hósdagur 14. januar 2016síða 31

FRÍGGJADAGUR 15. JANUAR 2016 SOSIALURIN 6 31 Svenskarar skrivað sangin Sangurin Who Needs a Heart er ein klassisk Grand prix ballada við strúkarum, klavi og einum fangandi niðurlagi. Svensku Sara Ljunggren og Jonas Gladnikoff hava skrivað sangin, sum Kristel Lisberg skal syngja. Jonas Gladnikoff er ein royndur sangskrivari í Eurovision samanhangi. Hann hevur skrivað tríggjar sangir, sum hava umboðað Írlandi í Eurovision, og hann skrivaði eisini sangin Someday, sum íslendska Hera Bjørk sang í Eurovision í 2009. Ta ferðina endaði hon sum nummar 2 í altjóða kappingini. EYÐUN KLAKSTEIN Í meira enn seks vikur hevur Kristel Lisberg vitað, at hon skal verða við í danska Grand Prixnum í ár. Europeiska sangkappingin, sum byrjar við innleiðandi kappingunum í teimum ymsu londunum, er væl umtókt tiltak, sum á hvørjum ári dregur nógvar milliónir sjónvarpshyggjarar, og fyri nógvar sangarar er kappingin ein góður møguleiki at gera vart við seg. - Tað er sera spennandi at fáa møguleikan at vera við í Grand Prixnum, og tað hevur verið trupult at hava vitað tað í fleiri vikur og ikki kunnað sagt tað fyri nøkrum, sigur Kristel Lisberg. 26 ára gamla songkvinnan hevur verið frammi í føroyskum tónleiki, síðani hon var ung genta, og hon hevur áður roynt seg í X Factor kapping í Danmark. Seinastu árini hevur Kristel verið búsitandi niðri, og hósdagin avleveraði hon bechelorprojekt í sínari útbúgving sum optikari. Passar væl til mín Kristel Lisberg skal syngja balladuna Who Needs A Heart, sum Sara Ljunggren og Jonas Gladnikoff hava skrivað. Sangurin var valdur millum teir túsund, sum blivu sendir inn til í donsku kappingini í ár. - Eg bleiv spurd, um eg vildi koma at royna at syngja ein sang til Grand Prixið, og tað helt eg var spennandi. Eg royndi ein sang, og síðani varð eg biðin um at syngja ein annan. Tað var ikki fyrr enn triðju ferð, at eg ordiliga merkti, at sangurin lá væl til mín, sigur Kristel Lisberg. Sangskrivararnir og framleið- arar vóru við í valinum av sang- arum til teir ymsu sangirnar, og tað var orsakað av X Factor kappingini, at onkur teirra hevði Kristel í huga. Tá ið sangurin Who Needs A Heart varð valdur til Grand Prixið, var eingin sangari ásettur at syngja sangin, og tey høvdu havt fleiri kvinnuligar sangarar í studio at royna sangin, men tað var Kristel Lisberg, sum fekk kjansin. – Sangurin er ein flott ballada, har eg kann brúka mína rødd og veruliga kann syngja sangin ígjøgnum. Tað passar væl til mín og mína rødd, og eg haldi, at tey avgjørdu beinanvegin, at eg skuldi syngja sangin, tá ið eg hevði roynt at syngja hann, sigur Kristel. – Hinir sanginir vóru eitt sindur lívligari poppsangir, og tað passaði ikki so væl til mín. Hetta er veruliga ein sangur, sum eg kann taka til mín og leggja kenslur í, sigur hon. Tað størsta Melodi Grand Prix er eitt stórt show í Danmark, og sera nógv verður gjørt burtur úr sjónvarps- framleiðsluni í sambandi við kappingina. Vanliga hyggja umleið tvær milliónir fólk eftir kappingini, sum í ár verður hildin í Horsens tann 13. februar. 