halla Gullfoss var á Copen­hagen Fashion Week, fór hon til London at keypa pløgg til handilin. – Mær dámar væl at klæðini hava onkrar litir, nýggj mynstur og samansetingar, soleiðis at tað er eitt sindur stuttligt og funky, sigur Halla Gullfoss. Henni dámar serliga væl, at merkini í London leggja seg eftir at hyggja eftir tí, sum stóru mótahúsini gera. – Í London duga tey væl at fáa íblástur frá til dømis Burberry og Louis Voutton. Tey hyggja eftir, hvat er tann nýggjasta trendin hjá teimum, og síðani gera tey look a likes av hesum pløggunum. Sostatt kunnu øll ganga modernað klødd, uttan at tað skal kosta eina rúgvu, sigur Halla Gullfoss. Umframt klædnapløgg hevur Halla Gullfoss eisini keypt ymisk accessories, sum verða at síggja í Events um fáar vikur. – Vit fara framvegis at síggja tær heilt stóru, ógvusligu hálsketurnar. Eisini stórar hálsketur í nógvum ymiskum sterkum litum, sigur Halla Gullfoss og vísir á, at skógvarnir eisini spæla ein avgerandi leiklut í mótamyndini 2014. – Umframt ymisk sløg av sneakers fara vit eisini at síggja stuttar styvlar við onkrum frískum og festiligum detaljum á, sum pynta, sigur Halla Gullfoss. Pastellitir, hvítt og djóraprent Halla Gullfoss, sum eigur og rekur Events, hevur verið ikk einans verið á Copenhagen Fashion Week og keypt inn til 2014. – Umleið annað hvønn mánað eri eg í London og keypi inn til handilin, soleiðis at kundin eisini kann finna pløgg í Events, sum ikki eru at síggja í øllum hinum handlunum í Føroyum, sigur Halla Gullfoss