hósdagur 3. desember 2020síða 40

16 Effo STONGDU STØÐIRNAR Í EITT TÍÐARSKEÐ Tá ið korona av álvara gjørdi vart við seg í Føroyum, valdu bæði oljufeløgini, Effo og Magn, í eitt skifti at lata handlarnar á bensinstøðunum aftur. Hetta fyrst og fremst fyri at minka smittuvandan. -Tað gjørdi sjálvandi, at vit mistu eitt sindur av umsetninginum tá, men eg haldi at vit hava vunnið tað innaftur, sigur Janus Thomnsen, stjóri í Effo. Hann sigur, at sjálvt um samfelagið er hótt eitt sindur av korona, so skulu fólk hava olju fyri at halda húsini heit, bilarnir skulu hava olju og bensin og skipini skulu hava olju. -Vit eru eisini sloppin undan sjálvari smittuni millum starvsfólkini – onkur hendinga hevur verið í sóttarhaldi, men eg veit ikki um nakran, sum er smittaður, sigur Janus Thomsen. Meira enn 200 fólk arbeiða hjá Effo, so tá ið hugsað verður um, hvussu mong hóast alt hava havt smittuna, so er væl sloppið. -Ja, tíbetur hava vit verið ógvuliga heppin í so máta, sigur Janus Thomsen. Hann leggur afturat, at úrslitið í ár helst fer at líkjast úrslitinum, sum fyritøkan kom út við í 2019 – og tað var eitt gott ár. Norðoya Sparikassi BROYTTAR MANNAGONGDIR Peningastovnarnir hava kritiskar funksjónir í samfelagnum, sum skulu virka hvønn einasta dag. Tí var tað avgerandi, tá ið koronafarsóttin kom til Føroyar, at peningastovnarnir tryggjaðu sær, at teir kundu røkja funksjónirnar, sjálvt um onkur var raktur av korona. -Hetta var okkara ábyrgd. Tí stongdur vit avgreiðsluna tær fyrstu vikurnar, men lótu so eitt sindur uppaftur, sigur Marner Mortensen, stjóri í Norðoya Sparikassa. Hann sigur tó, at tað framvegis ber til at koma í bankan, men tað krevst bara at hetta verður gjørt eftir avtalu. Annars mæltu peningastovnarnir til, at øll viðurskifti vóru avgreidd talgylt ella umvegis telefonina. -Tíbetur eru vit ikki rakt av smittuni í Sparikassanum. Vit hava verið varin og tað hava kundarnir eisini verið, sigur stjórin. Ein annar partur, sum eisini rakar peningastovnar er, hvussu kundar teirra verða ávirkaðir av smittuni. -Hetta er enn rættuliga ókent, men vit vita at ferðavinnan og matstovuvinnan er ógvuliga hart rakt. Hetta rakar ikki okkum so hart, men vit mugu fylgja við hvat hendir og meta um váðan alla tíðin. Tað ger fíggjareftirlitið eisini, leggur stjórin afturat. SOLEIÐIS GEKK 2020 SOLEIÐIS GEKK 2020