mánadagur 26. september 2016síða 36

VIKA 39 • 26. SEPTEMBER 2016 ÓKEYPIS LÝSINGARBLAÐ Slakt 12 TEMA Vilmund Jacobsen Ottar Hentze, sum er bóndi á Utta­ stovu­garðinum í Trøðum á Sandi, hevur eitt áseyðatal, sum liggur um 170. Á garðinum er mjólkakvota, sum er á 168.000 litrar um árið, og hann hevur eisini umleið 20 mjólkneyt. Nú skurðfjøllini stunda til, og slaktið liggur fyri framman, ger Ottar Hentze ikki so nógv burtur úr hesum partinum av virkseminum, tó at henda tíðin eisini er eitt tak á garðinum. – Vit fletta umleið 170 seyðir um árið, og vanliga fletta vit eisini eina kúgv ella so um mánaðin. Tað er eingin trupulleiki at sleppa av við kjøtið, og bæði sølan av seyða-og neyta­kjøti gongur væl, sigur hann. Epli og røtur Tað stóra arbeiði higartil í heyst hevur verið eplini og røturnar, sum Utta­ stovu­garðurin veltir og selur. Eins og aðrir bóndur, sum velta epli, veltur Ottar Hentze fleiri ymisk sløg, harav tey hvítu folva-eplini og reyðu oleva-eplini ivaleyst eru best kend av navni millum manna. – Vit eru rímiliga væl nøgd við grøðina í ár, tó tað kann vera eitt sindur ymiskt, hvussu eplasløgini eydnast. Í summum sløgum fært tú kanska færri, men størri epli - og í øðrum sløgum fleiri og smærri, sigur hann. Ottar Hentze vísir á, at jørðin, sum eplini verða velt í, er sandjørð blandað við mold. Hetta ger, at jørðin er ikki so útsett fyri vætu, um summarið verður vátt, tí vætan seyrar væl niður gjøgnum sand og mold. – Í summar var ógvuliga turt, og hetta gekk út yvir vøksturin av grasi, har gras veksur á blandaðari jørð við sandi og mold. Bóndin heldur, at eplagrøðin í ár liggur um miðal. Kanska er talið av eplum ikki so ógvuliga stórt, men tey hava fingið eitt stórt tal av miðalgóðum etingareplum. Bóndin sigur, at vanliga eigur Uttastovugarðurin epli at selja fram til jólar ella so, men tá jólini koma, eru sjáldan nógv epli eftir. – Nú í heyst selja vit regluliga í Vágsbotni í Havn, har vit plaga at vera fríggjamorgun. Vit plaga eisini at gera onkran túr til Runavíkar og Fuglafjarðar. Uttastovugarðurin nú hevur fingið sær profil á Facebook, og her verður lýst um, hvørjir søludagarnir í ávikavist Vágs­botni, Runavík og Fuglafirði verða. – Tað er stórur áhugi fyri føroysku eplunum, og eg vil siga, at marknað­ ur­in er ómettiligur. Tað eru nógv, sum ringja um epli, og tað eru matstovur og fólk annars hjartaliga vælkomin at gera, men lættast er, tá møtt verður upp á nevndu sølustøðum. Ottar Hentze vísir á, at tað er hugnaligt at standa og selja føroyska grøði á marknaðarplássi, tí her kemur tú í prát við nógv viðskiftafólk. Røtur og gularøtur Ottar Hentze ásannar, at tiltakið við Veltuni í Sandoynni hevur eggjað til at velta meira í ár enn undanfarin ár. – Vit hava soleiðis eisini velt røtur og gularøtur í ár, og hesar hava vit eisini við okkum, tá vit fara út at selja. Fyri at finna út av, hvat riggar, er neyðugt at gera sær royndir. Bóndin sigur, at matstovur eisini spyrja eftir føroyskum eplum, rótum og gularótum Uttastovugarðurin í Trøðum á Sandi hevur telefonnummar 211870, og teldupostadressan er uttastov@ olivtant.fo Vilmund Jacobsen Eplafestivalurin í Trøðum á Sandi eydnaðist stak væl í fjør, og komandi leygardag verður tiltakið endurtikið. – Vit flettu nøkur lomb á eplafestivalinum í fjør, og vit fara aftur at fletta hesaferð. Øll, sum hava áhuga, eru hjartaliga vælkomin inn á gólvið. Jóannes Johannessen, Jóannes í Miðstovuni, róptur, sigur, at tey fara eisini at fletta nøkur lomb í hesi vikuni, og áðrenn eplafestivalurin verður. – Tað er eitt sindur verri at skera nýflett, og tí fara vit at hava bæði heil og sundurlimað lambskrov til sølu, meðan festivalurin er. Hann sigur, at hann í fjør heyst hevði nakað av fólki inni á gólvinum, og tað vóru eisini tey, sum keyptu føroyskt lambskjøt. – Fólk kunnu keypa tað, tey vilja, bæði heil krov, kjógv, bøgir og avroð. Í løtuni hava vit einki neytakjøt, men vit slakta leypandi. Tí kunnu fólk, sum ynskja sær neytakjøt, lata okkum vita. Jóannes í Miðstovuni sigur, at tey á garðinum eiga bæði nýupptikin sandepli og røtur, og hetta fæst eisini til keyps á eplafestivalinum. Góður seyður Seyðafellið, sum rakti nógvar bøndur í fjør, tá veturin var harður, og várið var vánaligt, rakti ikki garðin hjá miðstovubóndanum. – Fyri okkum var árið í fjør ikki eitt fellisár. Vit fingu at kalla líka nógv lomb sum eitt vanligt ár. Vit fóðra allan seyðin, og tí gjørdi vánaligi veturin og várið ikki so ilt við seyðin hjá okkum. Jóannes í Miðstovuni sigur, at í ár síggja lombini heilt væl út, og hann væntar, at skurðurin verður góður. – Vit fara at fletta stívliga 150 seyðir í heyst. Saman við arbeiðnum, sum er av eplunum við upptøku, skiljing og sølu, er hetta ein tíð, har rættilig rokan verður á garðinum, nú rakstur og fletting eisini stunda til. Tey, sum hava hug at spyrja seg fyri hjá miðstovubóndanum í Trøðum á Sandi, kunnu ringja á tlf. 220203. – Er tað soleiðis, at fólk eru her í Sandoynni og vitja, kunnu tey altíð seta seg í samband við garðin, leggur Jóannes í Miðstovuni aftrat. – Tað er eingin trupulleiki at sleppa av við seyða-og neytakjøt, sigur Ottar Hentze, sum rekur Uttastovugarðin í Trøðum á Sandi – Nú eplafestivalur verður leygardagin, fara vit at fletta, selja lambskjøt, og vit fara eisini at selja nýupptikin epli og røtur, sigur Jóannes í Miðstovuni, bóndi Føroyskt seyðakjøt selur væl Fara at fletta á eplafestivali Á innsettu myndini stendur Ottar Hentze og skilir eplir, sum Uttastovugarður í Trøðum selur – Fólk eru vælkomin at keypa tað, tey vilja, bæði heil krov, kjógv, bøgir og avroð, og vit hava eisini nýupptikin sandepli og røtur, sigur Jóannes í Miðstovuni Mynd: Vilmund Jacobsen