hósdagur 4. september 2014síða 32

8 Mentanarblaðið hjá Miðlahúsinum 5 • 5. september 2014 LISTA­ HEIMUR TEIRRA Jón Sonni Jensen, listamaður tór og spennandi framstig eru at hóma á tí unga føroyska listapallinum í løtuni. Men hetta eru í veruleikanum onki nýtt. Tað núverandi unga ættarliðið hevur verið virkið í longri tíð, og nýggj ung leggjast alsamt og sterkt avtrat. Tó sýnast nógv av okkum føroyingum ikki at vera varug við hetta, og undrast má tí, hví so er. Hugsast kann at hetta er orsakað av einum manglandi varping í miðlunum av júst hesum unga og evnaríka skarinum. Hugsast kann eisini at tað bert ongin áhugi er fyri teimum, men soleiðis burdi tað ikki verið og lovandi broytingar eru á sjónarringinum, sum benda á at tey ungu veruliga koma at taðka meir og meir fram komandi árini. Tá hugsað verður um hvat er at hoyra og lesa um tann listarliga heimin í landinum, so hoyra vit almikið um framsýningar og framførðslur hjá teimum somu stóru føroysku listafólkunum sum leingi hava verið at hoyrt um, og hvussu nýggj spennandi tiltøk eru at uppliva í teimum somu støðunum, so sum í Norðurlandahúsinum og Listaskálanum. Men óvitandi fyri tey flestu, so hendir ein ørgrynna av øðrum tingum eisini. Ting sum uppá allar hættir sýna eina nýggja síðu av list. Ein nýggjan hátt at síggja heimin og Føroyar, og lívið sum heild. Og tað er áhugavert! Tí er tað harmiligt at meir ljós ikki verður varpað á tey ungu. Eg fari tí at greiða eitt sindur frá um heim teirra. Hvussu, hvar og hví hann virkar. Og samstundis hví tað er av týdningi at vit øll burdu vita um hann. TEY UNGU FÁA ÍBLÁSTUR FRÁ HVØRJUM ØÐRUM Tað unga listarliga umhvørvið er eitt sera skapandi og spyrjandi umhvørvi. Hetta eru einstaklingar og bólkar, sum leita sær nýggjar leiðir í sínum útláti, og hetta sýnist at vera ein serstakliga tilvitað leitan, fyri at kunna taka føroysku listina eitt stig longri inn í nútíðina og framtíðina. Men hetta er ikki bert eitt søkjandi stig, sum skal vísa føroyingum hvussu ein eisini kann avmynda og umboða Føroyar, men ein stremban eftir at vísa øllum heiminum hvussu vit føroyingar kunnu lýsa og umboða hann frá einum føroyskum sjónarmiði. Og tað er júst hetta íðna útlátið sum ger tey ungu so søkjandi og opin fyri øllum. Undirritaði kann sjálvur játta hvussu lætt og vælkomandi tað kann vera at vera ein partur av hesi fjøldini. Hetta eru ikki fólk ið brýggja seg um at prógva eitt elitert sinnalag. Hetta eru heldur einstaklingar, sum við opnum og forvitnum ørmum taka ímóti øðrum einstaklingum, sum vilja royna seg. Tí tey ungu fáa nemliga íblástur frá hvørjum øðrum og eru ótrúliga hugaði at hjálpa hvørjum øðrum við at finna leiðina fram, soleiðis at ein og hvør kann finna sína serligu rødd í eini verð har tey vita, at júst hetta kann vera ógvuliga torført. Og hetta hjálpandi andarúmið kenst serliga í teimum støðunum har tey ungu hittast og samskifta. ANDARÚM Í SIRKUS Eitt av hesum støðunum er Sirkus Föroyar niðri í Vágsbotni í Havn. Sirkus Föroyar lat upp í 2009 og stigtakarin til hetta var Sunneva Háberg Eysturstein, sum vit eisini kenna frá útvarpi og G! festivalinum. Sirkus átakið var nakað sum birtist í Íslandi, og aftaná sítt uppihald har, gjørdi Sunneva av at stovnað eina ‘deild’ her í Føroyum. Bæði her á landi og í Íslandi hevur Sirkus átakið verið so væl umtókt at tað skapti veruligan áhuga uttanlanda. Tað eina árið var hetta íslendska konseptið enntá temabarrin á árligu tignaðarligu Frieze listamessuni í London. Sirkus í Íslandi lat tó dyrnar aftur í 2007 og tann føroyska deildin er sostatt tann einasta ið stendur eftir. Turkis littur veggur, sprøklut tapet, kopar diskur, stølpar við leopardmynstri, eitt hav av plast blómum, ein ørgynna av pappírsklippum og list á veggunum, figurar á hyllunum og jólaperur ið hanga árið runt. Ásannast má at Sirkus er eitt heilt serstakt stað. Eitt stað har okkurt er til øll. Um tær dámar myndlist, tónleik, sniðgeving, ófrávíkiligan hugna ella bara eina øl. Tù kanst vera vísur í at tú nokk skalt finna okkurt av hesum tingunum í Sirkus. Av tí at hendan hugaliga kafé og barrin í hugnaliga Vágsbotni húsar so mongum, so eru tað eisini nógv ymisk fólkasløg í koma har. Og serstakliga kenni eg meg vísan í at siga, at fleiri teirra eru listafólk frá øllum økjum. Hetta er jú eitt sjálvsagt stað sum titrar av íblástri og andarúmi. Sunneva H. Eysturstein hevur tilvita, líka síðan Sirkus opnaði, valt at inndraga listina sum ein livandi part av staðnum. Ung listafólk eru sloppin at myndprýða veggirnar frá fyrsta degi. Upprunaliga var ein veggjamálningur av søgnini um geitabukkarnar og trøllið sum livdi undir brúnni at síggja í fleiri ár í trappunum. Og onnur spennandi verk, av úrvaldum listafólkum, vóra at síggja á vesunum og økinum rundan um barrina. Nýliga fekk Sirkus so nýggj verk á veggirnar, her ímillum vóru tað listafólk so sum ungu S