mánadagur 30. apríl 2018síða 13

13 Mánadagur 6. januar 2014 · Nr. 2 Sosialurin Mánadagur 30. apríl 2018 · Nr. 48 Hugskot og viðmerkingar – send sms til 225000 STUTTSØGD Ungar flogbóltsgentur hava fingið dreymabyrjan upp á EM-kapping í Liktinstein, og so hevur tað eisini verið eitt gott vikuskifti hjá føroyskum útisetum í fótbólti Pætur Albinus FÓTBÓLTUR Tað gongur sum eftir ánni hjá norska Brann, har Gilli Rólantsson spælir og eisini hevur stóran leiklut. Hesaferð var Bergen- liðið á vitjan hjá Sandefjord, og har bleiv tað til ein 1-0-sigur við máli frá Peter Orry Larsen. Gilli, sum nærum bara hevur spælt á vonginum í Brann, spældi hesaferð á vinstra bakki – eitt leikpláss, ið hann er vanur frá tíðini í danska AaB. Við sigrinum á Sandefjord í gjár er ósigraða Brann framvegis greitt oddalið við 19 stigum, fimm stig frammanfyri stórfelagið, Rosenborg. Næsti dystur hjá Brann verður leygardagin á heimavølli ímóti Tromsø. Besta íslendska deildin, Pepsideildin, byrjaði aftur um vikuskiftið, og í allarfyrsta umfari var tað føroyingauppgerð ímillum Grindavík og FH. René Shaki Joensen byrjaði inni hjá Grindavík, meðan Gunnar Nielsen sum vant byrjaði í málinum hjá FH. FH vann dystin 1-0 við máli frá Steven Lennon. Brandur Hendriksson varð innskiftur í seinna hálvleiki og fekk harvið sín fyrsta dyst fyri FH. ÍBV, har Kaj Leo í Bartalsstovu spælir, tapti 4-1 ímóti Breiðablik. Kaj Leo skoraði málið hjá ÍBV. Talan var um eitt gott langskot úr 30 metrum, ið javnaði til 1-1, men Breiðablik rann avstað ímóti dystarenda og fekk greiða sigurin. Í næstbestu norsku deildini vóru tveir føroyingar í dysti um vikuskiftið. Oddaliðið, Aalesund, sum hevur Molde-leigaða Sonna Ragnar Nattestad á liðnum, vann 3-1 ímóti Kongsvinger og er á fyrsta plássi, eitt stig frammanfyri Viking og tvey stig frammanfyri Sandnes Ulf, sum hevur Ára Mohr Jónsson á liðnum. Ári og teir spældu hesaferð 0-0-javnleik ímóti Jerv. Hetta var triðju ferð á rað, at Sandnes Ulf helt málið reint, so sigast má, at verjuketan, ið hevur Ára Mohr Jónsson á vinstra bakki, hevur staðið seg væl higartil. Triði føroyingurin í næstbestu norsku deildini, Patrik Johannesen í Florø, spældi ikki við í 3-1-tapi ímóti Åsane, tí at hann má sita uttanfyri í nakrar vikur við einum knæskaða. Vejle og Viljormur Davidsen nærkast uppflyting til Superliguna. Leygardagin bleiv tað til sera týdningarmiklan 1-0-sigur á útivølli ímóti einum av kappingarneytunum, Viborg. Viljormur spældi við allan dystin í hesum sigrinum, sum syrgir fyri, at teir framvegis eru á fyrsta plássi, eitt stig frammanfyri Esbjerg og fimm stig frá at í minsta lagi koma við í uppflytingarspælið. Fýra dystir eru eftir at spæla, og Vejle møtir liðum, sum eru nummar seks og longri niðri á stigatalvuni. Heini Vatnsdal var við hjá Fremad Amager í 3-2-tapi ímóti Nykøbing, meðan Jákup Thomsen og liðfelagarnir í Thisted taptu 3-1 ímóti FC Roskilde. FLOGBÓLTUR Føroyska U19-landsliðið hjá gentum fekk eina góða byrjan upp á EM-kappingina, sum tær spæla í Liktinstein í hesum døgum. Fyrsti dysturin var ímóti Skottlandi í gjár, har Føroyar, hóast eitt tapt fyrsta sett, vóru omaná tá ið saman um kom. Skottland vann fyrsta sett 25-21, men Føroyar svaraðu aftur við sama úrslitið og javnaði til 1-1 umvegis 25-21. Triðja settið gjørdist sera spennandi, har liðini fylgdust frá 17-17 og skiftust um at vera frammanfyri, men Føroyar vunnu tó at enda settið 27-25 og kom harvið á odda 2-1 í settum. Seinasta settið var rein uppvísing frá Føroyum. Hetta settið endaði 25-14, og harvið hava Føroyar tryggjað sær fyrstu stigini og eina dreymabyrjan upp á kappingina. Næsti dystur hjá Føroyum verður í í dag, mánadagin kl.15.00 ímóti Luksemburg, sum verður mett at verða eitt tað sterkasta liðið í bólkinum. Fjórða liðið í bólkinum er Wales, sum Føroyar spælir ímóti í morgin kl.15.00. HONDBÓLTUR Kvinnuliðið hjá Neistanum, sum í júst farna kappingarárinum endaði á fjórða plássi, hevur fingið greiðu á venjaraspurningin til komandi kappingarár. Birgir Hansen, sum tók við sum venjari í hesum kappingarárinum, heldur fram í sessinum og afturat sær fær hann eisini Kára Nielsen, sum – serliga saman við Birgiri – er bæði royndur og kendur í venjaraumhvørvinum. - Nakað av venjaraskifti hevur verið tey seinastu tvey árini hjá kvinnunum. Tí eru vit fegin um, at kvinnurnar saman við Birgiri, Kára og Eiriki (Magnussen, liðleikara, red.) kunnu arbeiða víðari við teirra menningarætlan. Ein tilgongd, sum vónandi um ikki alt ov langa tíð førir kvinnurnar upp á tindarnar aftur, skrivar Neistin. SÚKKLING Torkil Veyhe og liðfelagarnir í Team Virtu Cycling luttóku í gjár í donsku kappingini, GP Himmerland, har súkklararnir skuldu súkkla 199 kilometrar. Torkil Veyhe hevði ein leiklut sum hjálpari, men tað gekst ikki heilt eftir vild hjá Torkili og teimum hesaferð á teininum, sum var darvaður av oysregni. - Tað var ein harður, kaldur og skitin teinur, og ætlan okkara var at súkkla fyri Asbjørn (Kragh, red.), men eftir at hann var punkteraður og á veg aftur í feltið, so datt hann, og so hvurvu møguleikarnir fyri einum góðum úrsliti. Í morgin er aftur ein dagur, og vit vóna, at eydnan er við okkum tá, sigur Torkil Veyhe um kappingina í gjár. Tað var André Looij frá liðnum MonkeyTown, sum vann kappingina í einum spurti. Í næstu viku leggja Torkil Veyhe og teir leiðina til Fraklands, har teir frá hósdegnum og fram til sunnudagin fara at kappast í kappingini Rhône-Alpes Isère Tour. U19 vann ímóti Skottlandi F.v.: Jakobina Joensen (KÍF) og Inga Helena Henriksen (SÍ)