týsdagur 3. september 2019síða 34

NR. 101 • 4. SEPTEMBER 2019 10 Leif Sørensen í Mentanarhúsinum Í nøkur ár hevur tað verið fastur táttur hjá fleiri at fara út at eta eina gourmet máltið frá Leif Sørensen á Mentanardøgunum. Leif hevur havt pop-up matstovu á ymiskum, forkunnugum støðum í Fuglafirði, har vitjandi hava fingið høvi at royna eina spennandi matarskrá við fleiri spennandi rættum. Hesi matstøðini hava ofta verið smá og køksviðurskiftini eitt sindur avbjóðandi fyri ein royndan kokk. Men í ár fer Leif at hava eina meira óhátíðarliga kafé í Mentanarhúsinum og fær góða køkin har at dusa sær í. Upplatingartíðirnar hjá honum vera væl longri, enn vit hava verið von við, og sostatt fáa enn fleiri møguleikan at royna framúr góða matin hjá Leif. Kaféin fer at bjóða eina meira fjølbroytta matarskrá, sum kann gleða ein stóran skara av gómum. Leif byrjar longu hóskvøldið, tá fleiri leskiligir nátturðarættir og salat verða at velja ímillum fyri ein sámuligan prís. Hetta er eitt upplagt kvøld hjá familjuni at taka sær av løttum í hugnaligum kørmum, áðrenn Mentanardagarnir av álvara byrja. Fríggjadagin verður longu opið á døgurða við góðum rættum at velja ímillum, so her er upp­lagt hjá arbeiðsplássum at fara út at eta saman ella hjá vinfólkum at hittast eina løtu. Opið er allan dagin við góðum tilboðum, og um kvøldið ber til at fáa sær eina tvey- ella trý- rætta úrvalsmatarskrá áðrenn Eivør konsertina. Leygardagin er kaféin opin allan dagin, og byrjað verður við einum góðum brunch-borðið. Seinna­partin er kaffi og køkur á skránni, og um kvøldið er aftur ein góð tvey- ella trý-rætta matar­skrá. Sunnudagin ber aftur til at fara út at eta ein góðan døgurða við tveimum ella trimum rættum ella at fáa kaffi og køku. Av tí at matarlepin broytist hvønn dag, ber til at eta hjá Leif fleiri ferðir og framvegis royna okk­urt nýtt. Frá føðing til deyða á Bókasavninum Á hugnaliga Bókasavninum í gamla skúl­ anum frá 1882, sum liggur so tign­ar­liga við vegin millum bátahylin, mið­stað­ar­ lundina og kirkjuna, plaga eisini at vera ymisk mentanarlig tiltøk á Mentanardøgunum. Her ein dokumentarfilmur um føðing fyrsta dagin og ein blíð barnasøga um deyðan seinasta dagin. Hósdagin kl. 18 kemur filmmakarin Ther­ esa Jákupsdóttir á vitjan at vísa okkum doku­ ment­arfilmin Verkir. Filmurin er ein verkætlan hjá henni og systurini, Karina Jákupsdóttir, um gongdina í Føroyum frá teirri tíðini, tá tað at eiga var ein privat hending, sum gekk fyri seg í heiminum, og har jarðarmóðirin kom til kvinnuna og ikki øvugt, til ta tíðina, tá tað gjørdist alt meira vanligt at kvinnan fór á sjúkrahúsið at eiga og vakthavandi jarðarmóðurin kom inn á stovuna. Í dag sæst eitt vaksandi rák, har kvinn­ur heldur vilja eiga heima aftur. Filmurin er bygdur á samrøður við jarðarmøður, kvinnur sum hava átt, lækna og pápa, umframt hagtøl. Hetta er ein sera góður dokumentarfilmur, og tað stuttliga er, at fleiri kvinnur úr Fuglafirði eru við – bæði ein jarðarmóður, ein mamma við nógvum børnum og ymiskum royndum við føð­ ing­um og ein ung mamma, sum valdið at eiga næsta barnið heima. Avmarkað pláss er til sýn­ ing­ina, men atgongumerki fáast á www.mh.fo fyri kr. 70 Sunnudagin kl. 16 kemur rithøvundurin og marionett­eaturstjórin Rakel Helmsdal á gátt at lesa úr nýggjastu søgu sínari, Loftar tú mær – ein blíð søga um deyðan. Bókin er ikki komin út enn, men er farin til prentingar, so vit eru millum tey fyrstu, sum fáa høvi at hoyra søguna og at síggja framúr dragandi myndirnar. Rakel er ótrúliga kreativ og hevur fantastiskt hugflog, so hon hevur sjálv skapað figurarnar, sum vit síggja á myndunum og alt umhvørvið, sum tær búleikast í. Inniliga og nemandi søguløtan tekur uml. 30-40 min., og hóskar seg til øll børn, sum eru von at hoyra søgur, og teirra vaksnu. Avmarkað pláss er til sýningina, men atgongu­ merkið fáast á www.mh.fo fyri kr. 30