mikudagur 29. mai 2019síða 34

VINNUBLAÐIÐ HJÁ MIÐLAHÚSINUM 10 mai 2019 31 Krás á marknaðin við nýggjum matvørum - MILLUM VØRURNAR, SUM VIT FRAMLEIÐA FYRI P/F POUL HANSEN HEILSØLU, ER EISINI FLAGGSKIPIÐ HJÁ OKKUM, KRÁS LIVURPOSTEI, SUM MONG META VERA HEIMSINS BESTA, SIGUR ALBERG GAARDLYKKE, DAGLIGUR LEIÐARI Á MATVØRUVIRKINUM KRÁS Vilmund Jacobsen Hvør er í stuttum søgan aftan fyri matvøruvirkið Krás? - Krás er staðsett á bryggjuni í Hósvík, og eigari er P/F Poul Hansen Heilsøla. Fyritøkan byrjaði inni á gólvinum hjá PH Heilsølu tíðliga í áttatiárunum og kom ikki til Hósvíkar fyrr enn í 2003. Tá var MBM Kjøt í bygninginum. Alberg Gaardlykke, dagligur leiðari í Krás, vísir á, at MBM Kjøt og Krás samstarvaðu í eina tíð, men so valdi MBM av gevast við sínum virksemi við kjøti. - P/F Poul Hansen yvirtók bygningin í 2004 og hevur rikið virksemið síðan, sigur hann. Á Krás eru umleið 13 ársverk í løtuni. Her eru fýra konufólk og níggju mannfólk. - Men, vit kundu væl verið fleiri í løtuni, tí her er nógv at gera, sigur dagligi leiðarin. Hann vísir á, at umstøðurnar á virkinum í dag eru sera góðar. - Vit bygdu eina sláturhøll upp í virkið vest­ur eftir í 2009, og í 2017 bygdu vit upp í goymsluna til køling og frysting og turr­ goymslu suður eftir, sigur Alberg Gaardlykke. Serliga døgurðamatur Men, hvørjar eru so høvuðsvørurnar hjá Krás, og kann onkur vøra kallast ”flaggskipið” fram um aðrar? - Høvuðsframleiðslan er døgurðamatur, sum fer út til handlarnar og soleiðis út til privat­brúkaran. Í øðrum lagi framleiða vit til kant­inur og matstovur, og í triðja lagi framleiða vit lagurvørur av ymiskum slagi til P/F Poul Hansen Heilsølu. Alberg Gaardlykke sigur, at millum lagur­ vørurnar er tað, tey kunnu rópa flagg­skipið hjá framleiðsluvirkinum. - Her hugsi eg sjálvandi um Krás livurpostei, sum mong meta vera heimsins besta livur­ postei. Vørurnar hjá matvøruvirkinum í Hósvík fara um alt landið. Framleiða ”convience” Eru nakrar nýggjar vørur komnar seinnu árini, og er væntandi, at okkurt nýtt fer at koma? - Av nýggjum vørum kann nevnast, at vit eru farin at framleiða tað, sum rópt verður ”convience”, ið verður leverað sum liðugtvøra á einum alubakka. Vøran á hvørjum bakka sær er ætlað til eini 2-3 fólk, og bakkarnir skulu einans setast í ovnin í einar 30-45 minuttir. So er maturin klárur at seta á borðið. Alberg Gaardlykke sigur, at enn er talan bert um fáar vørur, og enn røkkur framleiðslan av ”convience” bert til nakrar handlar. - Men, vit ætla, at øllum skal standa í boði at keypa hesar vørur, og vit ætla eisini, at fleiri ymiskar vørur av slíkum slag skjótt verða á marknaðinum. Vanta fólk á Krás Sum skilst á dagliga leiðaranum á Krás, hava handlarnir higartil tikið sera væl ímóti nýggju vøruni – ja, teir hava faktiskt tikið so væl ímóti henni, at Krás vantar fólk til framleiðsluna av ”convience”. - So, um onkur lesur hetta, sum hevur hug at royna seg á hesum øki, eru fólk vælkomin at seta seg í samband við okkum, sigur Alberg Gaardlykke. Tá vit hyggja nærri at, hvat orðið ”convience” merkir, koma vit eftir, at ”convience food” í beinleiðis umseting merkir ”komfortmad”, og hyggja vit so eftir orðinum ”komfort”, merkir tað í vanligari umseting hentleiki. Hetta eru tískil skundverðar, sum er heitur matur eftir stuttari løtu. - Nú eru vit eisini farin at framleiða tað, sum rópt verður ”convience”, ið verður leverað sum liðugtvøra á einum alubakka, sigur Alberg Gaardlykke, dagligur leiðari í Krás Krás er eisini veitari av nógvum ymiskum kjøtvørum, bæði útlendskum og føroyskum