mánadagur 4. juli 2016síða 34

VIKA 27 • 4. JULI 2016 10 ÓKEYPIS LÝSINGARBLAÐ TEMA Vestanstevna Vilmund Jacobsen T að verður borgarstjórin í Sørvágs kommunu, Sune Jacobsen, sum fríggjakvøldið klokkan 20 fer at seta vestanstevnu, og Sørvágs Tónleikarfelag fer at spæla. Hálvan tíma fyri setanina, verður skrúðgonga við hestum og ítróttarfólki, og her verður gingið í ítróttarklæðum, sum tað eitur í skránni, frá Libanon og oman á stevnuøkið, har hátíðarløtan verður. Sune Jacobsen var blaðungur, tá hann fyrstu ferð helt røðu á vestan­ stevnu. Tað eru umleið 40 ár síðan, at hann fyrstu ferð varð valdur í bygdaráðið í Sørvágs kommunu, og hesi 40 árini hevur hann sitið í bygdaráðnum í umleið 20 ár. Sune hevur eisini verið virkin í landspolitikki, og í kreppuni í nítiárunum var hann eitt skifti formaður í løgtingsins fíggjarnevnd. Byrjaði sum vágastevna Vestanstevna, sum vit kenna hana í dag, byrjaði í 1945 sum vágastevna, sum árini eftir skifti millum bygdirnar í Vágum. Á hesi fyrstu stevnuni varð rógvið kapp á Sørvágsvatni, tó at tað ikki var tann kappróður í vavi, sum er í dag. Í 1952 kom Vestmanna upp í skiftið um stevnuna, og tá fekk stevnan navnið, vestanstevna. Síðan Vestmanna nøkur ár herfyri gjørdist partur av fjarðastevnu í skifti millum Skála, Strendur og Vestmanna, koyrir vestanstevna nú í skifti millum tær tríggjar stóru bygdirnar í Vágum. Alskur til Sørvág Sune Jacobsen sigur, at tá hann setir sær sjálvum spurningin, hvat hann sum miðalaldrandi maður mest gleðir seg til á vestanstevnu, so er tað serliga at hitta gamlar vinir og kenningar, ið leita aftur til bygdar við hetta høvið. – Eg minnist serliga eina røðu, sum Petur Kruse, sáli, sum tá var borgarstjóri í Sørvágs kommunu, helt á vestanstevnu. Hetta hevur helst verið einaferð miðskeiðis í nítiárunum. Peturi Kruse nam í røðu síni við kærleikan til staðið - kærleikan til Sørvág. Hann tosaði um sørvingar, sum høvdu sínar røtur í bygdini, men sum høvdu búsett seg aðrastaðni og leitaðu vestur aftur til sínar røtur á vestanstevnu. Petur nevndi eisini, hvussu gott tað var at fáa respons - ella afturmeldingar - frá fólki, sum síggja bygdina í einum øðrum ljósi enn tey fólk, sum dagliga liva og búleikast her. Gløgt er gestsins eyga, sum vit plaga at siga, og tað er eisini gott at fáa at vita, hvat onnur halda um tað, sum verður gjørt. Her kundi tú fáa at vita, hvat útisetar meta er gott, og hvat kanska er minni gott í bygdini. Sune Jacobsen vísir á, at hann serliga minnist boðskapin hjá Peturi Kruse um skylduna, sum øll hava, at verja og varðveita tað góða umhvørvi, sum bygdin eigur. Føroyar úr erva Sune Jacobsen minnist sum smá­ drongur tíðliga í sekstiárunum eina vestanstevnu, har Iceland Air kom til Føroyar at flúgva við fólki, sum soleiðis sluppu at síggja Føroyar úr erva. – Hetta var meira forkunnugt og óvanligt, enn tað er í dag, og ivaleyst festi túrurin seg í minnið hjá mongum. Sum smádrongur var eg ikki við í flogfarinum, men eg minnist, hvussu stórt fólk hildu hetta vera. Soleiðis, sum núverandi borgar­ stjórin heldur seg minnast, gjørdi Iceland Air nakrar túrar við fólki á hesi stevnuni, og hann heldur, at hesin møguleiki eisini var ein partur av skránni fyri stevnuna. Kappróðurin á føtur Sune Jacobsen ásannar, at lítið og einki lív er á kappróðrarøkinum í Sørvági í løtuni, tó at sørvingar eiga eitt frálíkt kappróðrarneyst. – Tað eru nøkur ár síðan, at okkara bátar vóru aktivir í kappróðri seinast, men tað vóru ár, tá eitt nú 5-mannafarið Dúgvan gjørdi um seg. Bátar, sum áður hava verið mannaðir í Sørvági, eru sum nevnt Dúgvan, 6-mannafarið Norðistovudánjal og 8-mannafarið, Sørvingur. Sjálvur eigur Sune Jacobsen ein abbason, sum býr og rør í Miðvági, og hann vónar, at kappróðurin í Sørvági fer at reisa seg aftur, áðrenn langt um líður. – Eg vóni, at onkur fer at taka sær av barnaróði í Sørvági, sum eg trúgvi kundi verið við til at fingið róðurin á føtur aftur, sigur borgarstjórin í Sørvágs kommunu, sum bjóðar øllum vælkomnum á vestanstevnu. – Tá eg seti mær spurningin, hvat eg gleði meg mest til á vestanstevnu, so er tað at hitta gamlar vinir og kenningar, ið leita aftur til bygdar við hetta høvið, sigur borgarstjórin í Sørvágs kommunu, Sune Jacobsen – Gløgt er gestsins eyga, og tað er altíð hugaligt at fáa afturmeldingar frá fólki, sum hava sínar røtur í bygdini, sigur Sune Jacobsen Mynd: Vilmund Jacobsen Tað verður Sune Jacobsen, borgarstjóri í Sørvágs kommunu, sum fríggjakvøldið klokkan 20 fer at seta vestanstevnu Mynd: Vilmund Jacobsen Vitja aftur á gamlar gøtur