týsdagur 17. september 2019síða 32

SEPTEMBER 2019 8 HONDBÓLTUR 2019/20 Vaknar Stjørnan í ár? Seinastu kappingarárini hevur Stjørnan verið undir endurbygnaði. Tað er ikki væntað at tað verður í ár at Stjørnan kemur í oddin aftur, men har eru spennandi leikarar í hópinum Tóra vil spæla við har tað er stuttligt -Vit vóna sjálvandi betri úrslit enn í fjør, sigur Tóra Eliasen, ið telist ímillum profilarnar í Stjørnuni. Vinstri vongurin var eisini einasti Stjørnuleikari at vera úttikin til landsliðið farna kappingarár, og hon hevur góðar vónir til hetta kappingarárið. -Vit hava nakað tað sama fólkið. Annika fer at fjakka, men vit hava millum annað fingið Jansy Jakobsen við aftur, og tað verður vónandi ein stórur styrkur, sigur Tóra og greiðir frá, at tað bøtir um spælið at hava ein góðan bakk sum er lámur. Seinasta kappingarár taldist Tóra ímillum profilarnar á Sjørnuliðnum, og hon vónar at tað verður enn betri í ár. - Eg vóni í øllum førum at eg kann bjóða mína styrki til liðið. Tóra Eliasen er avgjørd um at liðið í ár skal byggja á tær góðu løturnar frá undanfarna kappingarárið, har tað millum annað eydnaðist at koma í hálvfinalurnar í steypakappingini. - Verjan skal rigga. Hon riggaði nokkso væl í fjør, meðan vit gjarna vilja hava álopið at koyra betri og sjálvandi vera betri at skora upp á okkara kjansir, greiðir vongurin frá. Málið hjá Tóru og Stjørnuni er einfalt í ár. Tær vilja vinna fleiri dystir og so kanska verða við har tað er stuttligt at vera, greiðir hon frá. Stjørnan prógvaði at tær kundu spæla ímóti teimum fýra fremstu í fjør tá ið tað eydnaðist at koma í hálvfinaluna í steypakappingini, og nýggi kappingarleisturin gevur sjálvandi eisini vón um at spæla hálvfinalur í landskappingini. - Sjálvandi vóna vit tað, flennir Tóra Eliasen at enda. Tað er stuttligt at spæla í Stjørnuni - Eg vænti ikki at eg verði tann sum fari at spæla mest, brosar Oddvør Josephsen, ið er ein av ungu leikarunum í Stjørnuni. Skjótleikin er ein styrki, tí Oddvør vann eitt nú bronsu í 400 metra boðrenning á Oyggjaleikunum í summar. Oddvør greiðir frá, at Sonja Lava Sirdal spælir fyri tað mesta, men at Oddvør er til reiðar at koma inn tá tað skal vera. Samanhaldið í hópinum er eisini ein styrki hjá Stjørnuni. Oddvør greiðir frá, at at tær flestu eru rættiliga ungar, allar eru fittar og tað er lætt og hugaligt at vera ungur leikari í Stjørnuni. Ynski í ár er at fyrst og fremst at gera tað betri enn í fjør, og liðið hevur ikki sett sær ítøkiligari mál enn tað. Leikarar hava kortini síni persónligu mál, og sum ungur leikari vónar Oddvør at megna at spæla seg fastari inn á liðið. - Eg kom við ímóti endanum í fjør, so eg vóni at spæla fleiri dystir í ár. Lykilin er eindanfaldur staðfestur Oddvør at enda. - Tað er bara at venja hondbólt og styrki. Venjarin er fegin um menningina - Okkara vón er at vit lyfta avrikini hjá okkum í ár, og so síggja vit hvussu langt tað røkkur, sigur Per Klarup, venjari hjá Stjørnuni. Venjarin hugsar at kappingin kanska verður javnari og meira opin, men hvar liðini fara at liggja við