mánadagur 11. juli 2016síða 13

13 Mánadagur 6. januar 2014 · Nr. 2 Sosialurin Mánadagur 11. juli 2016 · Nr. 79 Hugskot og viðmerkingar – send sms til 225000 STUTTSØGD TÍÐINDI ÍSLENDSKI MÁLVERJIN HEVÐI FLESTAR BJARGINGAR Stuttsøgdu tíðini eru í stóran mun merkt av hagtølum frá júst lidna EM-endaspælinum. Tó eru eisini tíðindi um føroyskar svimjarar, dopaða tennistjørnu og umstríddar hendingar í Tour de France Neli Heldarskarð FÓTBÓLTUR Fyrsta EM-endaspælið við 24 luttakandi londum er tað komið at enda. Heldur óvæntað var tað Portugal, ið við máli frá stóra framherjanum, Éder, sum ikki eingongd var nóg góður til Swansea í Premier League, sum vann kappingina eftir finalusigur ímóti Fraklandi. Hetta er fyrstu ferð í søguni, at Portugal vinnur EM, og tessvegna fáa Føroyar sjálvar evropameistararnar á vitjan, tá ið Portugal vitjar á Tórsvølli 10. oktober. At 24 lond tóku lut merkir eisini, at dystartalið í kappingini var tað hægsta nakrantíð - 51. Tó var talan um eitt málfátækt endaspæl, tí at í hesum dystum blivu bert skorað 108 mál, ið er 2,12 mál fyri hvønn dyst. Sostatt var í miðal 44 minuttir ímillum hvørt mál. Liðið, ið skoraði flest mál í endaspælinum, var Frakland, sum skoraði 13 mál í sjey dystum - 1,86 mál fyri hvønn dyst. Ísland var liðið, sum skoraði fjórð mest mál fyri hvønn dyst, tí at í sínum fimm dystum skoraðu íslendingar átta mál - 1,6 mál fyri hvønn dyst. Toppskjútti í kappingini gjørdist franski Antoine Griezmann, sum seinastu mánaðirnar hevur verið so óheppin at tapt bæði Champions League-finaluna við Atlético Madrid og EM-finaluna. Griezmann skoraði seks mál í hesum endaspælinum. Síðani vóru heili seks leikarar, ið skoraðu trý mál og mugu deilast um annað plássið á toppskjúttaralistanum. Teir eru Cristiano Ronaldo, Olivier Giroud, Dimitri Payet, Gareth Bale, Nani og Álvaro Morata. Flest upplegg í kappingini høvdu Eden Hazard hjá Belgia og Aaron Ramsey hjá Wales. Teir løgdu báðir upp til fýra mál í part. Málmaðurin, ið hevði flestar bjargingar í endaspælinum, er ikki nakar, sum er í evropeisku elituni ella spældi allar sjey dystirnar í endaspælinum. Tað var nevniliga íslendski Hannes Halldórsson, ið til dagliga spælir við ongum øðrum enn norska Bodø/Glimt, sum í sínum fimm dystum hevði 27 bjargingar. Tað var klárt mest, tí at næstir honum í røðini koma Thibaut Courtois hjá Belgia og nýggi evropameistarin úr Portugal, Rui Patricio, ið báðir høvdu 20 bjargingar. 18 ára gamli Renato Sanches hjá Portugal, ið er blivin ákærdur fyri at vera 23 í veruleikanum, varð valdur til besta unga leikara í EM-endaspælinum. Sanches hevur veruliga fingið sítt gjøgnumbrot í Benfica í farna kappingarári, og hetta hevur viðført eitt skifti til Bayern Múnchen. HONDBÓLTUR Føroyska U18-landsliðið hjá kvinnum luttók í farnu viku í European Open kappingini, sum varð hildin í Göteborg í Svøríki. Tilsamans tóku 18 lond lut, og Føroyar endaðu nummar 14 av hesum 18 londum. Føroysku genturnar spældu seks dystir, har tríggir blivu vunnir, meðan tríggir somuleiðis vórðu taptir. Seinasti dysturin varð spældur fríggjadagin, tá ið íslendska brøðratjóðin bleiv ein ov stórur biti at svølgja – Ísland vann 17-15 ímóti Føroyum. Føroysku úrslitini vóru hesi: Føroyar – Spania 12-19 Føroyar – Kekkia 12-11 Føroyar – Russland 10-22 Føroyar – Eysturríki 27-16 Føroyar – Montenegro 17-12 Føroyar – Ísland 15-17 SVIMJING Ungir, føroyskir svimjarar hava í farnu viku lut­tikið í evropeisku junior­meistara­ stevnuni, sum hevur verið hildin í ungarska býnum við snøgga navninum Hódmezővásárhely. Serliga var tað Sára Ryggshamar Nysted úr Suðuroyar Svimji­ felagi, ið skaraði framúr, tí at fyrstu tríggjar dagarnar eydnaðist tað henni at seta eitt met um dagin. Fjórða og síðsta svimjidagin, ið var leygardagin, var tað Marius Ihlen Garðshorn úr Havnar Svimjifelagi, sum setti nýtt met í 800 metra frísvimjing við tíðini 8:24.90. TENNIS Kvinnuliga tennistjørnan, Maria Sharapova, fer ikki at luttaka í Olympisku Leikunum í ár. Orsøkin er, at russiski tennisleikarin er blivin dømd tvey ára leikbann fyri doping. Sharapova kærdi hendan dóm til altjóða ítróttar­ dómstólin, CAS, við tí vón, at hon kundi sleppa at luttaka í OL. CAS hevur nú kunngjørt, at dómurin hjá Sharapova verður ikki viðgjørdur fyrr enn 19. september, og sostatt stendur upprunaliga dómurin við mát inntil tá. SÚKKLING Tour de France 2016 er blivið eina stjørnu fátækari. Tað er greitt eftir, at spanski Alberto Contador hevur takkað fyri seg í kappingini eftir 9. etapu, ið varð súkklað í gjár. Tað var meir enn 100 kilometrar eftir av etapuni í gjár, tá ið Contador kendi seg noyddan at geva skarvin yvir og steðga at súkkla. Contador var óheppin í teimum fyrstu døgunum av Tour de France, tá ið hann datt tvær ferðir. Skaðarnir, ið fallini hava viðført, hava verið so álvarsligir, at Contador ikki súkklar meir í Tour de France í ár. Ein margháttilig hending var í 8. etapu leygardagin, tá ið bretski Chris Froome slóð ein kolumbianskan áskoðara, ið rann við síðuna av súkklarunum. Revsingin er, at Froome skal gjalda 200 schweiserfranc í bót - hetta er Umleið 1400 krónur. Við Sky Sports sigur Froome, at hann vil heita á allar áskoðarar at lata vera við at renna við síðuna av súkklarunum, tí at tað kann blíva vandamikið fyri bæði súkklararnar og áskoðaran sjálvan