týsdagur 11. februar 2014síða 40

8 lestrarblaðið 2014 Lagt til rættis: Eydna Skaale Fylg dreyminum! ...ikki streyminum Hóast nógv teir flestu føroyingarnir, sum fara uttanlands at lesa, fara til Danmarkar, hava vit tó framúr góðar møguleikar at fara longri út í heim. Her hava vit hitt nøkur, sum hava fylgt dreyminum heldur enn streyminum Atli Petersen 28 ár Hvaðani ert tú? Frá Kambsdali Hvat lesur tú? Eri á fjórða ári og lesi “Bachelor with honours” innan “Business Studies with Marketing”. Hvar lesur tú? Á Edinburgh Napier University í Skotlandi. Hvussu kanst tú lýsa skúlan/ undirvísingina? Ein skúli, sum dugir sera væl at gera næmingar klárar til arbeiðsmarknaðin. T.d. er triðja árið í mínari útbúgving lagt til rættis soleiðis, at man skal í starvsvenjing í 48 vikur. Eg var sjálvur á marknaðardeildini á Føroya Tele í Tórshavn. Hetta førdi til, at eg betur dugdi at sameina teori við praksis. Annars er undirvísingin fyri mína linju vanliga skipað soleiðis, at man hevur trý fak hvørt hálvár, har tað eru tveir tímar av fyrilestri og tveir tímar í flokshøli hvørja viku fyri hvørt fak. Hvussu kanst tú lýsa lestrarlívið? Mær dámar tað sera væl. Karmarnir til at gera skúlating eru góðir, og skúlin, sum hevur 18.000 næmingar, hevur nógv at bjóða. T.d. kann man melda seg til sokallað societies, sum eru ymiskir áhugabólkar m.a. eru tað ymisk ítrótta-societies og enntá eitt whisky society. Sjálvur eri eg vorðin kassameistari í “the marketing society”, sum jú er studierelevant fyri meg. Fyrimunir við at lesa har tú ert? Edinburgh er ein sera flottur býur við nógvum grønum økjum. Tað eru nógv útlendsk lesandi í býnum, og av tí at so fáir føroyingar eru her, kemur man at møta nýggjum fólki frá ymiskum londum. Býurin er sera studentavinarligur og hevur eisini nógv at bjóða uppá, so trupulleikin er at finna ta røttu javnvágina ímillum lesing og tað sosiala. Ein annar fyrimunur er, at man veruliga fær enska málið uppá pláss. Vansar við at lesa har tú ert? Í byrjanini kann tað tykjast eitt sindur einsligt, tí her ikki eru so nógvir føroyingar, men tað venur ein seg skjótt við og lætt er at møta nýggjum fólki, tí tað eru fleiri, sum eru í somu støðu, sum tú. Hvussu er við málsligum trupulleikum? Tá eg fyrstu ferð kom til Edinburgh, helt eg, at eg dugdi nøkunlunda at tosa tað enska málið, men tað vísti seg at vera nakað, sum eg veruliga mátti arbeiða uppá. Nú meti eg tað ikki at vera nakran trupulleika. Hvussu eru arbeiðsmøguleikarnir í Føroyum við tíni útbúgving? Teir meti eg vera góðar. Universitetið, sum eg gangi á, hevur hagtøl yvir, at uml. 93 % av teimum, sum hava lisið á har, hava fingið arbeiði innanfyri sítt øki, seinast hálvt ár eftir, at skúlin er lokin. Skriva til mín og spyr um lesnaðin á: atlip@hotmail.com ella ígjøgnum Facebook Heimasíðan hjá undirvísingarstovninum: www.napier.ac.uk Súsanna Jógvansdóttir Christiansen 27 ár Hvaðani ert tú? Tórshavn Hvat hevur tú lisið/lesur tú? Lesi í løtuni Master of Political Science in Security and Diplomacy Hvar hevur tú lisið/lesur tú? . Lesi í løtuni á Tel Aviv University í Ísrael. Las politikk á University of Glasgow, áðrenn eg kom her Hvussu kanst tú lýsa skúlan/ undirvísingina? Universitetsumhvørvið her er minni formelt enn til dømis í Bretlandi, har eg las áður. Undirvísararnir og arbeiðsfólkini á stovninum eru løtt atkomulig og hjálpsom, eisini tá tað kemur til praktisk viðurskifti, sum ikki beinleiðis hava nakað við lesturin at gera. Undirvísingin er á enskum. Vit hava mest teoretisk fak. Tó, fyri at seta vitanina, vit fáa, í samband við verulig viðurskifti, fara vit eisini nógvar útferðir runt í landinum, har onkur álop hava verið, og eisini møta við reguliga sendiharrum, sum arbeiða her í Miðeystri. Hvussu kanst tú lýsa lestrarlívið? Umhvørvið er sera altjóða. Her eru næmingafeløg, sum skipa fyri útferðum og veitslum, og har tey leggja dent á, at útlendsku næmingarnir eisini koma at kenna ísraelar. So tað er lætt at koma í samband við onnur lesandi. Fyrimunir við at lesa har tú ert? Eg eri ‘har tað sker’, tá tað kemur til altjóða politikk. Í staðin fyri at lesa um kreppur í Miðeystri á einum høgt rankaðum universiteti í t.d. London, læra vit tað sama her, men fara vit eisini til støðini har t.d. okkurt kríggj byrjaði. Tað gevur eina veruligari hóming av, hvussu kreppur kunnu fara fram og eitt breiðari perspektiv fyri at skilja altjóða ósemjur. Eisini haldi eg, at tað er ein fyrimunur at hava lisið á ymsum lestrarstovnum, tí allir stovnar hava ymsar mannagongdir, men tað ger, at ein hevur nógv lættari við at tillaga seg. Veðrið og strendurnar í Tel Aviv eru sjálvandi eisini ein týðandi fyrimunur við at lesa her. Vansar við at lesa har tú ert? Tað er dýrt at vera her, nøkunlunda líka dýrt sum í Føroyum, bæði leiga og vørur. Stuðulin frá SU og ÚSUN røkka heldur ikki til alt skúlagjaldið. Hvussu er við málsligum trupulleikum? Færri ísraelar, enn eg hevði væntað, tosa enskt, so onkuntíð kann tað vera ein avbjóðing, men tey eru sum oftast hjálpsom. At keypa inn kann eisini vera ein avbjóðing. Vørurnar eru verri enn so altíð merktar við enskum. Til dømis fann eg útav, at eg hevði brúkt hárbalsam sum kropskrem tveir teir fyrstu mánaðirnar, eftir at eg kom higar, og tá var dunkurin næstan tómur. Men alt hetta er enn ein sjarmerandi uppliving sum fylgir við tí at koma til eitt nýtt stað. Hvussu eru arbeiðsmøguleikarnir í Føroyum við tíni útbúgving? Trygdarparturin, sum vit lesa um her á stovninum, er ikki altíð so lættur at seta í samband við føroysk viðurskifti, men restin er meiri viðkomandi vitan, so vónandi eru teir góðir. Skriva til mín og spyr um lesnaðin á: susanna_j_c@hotmail.com Heimasíðan hjá undirvísingar­ stovninum: http://english.tau.ac.il/ Heimasíðan hjá hesari útbúgvingini: http://socsci.tau.ac.il/ sec-dip/ Heimasíðan hjá skúlanum: www.swansea.ac.uk