mánadagur 14. mars 2016síða 58

VIKA 11 • 14. MARS 2016 26 MIÐLAHÚSIÐ ÓKEYPIS LÝSINGARBLAÐ Stórar konsertir í grannalagnum ZZ Top á havnalagi Amerikanski rockbólkurin ZZ Top er kanska líka kendur fyri stóru skeggini hjá oddamonnunum sum fyri tónleikin, men teir spæla herligan rocktónleik og hava havt fleiri hitt. Bólkurin var stovnaður í 1969, og teir hava í 45 ár varðeitt upprunamanningina. Teir eru sterkir tónleikaliga og duga at brúka eitt nú blues inni í teirra rockuniversi. Í summar eru teir á konsertferð í Europa og ein av konsertunum verður hildin á havnalagnum í Aarhus tann 13. juli. Nickelback í Globen Tað verður stundum gjørt gjøldur við tónleikinum hjá Nickelback, sum skal eitast at verða í so lættisopparockur, men Nickelback dugir at seta radiorock saman og fáa sangirnar út til ein stóran skara av fólki. Í fjør hevði kanadiski bólkurin 20 ára jubileum, og í ár kunnu teir upplivast á konsertum í Europa. Teir spæla í fleiri av norðanlondum, og ein av konsertunum verður í Globen í Stockholm tann 6. september. Muse í Forum Enski rockbólkurin Muse hevur við sínum stundum sveimandi og melankolska og stundum ágangandi og lívaliga rocktónleiki vunnið hjørtu kring allan heimin, og á palli skulu teir verða framúr góðir. Muse hevur á sínari europeisku konsertferð tvær framførslur í Keypmannahavn. Teir spæla í Forum tann 8. juni, og tann konsertin er longu útseld. Eykakonsert er sett á skránna dagin eftir, og har ber framvegis til at keypa atgongumerki. Justin Bieber í Íslandi Hann er ein av størstu poppstjørnum í heiminum í løtuni, og seinastu tíðina er hann eisini farin at gera enn betri poppsangir. Á stóru konsertferðini, sum Justin Bieber er á, hevur hann sett Ísland á skránna. Justin Bieber hevur tvær konsertir í stórari høll í Kópavogi tann 8. og 9. September. Tað skuldi verið ómakaleyst hjá føroyingum at gjørt eitt svipp yvir til Íslands at hoyra Bieber á konsert. Queensrÿche á Amager Í 1998 kom Queensrÿche við útgávuni Operation: Mindcrime, sum verður mett sum ein tann besta konseptútgávan nakrantíð. Amerikanski rockbólkurin hevur – meira og minni – verið virkin síðani 1982, og teir hava víst góðan form á konsertum seinnu árini. Í ár koma teir aftur til Europa at spæla, og ein av konsertunum verður í føroyskum grannalagi á Amager. Queensrÿche spælir í Amager Bio tann 2. september. Fyri tann skuld ber til at hita upp á Oyrasundskolleginum. Coldplay í Barcelona Bretski superbólkurin Coldplay er á konsertferð í summar, og nógvir føroyingar munnu longu hava ognað sær atgongumerki til konsertir í Keypmannhavn í juli. Men nú tað er blivið lættari og meira vanligt at ferðast til Barcelona, kundi høvi verið at uppliva Coldplay júst har. Bólkurin hevur tvær konsertir á Estadi Olimpic í Barcelona – tað verða 26. og 27. mai. Rihanna á Wembley Songkvinnan, sum er ættað av Barbados, fer á stóra konsertferð í summar. Anti World Tour kallast konsertferðin, sum eisini røkkur til norðanlond. Men konsertin á legendariska Wembley Stadium í London fer ivaleyst at verða ein av teimum mest minniligu. Rihanna spælir á Wembley tann 24. juni. Beyonce í Amsterdam Amerikanska songkvinnan Beyonce telist millum stóru poppstjørnurnar í heiminum í løtuni, og hennara konsertir eru verulig show, har tað ikki verður spart upp á nakað. Í summar verður Beyonce á The Formation World Tour í Europa, og ein av konsertunum verður hildin í Amsterdam í Hollandi. Hetta kundi verið eitt gott høvi at vitja hugnaliga hollendska høvuðsstaðin. Mong gleða seg ivaleyst til lívliga føroyska summarið við alskyns tiltøkum, har tað ber til at uppliva konsertir við føroyskum og útlendskum bólkum. Men nógv fólk eru eisini á ferð og leitað upp konsertir uttanlands. Eisini eru tað tey, ið fara av landinum fyri at uppliva sín yndisbólk. Vit hava hugt í konsertskránna hjá nøkrum av teimum bólkunum, sum eru á ferð í Europa komandi mánaðirnar og funnið onkur góð boð uppá stórar konsertupplivingar