týsdagur 13. september 2016síða 41

SEPTEMBER 2016 Lýsingablað frá Miðlahúsinum 9 HONDBÓLTUR 2016-2017 KÍF í betri formi – Síðani í mai mánaði hava vit bygt liðið spakuliga, og eg tori at siga, at menninir yvirhøvur eru betur fyri nú, enn teir vóru um somu tíð í fjør, sigur venjarin hjá kollfirðingum, Jeppe Borch KÍF, sum í 2013 og 2014 var meistari og bæði árini kom í steypafinaluna, sum liðið vann í 2013, hevur ikki ordiliga verið heilt uppi í somu snúningum aftur. Síðsta kappingarár bleiv hópurin í so tunnur, tá alsamt fleiri skaðar fóru at gera um seg ímóti kappingarenda, so tí rakk tað akkurát ikki til heiðursmerki, hóast kollfirðingar hingu við rættiliga leingi. – Vit sóu ímóti endanum á kappingini í fjør, at tað bleiv ov smalt hjá okkum, tá vit fingu fleiri skaðar, og tí hava vit roynt at styrkt okkum eitt sindur um hópin í ár, so vit skulu fáa størri breidd, sigur venjarin hjá KÍF, Jeppe Borch, sum kom til Kollafjarðar undan síðsta kappingarári. – Tí hava vit styrkt okkum við tveimum 19-20 ára gomlum spælarum úr Danmark, sum eru málverjin, Marcus Mølbjerg, og høgri bakkurin, Frederik Sørensen. Eg havi verið væl nøgdur við tað, eg havi sæð frá teimum, so teir munnu fara at roynast. Vit høvdu heldur ikki farið eftir spælarum, uttan so at vit sóu teir sum ein veruligan styrk fyri hópin, og tað haldi eg, at hesir báðir ungu menninir eru. Tað sær eisini út til, at teir eru falnir væl til, so tað sær sera spennandi út. Vilja byrja betur Sum sagt, fekk skaðastøðan stóra ávirkan á, hvussu endaspurturin hjá KÍF hilnaðist, og nú eitt nýtt kappingarár stendur fyri durum, er verri enn so alt komið upp á pláss enn hjá kollfirðingum: – Framvegis dragast onkrir av okkara monnum við skaðar, so vit eru ikki fullmannaðir enn. Men tað skal ikki vera nøkur loyna, at vit ætla at gera tað betri enn í fjør, tá vit eisini megnaðu at gera framstig í mun til árið fyri, staðfestir Jeppe Borch, ið letur væl at venjingunum higartil. – Steðgurin síðani síðsta kappingarár hevur gagna okkum, tí síðani í mai mánaði hava vit bygt liðið spakuliga upp alla tíðina, burtursæð frá eini feriu í juli mánaði. Tí tori eg at siga, at menninir yvirhøvur eru betur fyri nú, enn teir vóru um somu tíð í fjør. Vit sóu sera slitnir út ímóti endanum á kappingini í vár, men nú vil eg so vóna, at arbeiðið við forminum higartil fer at løna seg. Høgt toppstøði Spurdur, hvat hann væntar sær av komandi kappingini, heldur KÍF- venjarin, at talan helst verður um eina kapping, sum minnir um hana í fjør, men at tað verður javnari. – Í fjør stakk H71 av at byrja við, men annars var tað nokk so javnt, og tað bleiv so VÍF, ið endaði øgiliga væl, ið vann meistaraheitið. Í vetur vænti eg, at H71 við síni stóru breidd aftur fer at klára seg væl, eins og VÍF og Kyndil fara at gera tað. Eg rokni tó ikki við, at nakað heilt vilt hendir í toppinum, men at vit fáa eina javna kapping, har øll kunnu vinna á øllum, sigur Jeppe Borch, ið trívist sum venjari í Kollafirði og partur av føroyskum hondbólti: – Eg hevði eitt gott og spennandi ár í fjør, og persónliga eri eg sera væl nøgdur við at vera her. FTZ-deildin er ein spennandi deild at arbeiða í, og hóast eg av góðum grundum ikki dugi so væl at siga, hvussu føroyskur hondbóltur hevur flutt seg, hevur toppstøðið verið sera gott. MÁLVERJAR Emil Dam, Jann Dávur Dam, Ragnar Gaard og Marcus Mølbjerg ÚTILEIKARAR: Ási Dam, Karstin Dánjalsson, Atli Hammer, Hjalti Hammer, Rúni Joensen, Teitur Joensen, Jón Suni Kjærbæk, Vilhelm Magnussen, Andrias Nielsen, Hans Eli Sigurbjørnsson, Frederik Sørensen, Jákup Trygvason, Fríði Weyhe, Rógvi Weyhe og Tony Weyhe VENJARI Jeppe Borch Hallur Danielsen, viðmerkjari: KÍF FÆR ILT VIÐ AT KOMA Í TOPPIN – Tað er torført at meta um kollfirðingar í ár, tí teir hava fingið tilgongd av onkrum donskum leikara, sum man enn ikki hevur sæð so nógv til. Eg vænti, at teir koma at hava ein breiðari hóp í ár, men teir koma kanska ikki so væl frá byrjan í ár, tí Fríði Weyhe er skaddur, Tony Weyhe er ikki við enn, og Andrias Nielsen er ikki byrjaður, sum eg havi skilt tað, so tað verður kanska ein trupul byrjan hjá teimum, sigur Hallur Danielsen. Hann sigur tó, at Rúni Joensen, sum ikki var við frá byrjan í fjør, er væl fyri í ár, og tað er avgjørt ein styrkur. – Men eg vænti ikki, at KÍF kemur at blanda seg í oddastríðið, og tað verður ógvuliga trupult hjá teimum at koma heilt upp í toppin. Men tá ið tað er sagt, so hava kollfirðingar eitt lið, sum á einum góðum degi kann koppa øllum, sigur Hallur Danielsen.