hósdagur 26. mai 2016síða 36

FRÍGGJADAGUR 27. MAI 2016 SOSIALURIN 60 36 Høgni Hoydal, landsstýrismaður við fiskivinnumálum, setir kunngerðina í gildi. 3000 tons av botnfiski verða seld í Barentshavinum. Enn er ikki avgjørt um tað verur yvir telefonuppboðssølu ella gjøgnum afturlatna uppboðssølu TVEY SLØG AV UPPBOÐSSØLU SKULU ROYNAST HESAFERÐ ÁRNI GREGERSEN Tað var ein politiskur stórsigur fyri samgonguna, tá ið samgongan í Løgtinginum samtykti, at ein royndaruppboðssøla skal vera yvir nøkur fiskasløg. Nú er komið so langt, at kunngerðin verður send vinnuni til hoyringar eins og hon verður løgd út alment, so almenningurin eisini kann gera viðmerkingar. Í løgtingslógini stendur, at 3000 tons av botnfiski í Barentshavinum skal seljast á uppboði. Talan er um ymisk sløg av botnfiski – ikki bara toski, men partarnir verða býttir soleiðis at samansetingin millum tosk og annan fisk verður tann sama, sum hon vanliga er í Barentshavinum. 9000 tons av makreli fara eisini um uppboðssøluna, 20.000 tons av svartkjafti og 4000 tons av norðhavssild. Spurningurin hevur verið, hvussu hetta verður selt, men nú er avgerð tikin um hetta, sum so verður leisturin, kemur onki serligt inn í samband við hoyringina. Ein partur verður seldur yvir uppboðssøluna, sum vit kenna hana frá seinast. Tá var makrelur seldur gjøgnum uppboðssøluna hjá Føroya Fiskmamarknað. -Vit halda, at hetta skal roynast, tí seinast riggaði hendan skipanin væl, sigur landsstýrismaðurin við fiskivinnumálum, Høgni Hoydal. -Men vit ætla eisini at selja ein part í afturlatnari uppboðssølu. Tað vil siga, at tey sum bjóða lata eitt afturlatið boð inn til tað, sum tey ynskja at bjóða uppá og so vinnur tann, sum hevur hægsta og besta boðið, sigur landstýrismaðurin. Stríð Uppskotið um at ein partur av veiðurættindunum skuldu seljast á uppboði hevði eina tronga leið gjøgnum Løgtingið. Málið var eftir 1.viðgerð beint í vinnunevndina, men meirlutin har helt, at vandi var fyri, at landskassin fór at verða stevndur eftir endurgjaldi, tí onkur fór at missa rættindi, sum nú fóru á uppboðssølu. Talan var um eitt uppskot frá landsstýrismanninum við fiskivinnumálum, men í vinnunevndini var tað soleiðis, at meirlutin í Løgtinginum – altso samgongan -var í minniluta í vinnunevndini. Orsøkin var, at Nýtt Sjálvstýri hevði gjørt valbólk saman við samgonguni og fekk lim í vinnunevndini saman við andstøðuni. Málið dróg út. Tað var lagt fram hálvan desember , men var ikki endaliga samtykt í Løgtinginum fyrr enn fyrst í apríl í ár. Síðani hevur umsitingin arbeitt við, hvussu kunngerðin skal orðast og hvussu uppboðssølan í praksis skal gerast. Hoyringin Lógin sigur greitt, at kunngerðir, sum regulera fiskiskapin, skulu hava 14 daga hoyringsfreist. Kunngerðin verður helst send út í dag til hoyringar hjá vinnuni. Hoyringssvarini kunnu gera at broytingar verða gjørdar, men annars verður kunngerðin klár at senda út eftir at hoyringsfreistin er farin. Tað liggur ikki fast, nær uppboðssølurnar vera, men tað er fast, at talan verður um uppboðssølur í fleiri umførum. Umframt at ein uppboðssøla verður yvir uppboðssøluna hjá Føroya Fiskamarknaði, so er ætlanin at royna eitt nýtt slag. Tað gongur út uppá, at ein partur av veiðurættindinum verða boðin út og kunnu virkir so bjóða uppá tann blokkin gjøgnum eina afturlatna uppboðssølu. Hetta verður ein sonevnd afturlatin uppboðssøla Tað vil sig , at brævbjálvar við boðum verða latnir inn og so vinnur tann rættindini, sum hevur bestu boðini. Í lógini stendur, at tað eru tey sum frammaundan hava veiðuloyvir, sum sleppa at bjóða uppá hesi rættindi. -Fyribils er tað soleiðis, tí undir einari uppboðssølu verða ikki stundir at eftirkanna um tey sum bjóða, verða stýrd av útlendskum kapitali. Tí eru tað bert tey, sum frammanundan hava veiðuloyvir, sum kunnu bjóða, sigur Høgni Hoydal. Talan hevur verð um, um virkir eisini sleppa at bjóða, men soleiðis er ikki í hesum umfari. Heldur ikki ber til at selja rættindi víðari. Brúkar ein tey ikki sjálvur, so skulu tey latast innaftur til tað almenna. Royndir Í løtuni situr ein bólkur og arbeiðir við nýskipan av føroysku fiskivinnuni. Í arbeiðssetninginum stendur, at veiðurættindini skulu gerast atkomulig á ein annan hátt enn nú. Talan skal vera um eina skipan, sum byggir á marknaðartreytir heldur enn á politiska útluting. Royndaruppboðssølan skal geva nakrar royndir, sum seinni kunnu brúkast, tá ið nýggja fiskivinnuskipanin verður gjørd. Nær uppboðssølan verður er ikki avgjørt enn, men alt verður ikki gjørt í senn. Uppboðssølurnar verða býttar sundur, so at vit í ár fáa fleiri sølur. -Mest av øllum er hetta fyri at fáa nakrar royndir, sigur Høgni Hoydal, landsstýrismaður við fiskivinnumálum. Tað er eisini landsstýrismaðurin við fiskivinnumálum, sum endaliga setir kunngerðina í gildi. Kunngerðin um royndaruppboðssøluna fer nú til hoyringar alment og hjá vinnuni