týsdagur 13. september 2016síða 42

SEPTEMBER 2016 Lýsingablað frá Miðlahúsinum 10 HONDBÓLTUR 2016-2017 StÍF skal bjóða av – Hóast eg gjarna vil koma langt í steypakappingini, vil eg mest av øllum fáa gott úrslit í landskappingini, sigur Tomasz Zilbergberg, nýggi venjarin hjá stolta steypaliðnum, StÍF Tomasz Zilberberg eitur nýggi venjarin hjá strandingum, og sum ábendingar í stavingarháttinum eru um, hevur hann polskan uppruna, tí hann er føddur í Szczecin, men flutti sum trý ára gamal til Danmarkar, har hann hevur búð síðani. Men nú er tað á Strondum og á Skála, at hann skal búleikast næsta árið, tí 44 ára gamli venjarin hevur tikið á seg ábyrgdina av teimum vaksnu hjá StÍF. – Eg havi spælt hondbólt á øllum stigum í Danmark síðstu 38 árini, umframt at eg havi arbeitt sum venjari í smá 20 ár, har eg havi vant alt frá næstbestu deildini og niður til ungdómsdeildirnar. Eg havi útbúgving sum divisiónsvenjari, og var tað ikki, tí eg fekk møguleikan at koma til StÍF, hevði eg helst verið farin eitt stig víðari í venjaraútbúgvingini nú, sigur hann. Tað sigur hann tó ikki, tí hann heldur nýggja venjarastarvið vera nakra striku í rokningini, men heldur tvørturímóti fegnast um ein møgu­ leika at royna seg við nøkrum nýggjum og øðrvísi avbjóðingum enn áður. – Aleksandur Johansen spurdi meg, um eg hevði áhuga fyri prosjektinum hjá StÍF, og eftir at hava sæð felagið, hópin og fólkini, helt eg hetta vera eina so mikið spennandi avbjóðing, at eg tók av. Sum eg skilji á Marjusi Joensen, sum eg havi verið venjari hjá niðri, vil føroyskur hondbóltur fegin lyfta seg eitt sindur, og seinnu árini eru fleiri danskir spælarar og venjarar komnir hendavegin, sigur Tomasz. – Eg eri spentur uppá at sleppa at seta mín dám á felagið, tí mítt venjarastarv snýr seg bæði um spælararnar og sjálvt spælið. Lagt hart út Tomasz Zilberberg er væl nøgdur við uppstartin og heldur, at hann hevur verið bæði spennandi, læruríkur og harður fyri spælararnar, tí hann hevur ein varhuga av, at hann kanska hevur ein heldur harðari mentalitet og setir størri krøv, enn spælararnir eru vanir við. – Har skínur mín eystureuropeiska uppaling møguliga ígjøgnum, tí eg balli einki inn, men farin beint á, og eins og eg krevi 120% av mínum spælarum, skulu teir kunna krevja tað sama av mær. Og higartil sær út til, at tað hevur riggað, tí eftir ein harðan uppstart eru vit við at finna hvønn­ annan, sigur StÍF-venjarin. Mál hansara er at spæla við um heiðursmerki, og hann heldur seg síggja góðar møgu­leikar fyri, at tað kann bera til og vísir á, at farna kappingar­ár vóru fleiri býtt tap við fáum málum og eisini fleiri býttir javn­ leikir, sum sleppast skal undan í vetur. – Og so hava tey fortalt mær, at tað hevur nógv at siga at vinna steypakappingina, men har havi eg sagt nei, tí hóast eg gjarna vil koma langt í steypakappingini, vil eg mest av øllum fáa gott úrslit í landskappingini, sigur Tomasz og sipar til ta sannroynd, at StÍF hevur stoltar steypatraditiónir og frá 2001 til 2008 var hvørt ár í steypafinaluni og vann seks av teimum. – Eg vil siga tað soleiðis, at vit kunnu vinna á øllum, um vit eru til reiðar, men kunnu eisini tapa, um vit ikki eru tað. Mín hugburður er, at eg fari á vøllin hvørja ferð fyri at vinna, og tað er ikki órealistiskt at fáa eitt gott úrslit, men tað krevur so eisini hart arbeiði. MÁLVERJAR Carsten Bang og Eli Gærdum ÚTILEIKARAR: Fríði R. Djuurhus, Eyðbjørn Eiriksson, David Jacobsen, Jógvan G. Joensen, Pætur Joensen, Pætur Johansen, Sveinur Justinussen, Rúni Niclassen, Teitur Nilssen, Allan Norðberg, Borgar Persson og Tummas Simonsen VENJARI Tomasz Zilberberg Hallur Danielsen, viðmerkjari: MISSURIN AV KJARTAN ER STÓRUR – Tað er ein dyggur smeitur fyri StÍF, at liðið hevur mist unga landsliðsleikaran Kjartan Johansen. Hann hevur verið ein ógvuliga týdningarmikil spælari fyri strandingar, men tað ljóðar, at ein nýggjur danskur leikari er á veg, men eg havi so ikki hoyrt nakað ítøkiligt enn. Men fáa teir ikki ein greiðan styrk til liðið, so verður tað tungt hjá teimum í ár, sigur Hallur Danielsen. Hann heldur, at StíF aftur í ár kemur at vera eitt tílíkt lið, sum kann vinna allar dystir, men sum eisini kann tapa allar dystir. – Men teir hava fingið ein nýggjan venjara, og tað skapar altíð eitt sindur av nýggjari gejst og spæligleði. Men eg vænti ikki, at teir koma at spæla við um at sleppa í FM-finalurnar, sigur Hallur Danielsen.