týsdagur 13. september 2016síða 44

SEPTEMBER 2016 Lýsingablað frá Miðlahúsinum 12 HONDBÓLTUR 2016-2017 Neistin skal vísa dirvi – Í fjør góðtóku vit, at vit vóru eitt veikari lið, men nú skulu menninir vísa størri stríðshuga, tí ætlanin er at fáa gongd á eitt gott framtíðarlið, sigur enski venjarin hjá Neistanum, Scott Harrington – Ja, eg veit væl, at tað allarhelst ljóðar eitt sindur stuttligt, at eg bæði eri onglendingur og hondbóltsvenjari, men tað eri eg altso. Orðini eigur venjarin hjá Neistanmonnum, Scott Harrington, sum kom til Føroya fyri einum ári síðani at vera ungdómsmennari í bláa havnarfelagnum, men endaði við at taka sær av besta mansliðnum saman við Ára Rouch. Nú er hann so frá ársbyrjan saman við Ára venjari hjá Neistanum, men áðrenn prátið kemur inn á ta uppgávuna, fáa vit Scott at fortelja eitt sindur um seg sjálvan. – Eg eri føddur og uppvaksin í Onglandi, nærhendis London, men sum 17 ára gamal flutti eg til Danmarkar. Í sambandi við olympisku leikirnar í 2012 skuldi Bretland hava eitt hondbóltslandslið við, og í tí sambandi var eg fýra ár í Danmark fyri at fyrireika meg til OL. Nicholas Satchwell, sum bleiv ársins málverji síðsta kappingarár, var eisini við á bretska OL-hondbóltslandsliðnum, og vit báðir hava spælt saman í eini fimm ár, sigur hann. – Tá var eg spælari, men fór undir donsku venjaraútbúgvingina, tí eg altíð øgiliga gjarna hevði viljað verið venjari. Fylt nøkur hol Nú tað stundar til kappingarbyrjan, er Scott Harrington væl nøgdur við fyrireikingarnar, teir hava gjørt í Neistanum, sum hann hevur skipað eftir einum ávísum leisti, ið tekur hædd fyri, at talan er um eina øgiliga unga manning. – Vit hava eitt sera ungt lið, so tað snýr seg framvegis um at byggja upp og at leggja dent á teknikk og kropsliga partin, meðan vit ikki enn hava tosað so nógv strategi. At vit hava lagt størri dent á ta kropsligu venjingina, merkir so eisini, at eg haldi okkum vera langt framman fyri tað, vit vóru komnir til um somu tíð í fjør, sigur hann. – Tað snýr seg um at menna liðið, heldur enn at dúva upp á einstaklingar, men so skal eisini sigast, at vit hava roynt at fylt nøkur hol út, sum hava verið í hópinum. Rói Berg Hansen fór ikki til danskan hondbólt allíkavæl, og Frank Askildsen er komin frá Kyndli, og so hava vit fingið 27 ára gamla norska spælskiparan, Christopher Lorenzo Moe, sum hevur drúgvar royndir sum spælari bæði í Danmark og í Norra, har hann til nú hevur spælt í bestu deildini. Skulu vísa dirvi At talan sum heild er um ungar og ágrýtnar spælarar, ið enn hava brúk fyri fleiri royndum, ger eisini, at Scott Harrington ikki vil seta teimum ov stór krøv, tí nú skal sjálvsálitið byggjast upp. – Í fjør saknaðu vit dirvi, tí vit góðtóku, at vit vóru eitt veikari lið. Hetta skal vera øðrvísi í ár, so menninir skulu vísa størri stríðshuga, hóast úrslitini framvegis ikki hava so nógv at siga, sum tað hevur at fáa gongd á eitt gott framtíðarlið, sigur venjarin, ið vísir á, at talan er um eina langtíðarætlan. – Nú skulu vit læra okkum at vera kappingarførir og síðani arbeiða fram ímóti teimum trimum næstu kappingarárunum. Gamaní, vilja vit fegnir vera millum fýra tey bestu, men eitt finalupláss er líkasum ikki á listanum í vetur. Hinvegin vilja vit fegnir hava minst 10 stig meira enn í fjør, tá vit fingu 16. Hvar vit skulu fáa tey, veit eg ikki, men eg vænti eina tættari og javnari kapping, tí eg havi varhugan av, at tey fremstu eru ikki so ræðandi, meðan vit onnur hava tikið okkum eitt sindur fram. MÁLVERJAR Vilhelm Clementsen, Eliesar Rubeksen og Nicholas Satchwell ÚTILEIKARAR Frank Brynleifsson Askildsen, Torstein Balle, Beinur Davidsen, Rói Berg Hansen, Torkil Hentze, John í Innistovu, Hjalti í Jákupsstovu, Andras Joensen, Jónsvein Dulavík Joensen, Herbjørn Lava, Pætur Mikkjalsson, Christopher Lorenzo Moe, Rasmus Müller, Terji Mørk, Pál Niclasen, Karl Martin Olsen og Teis Horn Rasmussen VENJARAR Scott Harrington og Ári Roach Hallur Danielsen, viðmerkjari: STYRKIN HJÁ NEISTANUM ER SAMANHALDIÐ – Neistamenn eru sum altíð ógvuliga fyrireikaðir, og teir eru kropsliga væl fyri. Tað er eingin ivi um, at stóra styrkin hjá neistamonnum er, at teir hava eitt ótrúliga gott samanhald, og at teir eru so væl fyrireikaðir, sigur Hallur Danielsen. Hann heldur tó, at leikaratilfarið hjá Neistanum er nóg gott til, at liðið kann blanda seg upp í oddastríðið. – Teir mangla kvalitetin til at koma heilt upp í toppin, og teir fáa trupult við at sleppa upp í ovaru hálvu á stigatalvuni, sigur hann. Neistin hevur mist Jugoslav Djumic, men tað heldur Hallur Danielsen ikki, at tað verður tann heilt stóri missurin. – Tað verður ikki so sjónligt, men Neistin skal heilt víst liva upp á samanhaldið á liðnum, sigur Hallur Danielsen.