fríggjadagur 2. januar 2009síða 18

18 Nr. 1 - 2. januar 2009 Gott kvøld øll somul!   Lívskorini í Føroyum eru, nú  sum áður, knýtt at náttúruni.  Náttúran er vøkur og vágin; kát  og kørg; rík og ræðandi.  Í hesum náttúrudepli hava vit  føroyingar lært at lívbjarga  okkum og vinna okkum til  lívsins uppihald. Í meira enn  1000 ár hava vit tillagað okkum  til fyritreytir og umstøður, vit  ikki eru harrar yvir. Á okkara fjarskotnu klettum  hava vit bygt eitt framkomið  vitanar- og vælferðarsamfelag.  Og hóast vit hava verið fyri  bakkøstum gjøgnum tíðirnar,  hava vit altíð fótað okkum aftur.  Ikki minst í 90unum, tá vit eftir  bert fimm árum vendu einum  samfelagi á húsagangi til eitt ríkt  land við sunnum búskapi. Í dag valdar fíggjarkreppa í  øllum heiminum. Lond hava lagt  seg eftir at fullnýta møguleikar- nar í alheimsgerðini, men hava  ikki varnast veika partin av  hesum ráki. Tráanin eftir skjótum  vinningi hevur skúgvað skynsemi  til viks. Fíggjarligar eftirlitsskip- anir tvørtur um landamørk hava  ikki staðið mát við økta altjóða  virksemið á fíggjarøkinum. Vit merkja eisini rembingarnar  í Føroyum við skerdum láni- møguleikum, uppsøgnum og  gjaldsteðgi. Jú, hvøkkur er eisini farin  gjøgnum okkara samfelag. Men  vit mugu ikki lata fjálturin fáa  ræði á okkum. Nú, sum altíð,  tørvar okkum vit og skil. Føroyar eru væl fyri at taka  ímóti hesum avbjóðingum.  Almenna skuldin er lítil, og  landið hevur tøkan pening. Og  fram um alt eiga vit eitt ómeta- liga dýrabart tilfeingi. Eitt  náttúruríkidømi og eitt dugnaligt  fólk. Hetta er tilfeingið, vit  bygdu okkara land úr. Tilfeingi  sum vit og okkara børn skulu  byggja okkara framtíð á. Hetta  eru virðir sum ikki eru knýtt at  heimsmarknaði og kursi. Virðir  sum ikki hvørva, um so virðis- brøv falla.  Jú, Føroyar eru tilbúnar til  nýggjar avbjóðingar.   ***   Landsstýrið hevur lagt ætlan  fyri, hvussu Føroyar sleppa  gjøgnum fíggjar- og búskapar- kreppuna so snikkaleyst sum  gjørligt. Tiltøk eru sett í verk, og  onnur átøk liggja fyri framman. Føroysku peningastovnarnir  eru vorðnir partur í felags trygd- arskipanini fyri peningastovnar í  ríkisfelagsskapinum. Málið er, at  peningastovnarnir eisini fáa  møguleika at gerast partur av  næsta bankapakkanum, har  umhugsað verður at seta 100  milliardir í fíggjarkervið, fyri at  fáa gongd aftur á búskapin. Fyri at byrgja upp fyri ov  stórum búskaparligum sveiggi  hevur samgongan á fíggjarlógini  valt at økja um íløgurnar kring  landið, samstundis sum hon  hevur tálmað vøksturin í rakstrar- útreiðslunum hjá landinum.  Hetta kunnu vit gera, tí landið er  ført fyri at fíggja hall í nøkur ár. Støðulýsing verður gjørd av  ymsu geirunum í vinnuni.  Endamálið er at fáa heildarmynd  av framtíðarútlitunum, og hvørji  átøk kunnu gerast neyðug fyri at  trygga støðugar vinnukarmar. Fyritøkur uppliva, at tað er  trupult at fáa fíggjarliga trygd  fyri vørum og tænastum, ið skulu  útflytast. Arbeitt verður tí við at  fáa føroyskum fyritøkum møgu- leika at brúka skipanir hjá  danska Eksport Kredit Fonden. Harumframt standa milliardir í  grunnum, sum landið varðar av.  