týsdagur 9. januar 2018síða 18

Mikudagur 10. januar 2018 · Nr. 4 18 Sosialurin Hugskot og viðmerkingar – send sms til 225000 Hjá Skála og NSÍ er líkt til, at hópurin til komandi kappingarár longu er komin uppá pláss André Olsen Um gott og væl tveir mánaðar fer besta mansdeildin – Betri deildin, sum hon nú á fyrsta sinni eitur - av bakkastokki aftur eftir ein vetrarsteðg síðani síðst í oktober. Sjey av 10 hava nýggjan venjara Síðani kappingarenda í oktober, er lutfalsliga nógv broytt hjá teimum flestu liðunum í deildini. Heili sjey av teimum 10 liðunum í Betri deildini, hava til komandi ár annan venjara, enn tey høvdu til farna kappingarár. Tað eru bert tey trý feløgini – KÍ, B36 og EB/Streymur, sum hava sama venjara til komandi kappingarár, sum tey høvdu til farna kappingarár. Størst útskifting á Skála – minst í Víkingi Eisini í teimum ymisku hópunum er stór útskifting hjá fleiri av feløgunum. Størst er hon hjá Skála, sum ikki hevur fingið færri enn sjey nýggjar leikarar knýttar at hópinum í vetur, har sjey leikarar eisini eru farnir úr hópinum frá farna kappingarárið. Í tí felagnum, har minst útskifting hevur verið í vetur, er hjá verandi føroyameistarunum í Víkingi. Har er higartil eingin nýggjur leikari knýttur at, meðan tveir leikarar eru farnir úr felagnum í vetur. Tó hevur útskifting verið framd á venjarasíðuni hjá Víkingi, og nógv bendir á, at Víkingur fer at fáa styrk afturat hópinum í nærmastu framtíð. Sum skilst, bendir nógv á, at talan fer at vera um útlendskan styrk. Framtíðin hjá fleiri leikarum ógreið Hóast framtíðin hjá teimum flestu leikarunum er greið, eru tað tó nakrir leikarar, ið enn ikki hava tikið avgerð um sína fótbóltsframtíð. Hjá Víkingi er millum annað fleiri ivamál. Har er ikki greitt enn, um Hanus Jacobsen, Gert Hansen og Erling Jacobsen fara at vera partur av Víkinga liðnum komandi kappingarár – tó at tað er nógv meira, ið bendir á, at teir fara at spæla við. Eisini valdar óvissa um Fróða Benjaminsen. Í samrøðu við Norðlýsið mánadagin, segði Fróði Benjaminsen, at hann enn ikki hevði tikið nakra avgerð um sína fótbóltsframtíð – og at hann ikki var heilt greiður yvir enn, um hann fór at spæla komandi kappingarár. Av øðrum leikarum er millum annað Michal Przbylski – sum í fjør var valdur til ársins unga leikara – heldur ikki knýttur at nøkrum felagið í verandi støðu. Í løtuni venur Michal Przybylski við barndómsfelagnum, B68, men tað tykist heilt víst, at hann ikki fer at spæla har komandi kappingarár. Heldur ikki Tórður Thomsen, sum seinastu árini hevur staðið í mál hjá B36, er í løtuni knýttur at nøkrum felagið. Oddaliðini fáa meira styrk Sum støðan er í løtuni hjá teimum ymisku feløgunum, tykist tað sum um, at fleiri av feløgunum, sum í fjør endaðu millum fimm tey ovastu, fara at gera fleiri broytingar. Tað einasta av feløgunum úr ovaru hálvu, ið tykist at hava fingið allan hópin uppá pláss er NSÍ. Har verður ikki roknað við stórvegis av broytingum í mun til hópin sum hann sær út í dag. Úr Víkingi og KÍ ljóðar at ein ella