týsdagur 1. oktober 2019síða 30

Mikudagur 2. oktober 2019 · Nr. 113 30 Sosialurin Hugskot og viðmerkingar – send sms til 225000 TÍÐINDI Tróndur Arge – Tórsvøllur Lars Olsen, landsliðsvenjari, hevur úttikið hópin sum skal spæla móti Rumenia og Malta á Tórsvølli 12. og 15. oktober. Stóra søgan er, at Lars Olsen móti endanum av fundinum boðaði frá, at ikki heldur fram sum landsliðsvenjari eftir hesa EM-undankappingina. Hin søgan er, at Jóannes K. Danielsen úr KÍ og Adrian Justinussen úr HB eru nýggir á landsliðnum. -Tað er ótrúliga stórt og tað er eisini nakað, sum eg havi hugsa um síðani eg var smádrongur. Tað er eisini eitt mál, sum eg havi sett mær, men eisini eitt so stórt mál, at eg næstan ikki tordi at droyma um tað, tá eg var yngri. Nú eri eg so her og tað eri eg takksamur fyri, sigur Jóannes K. Danielsen Leita eftir høgra bakki Tað hevur í eina tíð verið leitað eftir einum høgra bakki. Tá Nations League byrjaði var tað leirvíkingurin Gunnar Vatnhamar, sum fekk plássið. Eftir tveir góðkendar dystir bleiv hann offur fyri, at Gilli Rólantsson fann seg til rættis á høgra bakki. Til dystirnar móti Svøríki og Spania mátti Gilli Rólantsson geva avboð. Nýggjur maður á høgra bakkinum var Hørður Askham. Men ólukkutíð so sleit hann krossbandið í seinasta minuttinum av dystinum. Til dystin móti Spania broytti Lars Olsen spælskipan til 3-4-3, sum mangan endar sum 5-4-1, tí okkara lið verður trýst aftur á egna hálvu. Tá spældi Sølvi Vatnhamar á vongbakkinum. Tað er bara ein fyribils loysn, har nýtt blóð skal finnast. Eftir nógv tos er valið nú endað á 22 ára gamla Jóannes Kalsø Danielsen. At síggja til er hann nú annað væl á høgra bakki og høgra vongbakki. -Eg havi vónað tað og fingið okkurt prik frá vinmonnunum, men nú hendi tað so. Eg eri 22 ár og tað er ein ungur aldur a koma á landsliðið. Tað eri eg stoltur av, sigur Jóannes K. Danielsen. Hann er upprunaliga ikki høgri bakkur, men ein dystur um summarið 2017 broytti alt. - Mikkjal (Thomassen, venjari hjá KÍ, blaðm) setti meg á høgra bakkin ein dyst eftir summarferiuna í 2017, og eg bleiv bara verandi. Eg haldi ikki tað var ætlanin hjá mær, men eg treivst beinanvegin á plássinum, fortelur klaksvíkingurin, sum mennist á plássinum fyri hvønn dyst. - Tá tú ikki hevur spælt høgri bakkur so leingi, so mennist tú fyri hvønn dyst, sum tú spælir. Tað er spennandi, sigur Jóannes. Sær upp til Rógva og Atla Tað var ein tíð, har KÍ altíð átti nógvar landsliðsspælarar. Brøðurnir Kurt og Allan Mørkøre vóru við frá byrjan í Landskrona, og menn sum Jákup Mikkelsen og Todi Jónsson teljast millum okkara drúgvastu. 22 ára gamli Jónnes K. Danielsen hevur altíð havt eitt gott eyga á landsliðnum. Hann hevur eisini fyrimyndir á landsliðnum, sum eru úr Klaksvík. -Tað eru sjálvandi klaksvíkingarnir á landsliðnum, sum eru nakað serligt fyri okkum. Eg kann nevna Rógva Jacobsen, sum skoraði nógv mál á landsliðnum. Atla Danielsen er ein annar, sum vit hava sæð upp til. Hann er venjari hjá mær nú, sigur høgri bakkurin hjá KÍ, sum altíð hevur verið spentur til landsdystir. - Tað er ótrúliga spennandi. Tá eg var yngri gleddi eg meg eisini altíð til næstan landsdyst. Tað var eisini stórt at sita á Tórsvølli og hyggja, og nú eri eg so við, sigur Jóannes. Eftir eitt tíðarskeið við fáaum klaksvíkingum og KÍ arum á landsliðnum, er KÍ nú best umboðað liðið í hópinum við Kristiani Joensen, Jóannesi Bjartalíð, Patriki Johannesen og Jóannesi K. Danielsen. -Eg fekk eitt prik um, at nú eru allir føroyingarnir í KÍ á landsliðnum. Tað er ikki so galið, men tað er stuttligt at vit hava so nógvar landsliðsspælarar. Eg haldi at allir spælararnir hjá KÍ hava lyft støðið í ár. Serliga til dystirnar í Evropa, har vit fáa nøkur ótrúliga góð úrslit. Kanska lyftu vit okkum á eitt stig, sum vit ikki vistu av at vit kundu. Tað sæst aftur á úrslitunum, sigur Jóannes. Kom ikki á landsliðið fyrr enn U21 Evnini hjá Jóannesi K. Danislen hava leingi verið eyðsýnd fyri tey í Klaksvík, men hann megnði ongantíð at spæla seg á yngru landsliðini. Tað var ikki fyrr enn at Eli Hentze, U21- landsliðsvenjari, ringdi, at Jóannes Kalsø Danielsen á fyrsta sinni royndi at spæla í føroysku landsliðstroyggjuni. -Fyrstu ferð eg fekk U-landsliðsboð var, tá Eli Hentze úttók meg til U21-landsliðið fyri tveimum árum síðani. Síðani tá havi eg verið úttikin til U21- landsliðið hvørja ferð. Nú eri eg á A-landsliðnum, so tað er ikki ein lang landsliðssøga, sigur høgri bakkurin, sum heldur at tað er Jóannes K. Danielsen á landsliðið: Jóannes K. Danielsen fekk fyrstu ferð landsliðsboð til U21- landsliðið. - Tað er ein áminning til teir ungu spælararnar, sum ikki koma á landsliðini tá teir eru 15 til 18 ár, um at blíva við. Tað er ikki avgerandi um tú ert á landsliðnum tá, fyri at koma á A-landsliðið seinni, sigur klaksvíkingurin EITT PRÓGV UM AT TÚ SKAL IKKI GEVA UPP