hósdagur 26. november 2015síða 29

FRÍGGJADAGUR 27. NOVEMBER 2015 SOSIALURIN 137 29 Nýggja útgávan hjá Anniku Hoydal er afturlítandi og endurspeglar lívsleiðina hjá songkvinnuni, ið hevur verið virkin við tónleiki í meira enn eina hálva øld SIGURJÓN EINARSON A nnika Hoydal gjørdist 70 ár herfyri, og í tí sam­ bandi gav hon nýggja útgávu út, ið nevnist »Endurljós«. Hetta er 15. útgávan hjá Anniku – ið av sonnum hevur ríkað før­oyskan tónleik, og er blivin eitt slag av tjóðardýrgripi fyri okkum øll – og er eitt samstarv millum hana og beiggjan, Gunnar Hoydal, sum hevur skrivað allar tekstirnar til løgini uttan tann eina, sum pápi hennara, Karsten Hoydal, hevur skrivað. Á útgávuni eru 12 føroyskir sangir, ið Jón McBirnie og Kaj Johannesen hava framleitt og er upptikin í Studio Bloch í Tórshavn. Í samrøðu við Kringvarpið hevur hon nevnt, at hon valdi at taka nýggju út­gávuna upp í Føroyum, tí veður­lagið og landslagið skuldi passa til hug­lagið, ið Jón McBirnie og Kaj Johanne­sen kundu fáa fram á útgávuni, einans við at hyggja eftir tekstunum. Og tað hevur riggað væl. Afturlítandi og endurspeglar lívs­ leiðina Útgávan er lívsfilosoferandi, men samstundis eisini afturlítandi. »Endurljós« er ein fjølbroytt, men heilt samanhangandi útgáva, har Kaj og Jón hava lagt gróðrarbotnin fyri føroyska huglagnum, har tankarnir leita aftur til kvæðini og skjaldrini – og sostatt eisini passar til røddina hjá Anniku, meðan aðrastaðni ljóðar útgávan sum eru vit við Miðalhavið, men tað hevur nú eisini sína orsøk. Tá útgávan nú endurspeglar sjálvan persónin, Anniku, so slepst ikki undan at hoyra, at hon hevur ferðast víða og búð m.a. í Suðuramerika í sínum barndómsárum, og hevur fingið ein serligan tokka til latínamerikanskar harmonikutónar og tangorútmur, ið hon hevur tikið við sær inn í tón­ leikin. Annika er kanska best kend fyri at vera tann stórorðaða og freka sangarinnan, sum, hóast hon kanska ikki vil kennast við tað sjálv, ímyndaði kvinnufrígeringina í sjeytiárunum, tá hon var virkin í Harkaliðnum, og eisini spældi leiklutir í donskum film­ um um sama evnið. Men sum song­ kvinna og sangskrivara hevur hon verið ein slóðari fyri føroyskan tón­ leik. Hon hevur altíð duga sera væl at upptraðka á palli, har hon brúkar síni sjónleikaraevnir at fram­bera søgur úr sangum, og tað hoyra vit eisini á nýggju útgávuni, har eyðkenda ljóðið hjá Anniku hoyrist. Løgini og útgávan Samstarvið millum Anniku og bróð­ urin, Gunnar Hoydal, er nakað heilt serligt. Tað er eitt høgt støði í hansara tekstum. Tað løgdu vit tíðliga til merk­is og serliga í sanginum »Aldan« ið fekk eitt heiðurligt 4. pláss í danska stórheiðurskappingini (Grand Prix) í 1979. Tølandi sangurin um alduna, ið kann tulkast ymiskar vegir, dugir hvørt mansbarn í Føroyum. Hendan fólka­ognin er við í »Endurljós« í nýggj­um hami, har lagið nú ferðast sum ein still alda, ið endurspeglar ein dýpd og margfeldi, sum ein alda hevur. Fjølbroytta útgávan hevur eisini endurtulkingar av eldri løgum, har Annika kemur við nýggjum tulk­ ingum av løgum, hon ikki helt vera tulkaðar rætt av tátíðar tónleikarum og fram­leiðarum. Úrskurðurin av nýggju tulkingunum, av gomlu løg­ unum, er við eitt sindur av bland­ að­um kenslum, men rigga væl í síni heild. Útgávan er eisini sera fjøl­ broytt á tann hátt, at vit hoyra bæði hugtungar sangir, ið hava eitt syrgið yvirbragd yvir sær, men so har vit mestsum eisini koma heilt upp at dansa av glaðum rútmum í øðrum sangum, sum nokk lýsir heilt væl lívsins viðurskifti, ið møtir okkum á vegnum. Eisini ber útgávan brá um takksemi, har tað hoyrist á Anniku, at hon – við takksemi – lýtir aftur á lívið. Vit eru øll gávurík á ein ella annan hátt. Tað er okkara serrættindi og ævintýraferð at uppdaga okkara egna serstaka ljós. Annika hevur funnið sítt ljós og letur tað skyggja ígjøgnum yvir á okkum við at vera tann, hon er og altíð hevur verið: Sín egin! »Endurljós« er ein gjøgnumførd útgáva, ið er eitt klárt ljós í vetrar­ myrk­rinum, tí fær hon fýra skyggj­ andi stjørnur út av fimm. TÓNLEIKUR ANNIKA VEITIR TÓNLISTARLIG LJÓS Í VETRARMYRKRINUM ★★★★★ Ummæli