tveir útlendskir leikarar vera knýttir at hópinum afturat. Tað ger tað eisini í HB, har íslendski venjarin, Heimir Guðjónsson, hevur úttala seg til íslendskar miðlar, at hann hevur ætlanir um at knýta í øllum førum tveir íslendskar leikarar afturat hópinum. Hjá B36 tykist tað mesta vera komið uppá pláss, tó at felagið helst skal út at finna ein nýggjan áleypara, eftir at Patrik Johannesen komandi kappingarár fer at spæla í norskum fótbólti. Sum skilst hevur B36 verið í samráðingum við fyrrverandi 07 Vestur áleyparan, Søren Nielsen, men tað er ikki líkt til, at tær samráðingarnar ikki hava borið á mál. Eftir 1 februar vera tey flestu helst klókari uppá teir ymisku hóparnar í Betri deildini. Tá stongir útlendska flytingarvindeygað, og sum skilst er lættari hjá føroyskum feløgum tá at fáa fatur á útlendskum profilum, sum ikki eru knýttir at nøkrum felagið. andre@sosialurin.fo Yvirlit yvir flytingar hjá feløgunum í Betri deildini í vetur: VÍKINGUR: Tilgongd: Maurice Ross (Venjari) Frágongd: Sámal Erik Hentze (Venjari), Sorin Anghel, Hans Pauli Samuelsen KÍ: Tilgongd: Kristoffur Jakobsen, Hákun Edmundsson, Deni Pavlovic  Frágongd: Jonas F. Rasmussen, Ahmed Mujdragic, Atli Danielsen  B36:  Tilgongd: Trygvi Askham, Jónas Tór Næs Frágongd: Tórður Thomsen, Gestur B. Dam, Pætur Petersen, Patrik Johannesen NSÍ: Tilgongd: Sámal Erik Hentze (Venjari), Johan Troest Davidsen, Øssur M. Dalbúð, Andras Gango  Frágongd: Anders Gerber (Venjari), Jann Ellingsgaard, Haraldur Højgaard, Monrad H. Jacobsen, Karstin Hansen  HB: Tilgongd: Heimir Guðjónsson (Venjari), Dan í Soylu, Ari M. Olsen, John Frederiksen  Frágongd: Sigfríður S. Clementsen (Venjari), Jóhan Troest Davidsen, Rókur av Fløtum Jespersen, Ári Mohr Jónsson, Øssur Dalbúð  SKÁLA:  Tilgongd: Eyðun Klakstein (Venjari), Ahmed Mujdragic, Haraldur Højgaard, Karstin Hansen, Monrad H. Jacobsen, Heðin Klakstein, Jákup Højgaard, Niels Pauli Danielsen   Frágongd: Pauli Poulsen (Venjari), Valerian Iobashvili, Mamuka Torondjadze, André Olsen, Jann Martin Mortensen, Hákun Edmundsson, Jónhard Frederiksberg, Andras Gango EB/STREYMUR: Tilgongd: Ari Ó. Ellingsgaard, Gestur B. Dam, Pætur Petersen, Oddur Højgaard, Hans Pauli Samuelsen  Frágongd: Sjúrður Jacobsen, Ari M. Olsen, Trygvi Askham, Dan í Soylu, Tóki á Lofti, Árni Grunnveit Olsen  TB/FCS/ROYN: Tilgongd: Glenn Ståhl (Venjari), Milos Budakovic, Dennis Nielsen, Isaac Shaze Frágongd: Maurice Ross (Venjari), Marius Berntzen, Mats Walberg, Anton Holse, Jón Krosslá Poulsen  07 VESTUR:  Tilgongd: Pauli Poulsen (Venjari), Jón Krosslá Poulsen, Ndende Adama Gueye  Frágongd: Trygvi Mortensen (Venjari), Holgar Durhuus, Søren Nielsen, Pål Fjelde, John Frederiksen  AB: Tilgongd: Sorin Anghel (Venjari), Árni Grunnveit Olsen, Tóki á Lofti Frágongd: Kári Reynheim (Venjari), Teitur Jóanesarson STØRST ÚTSKIFTING ER Á SKÁLA Tað er stór útskifting í Betri deildini til komandi kappingarár. Sjey av 10 feløgum hava nýggjan venjara, og hjá fleiri av feløgunum er stór útskifting eisini í leikarahópunum