hósdagur 17. august 2006síða 40

6 Nr. 157 - 17. august 2006 tíðindi - Tíðin er farin frá smáum bakaríum. Kappingin er ov hørð, sigur Regin Nielsen, sum saman við Sveini Thomasen hevur keypt Bakaríið hjá Gunnleivi frá Norðoya Sparikassa. Nú verður leitað eftir nýggjum bygningi til bakstur. Bakaríið broytir eisini navn. EIGARSKIFTI Finnur Jensen finnur@sosialurin.fo Bakaríið hjá Gunnleivi við Hoyvíksvegin í Havn hevur skift eigara fyri aðru ferð innan ein mánað. Nýggju eigararnir eru 36 ára gamli Regin Nielsen úr Vestmanna og 34 ára gamli Sveinur Thomasen úr Miðvági. Teir eru báðir bakarameistarar og hava átt hvør sítt bakarí í ávikavist Vestmanna og Miðvági. Nú hava teir so keypt størsta bakaríið í landinum, og sum skilst eru broytingar á veg – bæði í bygnaðinum og bakstrinum. - Vit fara at rationalisera. Tað verða vit noyddir til. Ætlanin er eisini at finna ein nýggjan bygning til bakaríið, sum fer at liggja í meginøkinum. Harumframt verða nakrar broytingar í bakstrinum. Rugbreyðs­ uppskriftin verður í øllum førum broytt, sigur Regin Nielsen. Færri bakarí Sambært bakara­meist­ aranum úr Vestmanna vóru fleiri um boði at keypa bakaríið. Í seinasta enda fall valið á Regin Nielsen, sum slóg seg saman við Svein Thomasen. - Eg havi altíð havt ein dreym um at reka eitt nútíðar rationelt stórt ídnaðarbakarí. Dreymurin er nú vorðin veruleiki, og vit ivast onga løtu í, at hetta fer at bera seg, sigur Regin Nielsen, ið samstundis yvirtekur maskinurnar hjá Frants Restorff, ið fylgdi við í keypinum. Føroysku bakaríini eru fækkað nógv seinastu árini. Fyri trimum árum síðani vóru tey 17. Nú eru 10 eftir. - Tíðin er farin frá smáum bakaríum. Kappingin er ov hørð, sigur Regin Nielsen, sum eins og Sveinur Thomasen sjálvur hevur átt eitt bakarí, men gav skarvin yvir og seldi til júst Bakaríið hjá Gunnleiv fyrr í summar, tá hann fekk starv har. Satsa uppá meginøkið Bakaríið hjá Gunnleivi skiftir nú navn. Tað eitur Grón, ið merkir matur gjørdur av mjøli ella korni. Sambært nýggja eigar­ anum er ætlanin fyrst og fremst at halda fram sum førandi bakarí á meginøkinum. Fyribils er ikki ætlanin at kappast á øðrum økjum, sosum í Suðuroy og í Klaksvík. 74 fólk starvast á bakarínum, harav umleið 30 eru knýtt at sjálvum bakstrinum. Hini arbeiða í handlinum, í pakkingini ella í útkoyringini. Norðoya Sparikassi yvirtøk annars baksturvirksemið við Hoyvíksvegin fyrst í mánaðinum, tá hann keypti Partafelagið Vørður frá Justinussen-monnunum. Umframt Bakaríið hjá Gunnleivi vóru Handilin hjá Eli, Statoilstøðin á Argjum og Handilin hjá Pidda á Toftum við í keypinum. Sparikassin var einans áhugaður í sjálvum bygninginum, har Gunnleiv helt til, og hevur tí gjørt skjótt av við at selja burturav. Og nú er einans bygningurin við Hoyvíksvegin eftir. Bakaríið hjá Gunnleivi skift eigara og navn Bakaríið hjá Gunnleivi er selt og skiftir nú navn. Tað eitur Grón. Nýggju eigararnir eru bakarameistararnir Sveinur Thomasen (t.v.) og Regin Nielsen (t. h.) Mynd: Álvur Haraldsen Tað verður ein fín cocktail-barr niðriundir og brasserie við alskyns matsløgum uppiá, tá matstovan í Hotel Tórshavn letur upp í heyst. Ætlanin er eisini at skeinkja í túninum uttanfyri UMVÆLING Finnur Jensen finnur@sosialurin.fo Gamla Sjómansheimið í Vágsbotni verður eftir øllum at døma ikki til at kenna aftur, tá tað letur uppaftur 1. oktober. Tvær tær niðastu hæddirnar verða umvældar, og tað er eitt veruligt hamskifti, sum fer fram í hesum døgum. Sjálvt hotellið verður óbroytt – burtursæð frá móttøkuni, ið næstan er liðug umvæld - men matstovan uppiá og virksemið niðriundir broytir heitið til »Hvonn Brasserie«. Á niðastu hædd, har Pitsakaféin helt til, verður nú ein cocktail-barr. Við endanum av barrdiskinum verður ein DJ-pultur, sum fer at spæla ymiskan tónleik fyri gestirnar. Hotellið hevur keypt dýra ljóðútgerð til endamálið. Ætlanin er at hava ymisk temakvøld við til dømis djasstónleiki, har tann, ið vendir plátur, hevur ein virknan leiklut og tosar við gestirnar um tónleikin. Hetta er eitt nýtt konsept í Føroyum, sum annars er sera væl umtókt aðrastaðni. Pláss verður fyri 100 fólkum í cocktailbarrini. Skeinkja uttanfyri Hotel Tórshavn hevur gjørt eitt tún móti gongugøtuni, so fólk kunnu sita uttanfyri og fáa sær ein bita ella ein kaffimunn. Kanska eisini ein brunch. Men møguliga fer eisini at bera til at njóta eina øl ella okkurt sterkari afturvið matinum einaferð í framtíðini. Sum er, ber hetta ikki til, men sambært Johannes Jensen, stjóra, arbeiðir Vinnumálaráðið við eini kunngerð, sum fer at loyva skeinking uttanfyri. Sum skilst verður kunngerðin sett í gildi í heyst. Eini 40 sitipláss verða í túninum uttanfyri Hvonn Brasserie. Á aðru hædd verða eisini stórar broytingar. Fundarhølini eru umvæld og nútíðargjørd, og matstovan verður fjølbroyttari snoti­ ligari. Umframt vanliga døgurðan, sum er vorðið eitt eyðkenni hjá gamla Sjómansheiminum, verða pitsur, fajitas, pasta, búffar, indiskur matur og nógv annað á matskránni. Sum nakað nýtt verða væl umtóktu Häagen-Dazs ísarnir eisini at fáa. Pláss verður fyri 100 gestum í matstovuni uppiá. Og so var tað gamli elevatorin, sum hevur fingið nýggjan motor. Gamla Sjómansheimið skiftir ham Stjórin í Hotel Tórshavn, Johannes Jensen, er spentur til í heyst, tá gamla Sjómansheimið er liðugt umvælt. Umframt ein spildurnýggj matstova uppiá, verður ein cocktailbarr niðriundir. Í túninum uttanfyri kunnu gestirnir bæði eta og drekka Mynd: Alvin Andersen