týsdagur 22. mars 2016síða 20

Mikudagur 23. mars 2016 · Nr. 35 20 Sosialurin Ferðast Bjóða ferðir longri út í verð Nú verður lættari enn nakrantíð áður hjá føroyingum at pakka taskuna og seta kós móti nøkrum av teimum meira eksotisku støðunum kring heimin F erðaskrivstovan GreenGate Incoming fer nevniliga nú undir at selja ferðir til Kuba, Suðurafrika og Kilimanjaro. – Vit hava eina fatan av, at føroyingar eru farnir at ferðast til støð longur burtur, og tá er tað spennandi sum ferðaskrivstova at kunna bjóða okkurt annað enn tey vanligu ferðamálini í Miðjarðarhavinum. Her er møguleikin at sleppa longri út í verð, siga Fríðun Jacobsen, dagligur leiðari, og Marni Hjallnafoss, marknaðarleiðari, í GreenGate Incoming. Tey bæði dylja ikki fyri, at tað kanska serliga er Kuba, ið nógvir føroyingar kundu hugsa sær at vitja. – Hesar ferðirnar eru til støð, ið man hoyrir nógv um. Serliga Kuba er nógv frammi, nú amerikanski forsetin, Barack Obama, hevur verið á vitjan. Hetta er kanska eisini seinasti møguleikin hjá føroyingum at uppliva tað gamla Kuba, áðrenn tað verður broytt nú samhandil aftur er millum Kuba og USA. Sum navnið leggur upp til, so er GreenGate Incoming ein ferðaskrivstova, ið vanliga tekur sær av søluni av ferðum til Føroyar. – Tað er rætt, at tað vanliga er incoming, tað vil siga, at fáa ferðafólk til Føroya, ið er tað, ið vit gera mest burturúr, men vit hava altíð havt eitt sindur av outcoming, tað vil siga at selja ferðir til føroysk ferðafólk út í heim. Vit hava millum annað selt leigutúrar til fótbóltsdystir í Onglandi og aðrar serliga pakkatúrar, siga tey bæði. Fríðun Jacobsen og Marni Hjallnafoss meta tó ikki, at GreenGate Incoming við hesum ferð beinleiðis í kapping við hinar ferðaskrivstovurnar í Føroyum, tí vøran, ið tey bjóða, skilur seg frá restini. – Vit leggja okkum meira eftir nissjuferðum, har vit bjóða føroyingum serligar ferðir, meðan vit lata charterferðir til aðrar ferðaskrivstovur. Nýggju túrarnir verða gjørdir í samstarv við eina norska ferðaskrivstovu, ið skipar fyri fleiri slíkum ferðum hvørt ár. – Vit hava nógv samband við ferðaskrivstovur í øðrum londum, ið vit selja ferðir til. Av og á hava tey so eisini nøkur tilboð til okkara, og hesir túrarnir eru gjørdir í samstarv við ein av okkara samstarvsfelagum í Norra, ið skipar fyri fleiri slíkum túrum um árið, siga Fríðun Jacobsen og Marni Hjallnafoss. Pláss verður fyri umleið 20-30 fólkum á hvørjum túri, og ferðaleiðari á túrunum verður norska Marit Larsen, ið hevur drúgvar royndir sum ferðaleiðari til hesi støð. Skipað verður eisini fyri einum tiltaki á Hafnia 31. mars, har meira kunning fæst um túrarnar. Á GreenGate Incoming lova tey, at um undirtøkan er stór, so verða fleiri slíkir túrar í framtíðini. – Hetta er bara byrjanin. Um tað er stór undirtøka fyri hesum, so halda vit fram og víðka um tilboðið. Fyri fyrst ynskja vit tó at lodda dýpið, og vita um tað er undirtøka fyri slíkum ferðum millum føroyingar.