Málið er at nýta part av hesum  peningi til menning og gransking  fyri harvið at skapa búskapar- ligan vøkstur. Endamálið við búskaparátøk- unum er at tryggja vælferðina í  landinum. Tað krevur skynsemi. Vit skulu  venda hvørjari krónu og gera  neyðugar tillagingar, ið ikki  avlaga okkara vælferðartænastur. At lækka vælferðina er ikki ein  kostur í at velja. Størsti missurin  er, um fólk noyðist at flyta av  landinum. Tí er neyðugt at fáa  fólkið at støðast, eisini um tey  gerast arbeiðsleys. ALS-útgjaldið  verður tí hækkað úr 70 prosent- um uppí 80, og møguleikarnir at  umskúla seg til aðrar vinnur  mugu betrast. Landsstýrið fer eisini at broyta  bygnaðir í samfelagnum fyri at  taka ímóti framtíðar avbjóðing- um. Hetta eru m.a. broytingar á  kommunuøkinum, eftirlønar- viðurskiftum, á íbúðarøkinum og  ikki minst í fiskivinnuni.    ***   Havøki okkara er 200 ferðir  landøki og ein ótømandi kovi,  røkja vit hann rætt. Fáir heims- borgarar eru vælsignaðir við so  virðismiklum matvørutilfeingi,  sum vit. Men tilfeingið er avmarkað.  Og tilverugrundarlagið er tí  treytað av, at vit duga at røkja  tað, so at nýtslan verður burðar- dygg. Burðardygg veiða gevur  betri prís og marknaðaratgongd  og tryggjar okkara eftirkomarum  lut í hesum dýrgripi. Vit mugu eisini skapa virðis- øking við at gagnnýta allan fisk- in, sum kemur uppá dekkið. Ikki  bara flakið, men eisini alt tað  góða tilfeingi, sum er í eitt nú  livrini, rogninum og skræðuni. Í  einum heimi, har matvørutrot er  ein vaksandi hóttan, er tað  okkara skylda at gagnnýta  tilfeingið fult út. Hetta krevur umskifti - størri  og smærri tillagingar.   ***   Eitt umskifti elvdi í summar til  tvídrátt, nevniliga viðgerðin og  áseting av fiskidøgum. Mong  vilja gera hetta til eitt stríð mill- um fiskifrøðingar og fiskimenn,  útjaðara og miðstaðarøkið,  akademikarar og verkafólk. Hetta ber ikki framá. Tí split  byggir ikki land.   Fiskivinnan er okkara høvuðs- vinna, og tilfeingið ogn Føroya  fólks. Tí eru kjak og viðgerð  alneyðug, skulu vit tryggja  burðardygga veiðu og javnvág  millum ágóða hjá loyvishavara  og Føroya fólki. Í hesi tilgongd  má samspæl vera millum allar  áhugapartar - roynd sum lærd. Tey, hvørs livibreyð er knýtt at  fiskivinnuni, skulu sjálvandi  verða tikin uppá ráð. Lata vit  hinvegin manglandi virðing fyri  útbúgving og vísind ráða, styggja  vit fólk frá okkum. Hvørt ár fara hundraðtals ung  út í heim at leita sær royndir og  útbúgving. Vit hava eisini tørv á  teimum, tá ið vit byggja land.   ***   Í dag er tað alheimsgerðin, ið  ásetir fortreytirnar. Heimurin er vorðin eitt sølu- torg, har allar vørur, fyritøkur og  lond kunnu gera seg galdandi -  stór sum smá. Í hesi kapping er  umdømi og samleiki týdningar- mikið. Tí mugu vit gagnnýta okk- ara kappingarsamleika – tað, sum  ger Føroyar serstakar. Vit skulu  gerast tilvitað um okkara sterku  síður og skapa nýtt burturúr, sum  vit kunnu bjóða heiminum. Napoleon Bonaparte skal hava  sagt: Tað er ikki tann við størsta  herinum, ið sigrar. Men tann, ið  fær øll síni fólk at marsjera somu  leið. Føroyar hvørki skulu ella  kunnu leggja heimin undir seg.  Men um politiska skipanin,  fyrisiting, mentanarlív, vinna og  borgarar draga eina línu, vinna  vit langt á leið.   ***   Í heimssamfelagnum eru ikki  bara okkara vørur, tænastur og  fyritøkur í kapping. Føroyar eru  eisini í kapping við umheimin  um sínar egnu borgarar. Vit skulu  hava eitt samfelag, har fólkið  støðast og eitt samfelag, sum  dregur dugnaligt fólk til sín. Tí  má tolsemi ráða, og tað persón- liga frælsi vera í hásæti. Eg ynski inniliga, at øll - eisini  okkara útisetar og útlendingar,  sum hava búsett seg her, skulu  føla seg væl í Føroyum. Mítt  ynski er, at øll taka samleikan til  sín og eru stolt av at kenna seg  sum føroying. Okkara samleiki  skal fevna um øll uttan mun til  politiska sannføring, átrúna,  húðalit og kynslív. Lat okkum standa saman,  stuðla hvør øðrum og gleðast um  okkara ymiskleika.   ***   Árið 2008 var tíverri ikki  friðarár. Ófriður og sorgarleikir  vóru í nógvum afrikanskum  londum, umframt at kríggið í eitt  nú Afganistan heldur fram. Í  november vóru vit øll vitnir til  yvirgangin í Mumbai, tá ið vápn- aðir menn myrdu frá hond. Og  nú um jóladagarnar er stríðið  millum ísraelar og palestinar  kyknað uppaftur í Gasa. Hund- raðtals menniskju, eisini sivil  liggja eftir á. Heimssamfelagið  má strongja á fyri at fáa partar- nar til samráðingarborðið. Um  2009 skal bera frið við sær liggur  ein stór ábyrgd á heimsins  leiðarum. Amerikanska forsetavalið ber  boð um, at heimurin er í broyt- ing. USA fær fyri fyrstu ferð ein  littan forseta. Visjónirnar hjá  Barack Obama hava vakt virðing  kring allan heim og íbirt vón um  grundleggjandi broytingar. Hann  hevur megnað at vekja eina trúgv  á fólkaræði og eggja til saman- hald fyri at skapa eina betri fram- tíð. Og hann hevur givið nýggja  vón um, at tað fer at bera heim- sins londum til at seta felags kós  á veðurlagsøkinum. Ein avbjóð- ing, ið verður spádd at vera tann  størsta í 21. øld. Okkara partur skal ikki liggja  eftir. Við virkisætlanini um at  minka útlát av veðurlagsgassum,  hevur landsstýrið sett skjøtul á  eina týdningarmikla tilgongd. Vit  kunnu sjálvsagt ikki basa veður- lagsbroytingunum einsamøll,  men vit skulu taka medábyrgd og  vinna Føroyum umdømi, sum  land, ið verjir náttúruna.   ***   Góðu Føroyingar Skulu vit fram á leið og skapa  nýtt, mugu vit trúgva á egin evni  og megi. Vit skulu viðurkenna, at vit  duga, tí tað gera vit. Føroysk  listafólk, granskarar og ítróttar- fólk hava skapt úrslit og vunnið  viðurkenning kring heimin. Hesi  úrslit vóru ikki nádd uttan trúgv,  dugnaskap og áræði. Fyri mongum árum síðani stóð  ein ungur maður í bønum oman  fyri bygdina og málaði. Fólk  spurdu hann, nær hann ætlaði  sær til arbeiðis. Ungi maðurin  var Sámal Joensen – seinni betur  kendur sum Mikines. Í dag er  ongin í iva um, at hann var ein  virðisøkjari og ein nýskapari av  teimum heilt stóru.   ***   Nú árið stundar móti enda ,  kunnu vit gleða okkum um at  njóta hesa løtu saman við familju  og vinfólkum. Eina tílíka løtu leita mínir tank- ar til tykkara, sum eru á sjónum  ella burtur í øðrum londum. Mínir tankar eru eisini hjá  tykkum, sum bera sorg og sakn.  Tit, sum hava verið fyri van- lagnu. Eg veit, hvat tað er at  missa so brádliga. Slíkar royndir,  hóast harðar, so eru tær dýra- bærar. Má nýggja árið bera  tykkum troyst og vón. Tá lagnan er hørð, er tað tann  persónligi stuðulin, sum best ber  okkum gjøgnum svárar og  truplar tíðir. Álit, trúgv og samanhald er  altavgerandi fyri fólk og fyri  samfelag. Tað er berandi megin,  sum ger lív laga her á landi.   Gott nýggjár og Guðs signing øll  somul. Kaj Leo Johannesen, løgmaður Nýggjársrøða løgmans 2008