týsdagur 22. mars 2016síða 19

Keypa tollfrítt á netinum Síðani seinasta summar hevur Vága Floghavn bjóða ferðafólki, sum ferðast um flogvøllin í Vágum, møguleikan at bíleggja sær tollfríar vørur á netinum og so bara heinta vøruna, tá ið tú kemur í Vágar. K eyp tollfrítt á netinum og spar tíð. Hetta er eitt tilboð hjá Vága Floghavn til tey túsundtals ferðafólk, sum ferðast umvegis flogvøllin í Vágum. Í seinasta lagi klokkan 13 dagin fyri, at tú skalt ferðast um Vága Floghavn, fert tú inn á netið og bíleggur tær tollfríu vørur, ið tú ætlar at keypa, og so standa vørurnar klárar at heinta og gjalda fyri, tá ið tú kemur í Vágar. Fleiri og fleiri velja hesa loysn Jonny Muller er dagligur leiðari í Duty Free handlinum í Vága Floghavn, og hon sigur, at tænastan við at keypa tollfríar vørur á netinum fær alsamt størri undirtøku. – Vit byrjaðu við hesi tænastu seint síðsta summar, og tað er einki at ivast í, at hetta er nakað, sum fær størri og størri undirtøku millum tey ferðandi, sigur Jonny Muller. Hon greiðir frá, at serliga til jóla vóru tað rættiliga nógv ferðafólk, sum gjørdu sær dælt av tænastuni hjá flogvøllinum í Vágum. Enn eru tó nøkur viðurskifti, sum kunnu gerast enn betri í sambandi við nethandilin hjá Duty Free sambært leiðaranum í handlinum. – Tað ber tíverri ikki til enn at keypa við MasterCard í nethandlinum hjá okkum, og tað er ógvuliga harmiligt, tí tað eru rættiliga nógvir føroyingar, sum brúka MasterCard. Men hetta er nakað, sum vit arbeiða við í løtuni, og vit vóna, at tað ikki gongur ov long tíð, so ber eisini til at keypa við MasterCard í nethandlinum hjá okkum, sigur Jonny Muller. Serliga føroyingar keypa online Síðani tey í Vágum byrjaðu nethandilin hjá Duty Free seinasta summar, hava tey lagt til merkis, at tað serliga eru føroyingar, sum gera sær dælt av hesum møguleika. – Tað er heilt sikkurt føroyingar, ið fyrst og fremst brúka hendan møguleika. Og tænastan verður brúkt til at keypa allar møguligar vørur, bæði sjokulátu, drekkivørur, luktilsi, smyrsl og annað. Men tað verður ikki brúkt so nógv til at keypa gávulutr. Tað velja fólk flest at keypa, meðan tey eru í sjálvum handlinum, greiðir Jonny Muller frá. Sparir nógva tíð Tað er einki at ivast í, at hjá teimum, sum ferðast nógv og kanska hava skund, er nógv tíð at spara við at bíleggja tollfríu vørurnar á netinum. Tað er bara at fara yvir til serligan kassa í tollfría handlinum at heinta vøruna og so takka fyri seg. – Vit vita um fólk, sum hava gjørt eina roynd og tikið tíð fyri at síggja, hvussu long tíð gongur, frá tí tú kemur inn í tollfría økið, heintar vørurna, til tú stendur uttan fyri terminalin og hevur vøruna í hondini, og tað vísir seg, at hetta kann gerast uppá góðar tveir minuttir, sigur Jonny Muller. Hjá teimum, sum hava áhuga fyri at royna tænastuna hjá tollfría handlinum í Vága Floghavn, ber til at fara inn á heimasíðuna hjá tollfría handlinum hjá Vága Floghavn, www.dutyfree.fo. Har sæst eisini alt vøruúrvalið, ið man kann keypa burturúr. 19 Mikudagur 23. mars 2016 · Nr. 35 Sosialurin Ferðast