týsdagur 11. juli 2017síða 14

Mikudagur 12. juli 2017 · Nr. 80 14 Sosialurin E in mussur á G! bleiv til tvey børn og eitt hjúnalag. Lat okkum fortelja tær kærleikssøguna hjá Kára og Eir og fá samstundis vísindaligu frágreiðingina upp á, hví kærleikin blómar á G! Fleiri munnu tey vera, ið eiga minni um ein muss millum trongu húsaveggirnar í Syðrugøtu. Ella í onkrum tjaldi, har eingin sá. Onkur rodnar kanska, tá tey minnast aftur á at hava mussast frammanfyri eina rúgvu av konsertáhoyrarum. Hjá summum bleiv G! mussurin ikki til annað enn eitt fitt minni. Hjá øðrum varð júst henda stutta løtan avgerandi fyri, hvussu lívið framyvir háttaði sær.  Søguna um ein muss á G!, sum bleiv til tvey børn og skjótt eisini hjúnalag og hús, fært tú her.  Kári Jóannesarson á Høvdanum og Eir Hansen møttust á G! 2013 og eiga í dag tvey børn. Vikuskiftið eftir G! í ár skulu tey giftast, og í næstum fara tey at byggja hús. Árið var 2013. Eir las til sjúkrarøktarfrøðing í Danmark og arbeiddi í Effo støðini í Leirvík í summarferiuni. Kári lærdi til timburmann í Leirvík og hevði fingið gott eyga á Eir. Hann fann sær tí nógvar umberingar fyri at fara inn í Effostøðina í Leirvík í kaffisteðgunum. "Kári er fótbóltsdómari, og eg havi spælt fótbólt, so eg havi nokk eisini skeldað hann nakrar ferðir á vøllinum, áðrenn vit komu saman", greiðir Eir flennandi frá. Tey skrivaðu saman í eina tíð, men eingin tordi at taka fyrsta stigið. Eir hevði ongar ætlanir um at flyta heim til Føroya fyribils, og tí var hon ivasom, um tað fór at blíva til nakað meira. Kári greiðir frá, at hann sá okkurt í Eir allatíðina, og tí blivu tey við at skriva saman. Eir leggur afturat, at tey eisini vóru ein lítlan óskyldigan biltúr. Men av tí at tey ikki høvdu felags vinir, høvdu tey trupult við at finna eina umbering fyri at síggjast uttan fyri Effostøðina. Kanningar vísa, at vit ofta forelska okkum í støðum, har vit longu eru "tendrað". Hetta kann vera til mótmælisgongu, ítróttardyst ella tá vit eru á festivali, har veitsluhýrurin er í hásæti og tónleikurin ger sítt til, at fólk finna saman. Í summum førum er talan um startskotið til ein kærleika, sum heldur langt eftir festivalin, men í øðrum førum halda vit um høvdið morgunin eftir og angra onkra býtta avgerð. Kári er úr Syðrugøtu, og fyri flestu gøtufólk eigur G! festivalurin eitt heilt serligt pláss í hjartanum. Dagarnar framman undan festivalinum ganga fólk og rigga til, og ein hugnaligur hýrur verður millum bygdafólkið. Hetta árið var einki undantak, og at veðrið var so framúr gott hetta summarið, gjørdi tað bara enn betri. Fyrsti mussurin var á sandinum á G! Barndómshúsini hjá Kára liggja beint uttan fyri festivaløkið, og sum vant gingu fólk inn at vitja gjøgnum dagin. Hugnin um dagin bleiv til veitslu um kvøldið, og hetta eina kvøldið var lagið á Kára uppá sítt besta. Tónleikurin, føroyska summarnáttin og góða lagið skaptu ein spenning, og Kári var, sum hann sjálvur orðar seg: við uppá tað! Hann var farin oman á sandin til eina konsert, tá hann brádliga sá Eir standa nokk so aftaliga á sandinum saman við eini vinkonu. "Eg fór bara beint yvir og mussaði hana. Eg veit ikki, hví eg gjørdi tað. Men knappliga tordi eg.". Á festivalum valdar eitt slag av kropsligari frøi, sum kann broyta tær avgerðir, sum ein vanliga hevði tikið. Hendan frøin verður ikki minni av stimbrandi evnum so sum dukandi rútmum og rúsdrekka, sigur Asger Neumann, lektari í sálarfrøði á Aarhus Universiteti, sambært heimasíðuni hjá TV2.  Asger Neumann greiðir frá, at evolutiónástøðin arbeiðir stuttskygt og langskygt, tá vit velja okkum maka, og tá vit ferðast ella eru á festivali, kann stuttskygda ætlanin skjótt gera seg galdandi. Eir smílist forelskað uppá Kára, meðan hann greiðir frá. Tey royna at minnast, hvør tað var, sum spældi á sandinum undir fyrsta mussinum, men koma til ta niðurstøðu, at tey allarhelst hava verið meira áhugað í hvørjum øðrum enn tónleikinum. Hetta var fyrstu ferð, at Eir var á G!, men síðani hava tey bæði verið hvørt ár.  G! hevur fingið ein serligan týdning fyri meg, og hvørja ferð vit hava verið aftur, hava vit tosað um fyrsta mussin á sandinum", greiðir Eir frá.  Í apríl mánaði fyri tveimum árum síðan gjørdi Kári av at fríggja til Eir. Eitt tað fyrsta hann gjørdi aftaná var at ringja til fyriskipararnar av G! fyri at vita, nær festivalurin fór at liggja í 2017. Hann mátti tryggja sær, at tey ikki løgdu brúdleypið sama vikuskifti sum G!.  Í dag eiga Kári og Eir tvey børn, og 22. juli skulu tey giftast. Vígslan verður í Gøtu kirkju, og veitslan verður fyri 210 gestum í bygdarhúsinum í Leirvík. Kári og Eir greiða frá, at tey kenna eisini onnur pør, ið eru komin saman á G!, og tey vita um fleiri G!- børn, sum eru ávegis. Vilt tú økja um kjansin at finna tann einasta eina? Tryggja tær atgongumerki til ársins G! Festival á heimasíðuni gfestival.fo. NB: Brúdleyp og børn fylgja ikki við í keypinum. - G! FØRDI OKKUM SAMAN