týsdagur 26. september 2017síða 57

SEPTEMBER 2017 Lýsingablað frá Miðlahúsinum 25 HONDBÓLTUR 2017-2018 SOSIALURIN Marianna er við aftur VÍF-stórskjúttin, Marianna Holm Jacobsen, hevur drigist við eina ørgrynnu av skaðum, men hon er nú tilreiðar at royna einaferð enn. Og tað verður fyri fullum blástri, avdúkar hon. - Antin spæli eg, ella spæli eg ikki. Spæli eg, so spæli eg 100%, sigur Marianna Pætur Albinus 100% Stórskjúttin hjá VÍF, Marianna Holm Jacobsen, hevur verið darvað av bæði nógvum og drúgvum skaðum. Í fjør sat hon uttanfyri alt kappingarárið við einum slitnum krossbandi, men eftir eina drúgva uppvenjing er hon nú aftur før fyri at spæla. Mongu skaðarnar hava tó sett síni spor. – Ígjøgnum tey seinastu árini havi eg roynt so nógv við knøunum, at eg ikki kann annað enn at stúra fyri hvat fer at henda næstuferð, sigur Mari­anna, sum tó ikki letur óttan vinna á sær. – Tá eg spæli hondbólt havi eg ikki tíð at hugsa um hetta. Eg spæli eins og eg gjørdi áðrenn, hóast fleiri hava sagt, at eg burdi broytt mín spælistíl, sigur Marianna. – Antin spæli eg, ella spæli eg ikki. Spæli eg, so spæli eg 100%, sigur Marianna avgjørd. Hon sigur, at hon í løtuni fær spælt 100%, og hon vónar at tað fer at halda fram. – Viðvíkjandi knænum, so klári eg meg væl til venjingar, so ja, eg haldi eg fái spælt 100% til tað støðið eg eri á, sum nú er, sigur Marianna. Ikki lætt Marianna Holm Jacobsen hevur drigist við nógvar skaðar á hondbóltsleið síni. Umframt at hava slitið krossbandið tvær ferðir, so hevur hon eisini roynt at slitið liðbond í fótinum, brotið armin og havt álvarsligan bruna í arminum. Alt hetta hevur havt við sær, at hon hevur verið undir skurði til­samans seks ferðir. Nú hevur hon so enn einaferð vunnið á einum skaða, og eftir eitt heilt ár við uppvenjing er hon nú aftur til­reiðar at spæla hondbólt. – Árið hevur gingið øgiliga skjótt, men tað hevur ikki verið lætt allan vegin ígjøgnum. Knæið hevur í langa tíð ikki spælt av sum ætlað, og hevur uppvenjingin tí sjálvandi verið meira drúgv enn ynskt var. Eg eri m.a. blivin skurðviðgjørd aftur eftir nýggja krossbandið, og eg eri nú eisini bundin av einum skinnara, tá ið eg spæli, sigur Marianna. – Tá tað so er sagt, so havi eg gjørt alt fyri at vera klár til hetta kapp­ingar­árið við góðari hjálp og venj­ing frá fysioterapeuti, men eisini nógvari sjálvstøðugari venjing, sigur hon víðari. Sterkt lið Ein nýggjur leikari hjá VÍF í ár er danski strikuspælarin, Sarah Bank Bjerg, sum er ein góð vinkona hjá Marionnu. Tær hittust á hondbóltsakademinum SHEA í Skanderborg skúlaárið 2014/15. Tær báðar hava verið væl líka síðani, og nú er Sarah flutt til Føroya at búgva hjá Marionnu og spæla við VÍF. Marianna heldur, at tað eru útlit fyri at VÍF fer at standa seg betur enn tað fjórða plássið, sum tær úr Vestmanna fingu í landskappingini í fjør. – Ja, vit hava eitt gott og sterkt lið í ár. Við vón um, at vit ongar spælarar fara at missa, so vænti eg, at tað væl ber til hjá okkum at liggja millum tær fremstu, sigur Marianna. – Sjálv hati eg at tapa, og eg seti meg ikki nøgda við silvur ella tað sum er har undir, so eg fari at gera mítt fyri at fáa gull um hálsin, sigur hon og skoytir at enda upp í: – Um kroppurin loyvir tí. VENJARAR Ingi Olsen og Agnar Joensen MÁLVERJAR Steinbjarta Marnersdóttir, Ragnhild á Heygum og Kristina Griksaite ÚTILEIKARAR Randi Virgarsdóttir, Liljan Djurhuus, Marianna Holm Jacobsen, Agnas Olsen, Durita C. Jojic, Fríðrún Olsen, Ingibjørg Olsen, Kathe Dahl Fredriksen, Sarah Bank Bjerg, Jórun Gudmundsen, Lív Ingdorsdóttir, Tóra Seloy og Heidi Maria Akselsen