fríggjadagur 7. apríl 2006síða 31

Lýs teg sjálvan við trimum orðum: Arbeiðssom, jalig og eitt sindur tvør Hvat orð ella hvønn setning nýtir tú oftast? Fínasta slag! Hvørjum hyggur tú at hjá hinum kyninum? Eg hyggi eftir heildini og persónligheitini Hvussu langa tíð nýtir tú at gera teg kláran um morgunin? Umeið ein hálvan tíma Hvat stressar teg? Tað, sum stressar meg ómetaliga nógv fyri tíðina, er høgrarákið í føroyskum politikki, og tað at ein flokkur sum fólkaflokkurin fær so lætt spæl. Hvar eru allar tær røddirnar, sum vilja eitt annað samfelag, enn tað, ið bara letur tann ráða kaptalin stýra???? Hvat gleðir teg? Eg eri næstan altíð glað, tí kann eg illa seta orð á, hvat tað er sum gleðir meg. Eg gleðist væl um lívið og alt, ið tað inniber av undran, kenslum, upplivingum, fólki osfr. Nær feldi tú seinast eitt tár? Tað gjørdi eg, tá eg fyri nøkrum døgum síðani fyri aðruferð hugdi at filminum hjá Clint Eastwood Milliondollar-baby. Tann filmurin nemur á ein heilt serliga hátt við tað at vera menniskja og ávirkaði meg rættuliga sterkt. Nær smakkaði tú tær seinast á? Fyri 14 døgum síðani tá eg var í Kagganum við nøkrum vinkonum og lurtaði eftir tónleiki. Hvat var seinasta ynski, sum tú fekst uppfylt? Tað var, tá ein av mínum næstringum fekk góðar og virðiligar umstøður. Hvar arbeiðir tú? Eg arbeiði hálva tíð hjá felagnum Javna og hálva tíð sum samskipari av Asfalt. Deiliga ymiskar uppgávur við ymiskum avbjóðingum. Hvørji ráð hevur tú til fólk, sum ætla sær at starvast á mentanarpalllinum? Ja, hvat skal eg siga annað enn, at hevur tú eitt brennandi ynski um at skapa og fyriskipa tiltøk á føroyska mentanarpallinum, so skalt tú bara gera tað. Men tú skalt eisini gera tær greitt, at tað er hart arbeiði og at uppgávurnar fevna heilt frá fíggjarstýring til at vaska gólv, so ver fleksibul. Hvat er besta uppfinningin og hví? Treo-brúsitablettir. Tær hava bjarga mongum degi Hvat hevur tú í lummunum beint nú? Fartelefon og fetteljara Hvat er títt besta heimaráð? Ver tann, tú ert, í øllum tí tú gert. Einfalt, men ótrúliga umráðandi. Hvør er stuttligast í Føroyum og hví? Tær stuttligastu í Føroyum eru í míni verð systir mín Heidi og vinkonan hjá henni Ann Britt, tá tær eru í essinum. Tær hava ein deiliga ráðan suðuroyar humor, har tingini uttan stórvegis hóvasták kunnu gerast rættuliga absurd og hylandi stuttlig Hvør er keðiligast í Føroyum og hví? Ongin er beinleiðis keðiligur, øll eru bara ikki líka sprøklut. Hvussu ofta speglar tú tær? Tá eg komi framvið einum spegli Hvussu ofta ert tú hjá frisør? Eg eri hjá frisør umleið 6 hvørja viku Hvør er tín stuttligasta uppliving innan arbeiðið við at fyrireika tónleikatiltøk? Tað hava verið nógvar stuttligar og absurdar hendingar í fyrireikingini av G! Festivalinum. Serliga tímarnar beint áðrenn festivalurin byrjar hava verið ómenniskjansliga kaotiskir og tá henda nógv løgin ting. Men tað mest løgna, serstaka og allarhelst eisini nakað av stuttligasta eg havi upplivað er indarin Murari sum var á G! 2003. Hansara verumáti og ikki minst framførsla við guddommuligum dansi, gjørdu hann til ein rættuligan kult-figur millum fyrireikarnar. Tey sum upplivdu hann á G! 2003, skilja uttan iva hví hann fekk hesa serstøðu. Annlis Bjarkhamar, 32 ár, dagligur leiðari hjá Javna og samskipari av Asfalt »Treo-brústablettir eru besta uppfinnin« Nr. 60 - 24. mars 2006 31