kappingarenda er trupult at spáa um. Fyrireikingarnar til kappingarárið hava eisini verið avbjóðandi: - Vit hava skaddar leikarar, Óluva hevur brotið beinið, Jansy er júst byrja aftur eftir barnsburð og aðrar hava eisini stríðst við at gerast til reiðar. Onkur hevur fótbólt enn, Annika fer at fjakka, so vit mugu taka kappingina stig fyri stig, og so seta vit okkum nýggj mál eftir fyrsta triðingin av kappingini, sigur Per Klarup. Kappingarleisturin við hálvfinalum er ikki nakar uggi. Per Klarup leggur dent á at liðini bert hava 18 dystir at spæla seg í topp-4, so tað snýr seg í roynd og veru um at skava stig saman beinanvegin. Venjarin iðrar seg eisini nakað um at liðið ikki hevur verið á venjingarlegu soleiðis sum Stjørnan var í Danmark í fjør, og liðið hevur ikki spælt nógvar venjingardystir. - Tað merkir at vit kanska eru eitt hálvt fet aftanfyri í samanspælinum, men kropsliga og orkuliga eru vit sera væl við, staðfestir Per Klarup. Lykilin til at Stjørnan skal fáa eitt gott kappingarár er, at nýggju spælskipanirnar sum liðið arbeiðir við fara at rigga. - Fáa vit okkara ætlanir at rigga, so kann tað fara at síggja sera gott út, sigur venjarin spentur. - Eg havi sagt við genturnar at tá ið vit røkka okkara besta støðið eru tað ikki nógv lið sum fáa vart seg, men har er eitt sindur ov langt ímillum snapsarnar, um eg kann siga so, førir venjarin fram. - Eg havi verið nøgdur í øllum trimum kappingarárinum eg havi verið her higartil, eg haldi vit hava havt eina øgiliga menning í spælskili og bóltførleika. Um eg síggi at vit taka enn eitt fet víðari, so verið eg ovurfegin, sigur Per Klarup at enda. Stjørnan Stovnað: 1932 Føroyameistaraheiti: 9 (1945, 1958, 1977, 2000, 2004, 2006, 2007, 2008, 2010) Steypasigrar: 7 (2004, 2005, 2007, 2008, 2009, 2010, 2012) Kappingarárið 2018/19: Nummar 5 í landskappingini og hálvfinala í steypakappingini Raluca Ungureanu Málverji Birita Ryan Málverji Annika Magnusdóttir Arge Málverji Jetta Svøðstein Málverji Tóra Jansdóttir Norðá Strika Anna Jacobsen Strika Rannvá R. Jacobsen Strika Barbara Wigant Eysturdal Bakkur Sonja Lava Sirdal Bakkur Katrin Bertholdsen Bakkur Mina Naomi Lava Sirdal Bakkur Jansy H. Jacobsen Bakkur Óluva Allansdóttir Joensen Bakkur Oddvør Josephsen Bakkur Jorun Bech Nielsen Bakkur Vár Heimustovu Bakkur Monika P. Jacobsen Bakkur Marið Heimustovu Vongur Tóra Eliasen Vongur Sanna Jacobsen Vongur Maria Biskoptø Vongur Miriam Bethuelsdottir Vongur Joan Sørensen Vongur Julia Høgnesen Vongur Ingi metir Nummar 5 Tær eru blivnar betri og betri, men tær eru sera tengdar av málverja og trimum útileikarum og har er lítil góðska at skifta inn. Men tá ið tað koyrir væl í Klaksvík kunnu tær arga tey stóru. Stjørnan manglar kanska ein ordiligan profil. Sosialurin tippar Nummar 6 Tá ið tær eru góðar eru tær góðar, men teir fáu dystirnar eg sá tær spæla í fjør vóru sjáldan teir góðu dystirnir. Tað er sera tepurt at tippa tær, og tær kunnu í roynd og veru eisini enda við at hótta fjórða plássi. Fáa tær støðugari góðskuna fram, verður hetta ein skeiv tipping.