hósdagur 5. mars 2020síða 42

18 FÓTBÓLTUR 2020 FÓTBÓLTSBLAÐIÐ HJÁ MIÐLAHÚSINUM JENS BERTHEL ASKOU VIL KOLLVELTA FØROYSKAN FÓTBÓLT – Eg vil gjarna skapa eitt lið, sum fer til dystir við størri intensiteti, góðsku og leikferð enn vit nakrantíð áður hava sæð í Føroyum, sigur nýggi danski HB-venjarin, Jens Berthel Askou PÆTUR ALBINUS 37 ára gamli Jens Berthel Askou hevur verið víða um sum leikari, eitt nú í turkiska Kasimpasa og enska Norwich, og eftir leiklutir sum leikandi hjálparvenjari í Skive og Thisted, slapp hann í 2018 og 2019 at royna seg sum høvuðsvenjari hjá Vendsyssel FF. Har gekk tað væl í eina tíð, men tað endaði í skilnaði. Jens Berthel er av nøkrum mettur at vera eitt av stóru venjaratalentunum í Dan­mark, men nú eitt tilboð lá á borðinum frá HB, valdi hann heldur at koma til Føroya. – Eg haldi at ein øðrvísi avbjóðing sum hendan í HB verður við til at menna meg meira, enn eg í løtuni havi møguleika fyri í Danmark, sigur Jens Berthel. – Eg møtti einum felagi, sum var sinnað at lurta eftir mínum íblástri, og sum hevur nøkur fantastisk fólk, ið geva nógv av sær sjálvum til felagið. Tey eru samstundis eisini eru sinnað at bjóða tí traditionellu tankagongdini av, sigur Jens Berthel víðari. – So hendan blandingin av at blíva bjóðaður av, men eisini sjálvur sleppa at bjóða av, lokkaði meg almikið, tekur hann samanum. Jens Berthel er varin, tá ið vit tosa um, hvat fyri slag av venjara hann er. – Mær dámar ikki at verða settur í bás og mettur at vera ein ávís týpa. Eg haldi, at eg rúmi nógv ting, og at eg eri førur fyri at blanda við amboðunum, bæði tá tað kemur til taktikk og leiðslu. Venjarar, sum verða mettir at vera ein ávís týpa, enda oftast í einari einfaldari mynd av at teir einans duga nøkur fá ting, heldur Jens Berthel. VIRÐINI Nú kappingarbyrjanin er fyri durðum kennir Jens Berthel Askou seg tilreiðar at fara undir kappingarárið við HB, men tað hevur tikið eina løtu at koma hagar. – Frammanundan kendi eg eitt sindur til felagið, ógvuliga lítið til liðið og stórt sæð einki til deildina, so eg havi brúkt fyrstu mánaðirnar her til at síggja nógv sjónbond frá undanfarnum kappingarárum, sigur hann. – Eg havi eisini tosað við fólk, sum hava góðan kunnleika til felagið og deildina, fyri at fáa eitt skjótt innlit í, hvar vit standa. Ikki tí, eg visti longu, tá ið eg byrjaði í desember, hvar vit høvdu okkara styrkir, og hvar vit skuldu betra okkum, leggur hann afturat. Hvat hava tit lagt serligan dent á mánaðirnar upp til kappingarbyrjan? – Fyrst og fremst hevur tað snúð seg um at fáa sett inn tey virðini og vanarnar, sum vit vilja hava bæði á og uttanfyri vøllin. Tað hava vit hugsavnað okkum heilt nógv um við eitt nú at hava fundir og at leggja til rættis okkara atburð í tí dagliga, sigur nýggi danski HB-venjarin. – Annars hava vit havt stórt fokus á at fáa tann intensitetin og tað ágrýtnið í dagligu venjingina, sum vit ynskja at hava. Harnæst hava vit sjálvandi eisini stigvíst arbeitt við teimum ymisku taktisku tingunum, sum vit skulu meistra bæði við og uttan bólt, sigur Jens Berthel. KOLLVELTING Málið hjá nýggja HB-venjaranum er einfalt. – Vit skulu vinna hvønn einasta dyst, sigur hann. – Tað havi eg sum mál, óansæð hvussu trupult tað sær út, sigur Jens Berthel og leggur afturat, at hetta altíð fer at vera málið í einum sigursvandum felagi sum HB. – Men eg vil gjarna undirstrika, at vit fara til allar dystirnar við virðing fyri mótstøðuliðnum, sigur hann. Jens Berthel ætlar sær eisini at seta síni fingramerki á føroyskan fótbólt. – Eg vil gjarna skapa eitt lið, sum fer til dystir við størri intensiteti, góðsku og leikferð, enn vit nakrantíð áður hava sæð í Føroyum. Eg vil gjarna leggja ein nýggjan standard fyri, hvussu vit spæla fótbólt í Føroyum, sigur hann. – Hetta skal eisini gerast soleiðis, at vit, og eisini tá ið eg ikki longur eri her, hava sett eitt merki í føroyskan fótbólt, sum eisini fer at endurspeglast á føroyska landsliðnum. Eg meti, at vit hava nakrar leikarar, sum hava møguleika fyri at vera fastir menn á landsliðnum næstu 10-15 árini, sigur hann. Um kappingina í ár sigur Jens Berthel Askou seg vænta, at KÍ er eitt vet frammanfyri hini liðini, og at B36, NSÍ og Víkingur eisini fara at vera við í toppinum. LYKLASPÆLARIN Adrian Justinussen Við sínum framúrskarandi sparkiteknikki er hann ein støðug hóttan úr nærum øllum vinklum og fjarstøðum. Hann lyftir ábyrgdina væl og tykist bara at blíva við at sparka stig heim til HB, har hann nærmast kann fáa 1+1 at geva 3. GJØGNUMBROTIÐ Samuel Chukwudi 16 ára gamli kropssterki miðvallarin fekk spælitíð tríggjar teir síðstu dystirnar í fjør, og við einum nýggjum sáttmála í hondini er hann til reiðar at leggja afturat. Eitt fet í senn, men kanska hann longu í ár fær eitt slag av gjøgnumbroti? VENJARIN Jens Berthel Askou Ein spennandi venjari við einari spennandi ætlan. Hann hevur sett sær stór mál um at vinna hvønn einasta dyst, og eisini hevur hann mál um at kollvelta føroyskan fótbólt eitt nú við sera høgum intensiteti. Tað ljóðar intenst! MÁLIÐ FM HB fjalir ikki út yvir, at felagið spælir fyri at vinna. HB vann meistaraheitið fyri tveimum árum, og í fjør vann felagið steypakappinginia. Stóra málið er og verður at vinna FM heitið. HB er eitt sigursvant felag, og tað liggur ikki til fólkið har at spæla leiklutin sum favorittur til nakran annan. Hóast KÍ millum fólk er farið avstað við bæði FM- og favoritt-leikluti, so siktar HB neyvan lægri enn eftir gullinum. Vit skulu vinna hvønn einasta dyst