10 sangir fara tá at kappast um at sleppa við til europeisku kappingina, ið verður hildin í Svøríki. – Eg havi ikki roynt nakað so stórt áður, og eg eri upp á skift spent og nervøs til kappingina. Men eg eri í góðum hondum, tí nógv fólk stuðla og ráðgeva mær í kappingini. Eg kenni meg trygga, sigur Kristel Lisberg. – Fyri meg ræður tað um at hava fokus uppá sangin og framførsluna, tí eg vil fegin gera tað so gott, sum eg kann, og eg vil eisini njóta hesa upplivingina. Tí ætli eg mær at hugsa minni um, at hetta er ein kapping, og at eg skal vinna, hóast eg sjálvandi veit, at tað hevði verið ótrúliga stuttligt at sloppið víðari til kappingina í Svøríki. – Tað eru nógvir góðir sangir og dugnaligir sangarar við í kappingini, og tað kunnu verða smáting, sum avgera hvør vinnur Grand Prixið, tí veit eg væl, at samstundis sum eg havi ein kjans at vinna, hava hini eisini ein góðan kjans, og eg ælti mær at gera hetta til eina góða uppliving, líkamikið hvussu úrslitið verður. Fyri meg hevur tað størstan týdning, at eg havi eina góða framførslu í kappingini, sigur Kristel Lisberg. Eingin stjørna Kjansurin hjá Kristel Lisberg at luttaka í Grand Kristel kom óvart á, tí hon visti einki um sangin, fyrr enn hon var biðin um at syngja hann í Grand Prixnum. – Eg hevði ikki roknað við at fingið hendan møguleika, og hann kom mest sum burtur úr ongum, men kanska ber tað til at siga, at mín luttøka í X Factor hevur kastað hetta av sær. Ein av framleiðarunum kendu meg frá X Factor, og tað var tí, eg varð spurd um at syngja sangin, sigur Kristel Lisberg. Fýra ár eru liðin, síðani Kristel Lisberg royndi seg í X Factor kappingini í Danmark. Ta ferðina kom hon á skíggjan, men var ein av teimum, sum varð soldað frá, áðrenn liveshowini byrjaðu. – Eg kenni meg nógv betur fyri at verða við í einari kapping nú, enn tá eg var í X Factor. Eg eri meira vaksin og búgvin, og eg veit, hvat eg skal vænta mær. Tá ið eg hugsi um X Factor nú, haldi eg, at eg var í so naiiv og grøn, men síðani havi eg ment meg nógv bæði sum songkvinna og sum persónur, sigur Kristel Lisberg. – Eg veit betur, hvat hetta snýr seg um, og hvussu eg sjálv skal hugsa um kappingina. Eg eri fullgreið yvir, at sangararnir og sangirnir í kappingini eru góðir, og at tað ikki er nakað galið við mær sum songkvinnu, fyri tað um eg ikki vinni. – Eg ætli mær at gera tað besta, eg kann, og eg veit eisini, at eg skal ikki verða ein stjørna, bara tí eg eri við í Grand Prixnum. Tað skal hart og støðugt arbeiði til fyri at vinna fram innan tónleikin, sigur Kristel Lisberg. Góð móttøka Sangirnir til danska Grand Prixið komu av óvart út til almenningin sunnudagin. Eitt starvsfólk hjá Sony plátufelagnum gjørdi eitt mistak í talgiltu skrásetingini av sangunum, og alt í einum lógu sangirnir úti á Spotify. Danmarks Radio, sum skipar fyri Grand Prixnum, harmaðist mistakið, men framskundaði kunngerðingina av sangum og sangarum. Mikudagin vóru allir sangararnir savnaðir á tíðinda- fundi, og nú er full ferð sett á fyrireikingar og fjølmiðlaumrøðu. Treytirnir fyri sangirnir eru broyttar, so nú ber til at tráspæla sangirnar í radio í fleiri vikur áðrenn sjálva kappingina, og sangararnir hava enntá loyvi at syngja sangirnar live. – Sangurin hjá mær hevur fingið góða móttøku, síðani allir sangirnir komu fram, og eg haldi eisini sjálv, at hetta er góð ballada, sum kann standa seg væl í kappingini, sigur Kristel Lisberg. Ein partur av avgerðini um, hvør skal vinna danska Grand Prixið, er ein atkvøðugreiðsla, har hyggjararnir kunnu verða við – eisini hyggjarar í Føroyum. – Føroyingar plaga at verða spentir, tá ið føroyingar eru við í kappingum uttanlands, og eg vóni, at fólk vilja stuðla mær og eisini atkvøða fyri mær, tá ið kappingin verður. Eg eri jú eitt umboð fyri Føroyar, hóast eg luttaki í einari danskari kapping, sigur Kristel Lisberg.