týsdagur 1. mars 2016síða 34

10 LESTRARBLAÐIÐ 2016 Hallur av Rana Við Marknagilsvegin í Havn tekur nýggi bygningurin skap, sum í framtíðini skal húsa samanløgdu skúlunum Føroya Studentaskúli og HF-skeið, Føroya Handilsskúla og Tekniski Skúlan í Tórshavn. Hundraðtals av næmingum fara at hava sína dagliga gongd í skúlanum, ið verður størsti skúli í landinum. Talan er um nýggjar tíðir í føroyska skúlaverkinum, og tað varð sligið fast fyri nøkrum vikum síðani, tá tíðindi bórust, at nýggi skúlin hevði fingið sítt egna navn. Skúlin, ið fram til tá gekk undir heitinum Markangilsdepilin, fekk nýggja heitið Glasir. Men tað er bara byrjanin. Bogi Bech Jensen, fyrsti rektarin á Glasi, hevur nevniliga víðfevnandi ætlanir fyri størsta skúlan í landinum. – Tað verður nakað til tey bókligu, tað verður nakað til tey handaligu, tað verður nakað til tey, ið bera brek, tað verður nakað til miðnám, tað verður nakað til víðari lestur. Glasir fer at hava okkurt til øll, sigur rektarin, tá hann stutt skal lýsa framtíðina hjá skúlanum. Tríggir verða ein Tá flutt verður inn í nýggja skúlan, verður tað samstundis eisini endin á Studentaskúlanum, Handilsskúlanum og Tekniska skúla. Skúlarnir, ið higartil hava bjóðað ymiskar útbúgvingar, verða lagdir saman og tað skapar nýggja møguleikar, sambært Boga Bech Jensen. – Út um tær útbúgvingar, ið skúlarnir longu bjóða, so vænta vit at gagnnýta teir eyka møguleikarnar, ið tað gevur, tá skúlarnir við teirra lærarum, vitan og førleikum, verða lagdir saman. Við betri og størri umhvørvi nýtast vit ikki longur at avmarka okkum til eina ella tríggjar útbúgvingar, ið skulu passa til øll. – Framyvir verður munandi lættari at seta saman praktiskar og bókligar útbúgvingar, og kunnu bjóða útbúgvingar, ið leggja størri dent á t.d. íverksetan og kreativitet. Okkurt líknandi EUX útbúgvingina í Danmark, ið er ein spennandi útbúgving, har handverkara útbúgvingin verður sett saman við studentaskúlaprógvi. Ein slík útbúgving tekur eini fýra til fimm ár. Hóast skúlastjórin harvið leggur upp til broytingar, ið líkast einari kollvelting av føroyska skúlaskipanini, so kann einki gerast uttan vælsignilsi frá teimum hægru maktunum. – Vit hava ymiskar ætlanir, men um vit ynskja at byrja nakað nýtt, so mugu vit grundgeva væl fyri tí. Lógin leggur upp til, at nýggjar útbúgvingar kunnu setast á stovn, men tað er treytað av, at landsstýriskvinnan í mentamálum tekur undir við tí. Alternativ til Fróðskaparsetrið Hóast teir tríggir skúlarnir, ið nú verða til Glasir, mestsum einans hava bjóðað handaligar útbúgvingar og útbúgvingar á miðnámsstøði, so hevur Føroya Handilsskúli síðstu árini bjóða ymiskar hægri útbúgvingar. Tað er ein leistur, ið rektarin á Glasi, hevur í hyggju at halda fram og enntá víðka til at fevna um fleiri útbúgvingar. – Glasir er ikki avmarkað til miðnámsútbúgvingar. Vit eru ein skúli, ið millum annað bjóða miðnámsútbúgvingar. Ætlanin er framyvir at gera meira burturúr hægri lesnaði, so at Glasir kann gerast eitt alternativ til Fróðskaparsetrið, tá fólk ynskja at taka eina hægri útbúgving. Tað trýtur heldur ikki við møguleikum, tá rektarin verður spurdur um hvørjar útbúgvingar hann hevur í huga. – Tað eru fleiri møguleikar, tá tosað verður um hægri lestur. Føroya Handilsskúla, Glasir, hevur síðani í summar bjóða Marknaðarførslubúskap, og vit hava júst kunngjørt Fíggjarbúskap sum nýggjastu útbúgvingina. – Síðani eru tað eisini tær meira praktisku hægri útbúgvingarnar. Har bjóða vit frammanundan Framleiðslutøkni og Byggitøkni. Harumframt eru tað parttíðar útbúgvingarnar, ið vit bjóða. Harímillum er HD, ið vit hava bjóðað í nógv ár, sera vælumtókt og er tilsamans 120 ECTS. Undirtøkan fyri okkara leiðara útbúgving, ið er á diplom støði, er eisini sera góð. Mugu hugsa nýtt Í ein stóran mun verður byrja av nýggjum, tá bygningurin á Marknagili stendur klárur til skúlaársbyrjan. Tað gevur eisini møguleikar at hugsa nýtt og øðrvísi. – Vit ynskja at hugsa stórt og nýtt. Hvørjar útbúgvingar kunnu vit millum annað bjóða innan list, íverksetan og høvuðsvinnuna? Við politiskari vælvild hava vit endaleysar møguleikar, og kunnu seta útbúgvingar saman við praktiskari læru, starvsvenjing og bókligari læru. Møguleikarnir eru endaleysir, sigur Bogi Bech Jensen. Sum nakað heilt nýtt, so hevur Bogi Bech Jensen ein dreym um at bjóða masterútbúgvingar á nýggja skúlanum. Har eru tað serliga eitt øki, ið hann metir at Glasir kann veita nakað nýtt í. – Vit ynskja at hugsa stórt og nýtt. Hvørjar útbúgvingar kunnu vit bjóða innan list, íverksetan, høvuðsvinnuna o.s.fr? Við politiskari vælvild hava vit endaleysar møguleikar, og kunnu seta útbúgvingar saman við praktiskari læru, starvsvenjing og bókligar læru. Møguleikarnir eru endaleysir, sigur Bogi Bech Jensen, rektari í Glasi. GLASIR FER OKKURT TIL