mikudagur 1. februar 2012síða 18

Mikudagur 1. februar 2012 · Nr. 14 18 Sosialurin Hugskot og viðmerkingar – send sms til 225000 Herligt at vera Í hesum døgum hevur 9. flokkur í Skúlanum við Løgmannabreyt verið í starvsvenjing. Í flokkinum eru 50 næmingar, og tað er so ymiskt hvar øll eru farin. Vit hava verið og vitjað sjey av teimum, ið eru í starvsvenjing runt í Havnini, og spurt, hvussu tey hava upplivað teirra starvsvenjing. Landssjúkrahúsið – Guðrun Gullfoss & Andrea Rajani Hansen Hvussu dámar tykkum at vera her? - Okkum dámar tað sera væl, tí vit gera altíð okkurt, tá vit eru her. Og tað er sera spennandi at síggja, hvussu ymiskt alt er her á sjúkrahúsinum. Hvat hava tit gjørt? - Vit hava gjørt sera nógv ymiskt, til dømis hava vit kannað okkara egnu blóðtýpu, verið hjá portørunum, á føðideildini, á barnadeildini og eitt nú verið til eitt trygdarskeið hjá Ferðslutrygd. Hvat hava tit lært? - Lært sera nógv; til dømis, hava vit lært um reinføri hjá teimum ið skurðviðgera, og royndu at lata okkum í eina drakt, ið tey plaga at nýta. Kundi tað verið tykkara framtíðarstarv? - Ja, okkurt her á sjúkrahúsinum kundi væl verið okkara framtíðarstarv, kanska á rannsóknarstovuni (Blóðbankin). Tað var serliga spennandi. Hvat klokkan møta tit, og nær fáa tit frí? - Vit møta klokkan 09:00, onkuntíð klokkan 08:00, og fáa frí millum kl. 14 og 15. Rit&Rák ­– Sveinur Rasmussen Hvussu dámar tær at vera her? - Mær dámar tað væl, men tað er øgiliga strævið, tá vøran kemur í handilin. Hvat hevur tú gjørt? - Mánadagar flyti eg runt uppá ymsar kassar og pakki bøkur út. Hinar dagarnar er tað ymiskt. Havi til dømis koyrt útsølu-skeltir upp og tikið lampur niður og skift perurnar. Hvat hevur tú lært? - Lært, at arbeiðslívið er strævið. Kundi tað verið títt framtíðarstarv? - Nei, ikki mítt framtíðarstarv, mær dámar at lesa, og tí fór eg í starvsvenjing í Rit&Rák. Hvat klokkan møtir tú, og nær fært tú frí? - Eg møti hvønn dag kl. 10:00, og fái frí kl. 16:00 Guðrun&Guðrun – Lea Reginsdóttir Hvussu dámar tær at vera her? - Her er fínt. Fitt og blíð fólk, sum eg arbeiði saman við. Hvat hevur tú gjørt? - Eg havi talt vørur upp, lagt klæðir saman, bundið beltir og rond á troyggju, og ein av komandi døgum skal eg seyma mappur. Hvat hevur tú lært? - Eg havi lært hvussu ein mótahandil fær alt at hanga saman, eitt nú bindikonur, ið binda til Guðrun&Guðrun, og mátin at seyma teirra slag av mappum. Kundi tað verið títt framtíðarstarv? - Tað veit eg ikki ordiliga, men eg kundi kanska tonkt mær at verið sniðgevi. Men eg eri ikki vís í tí, men hetta er í øllum førum áhugavert. Hvat klokkan møtir tú, og nær fært tú frí? -Eg møti hvønn dag klokkan 11:00, og fái frí klokkan 15:00. Orð/myndir: Marianna Holm Jacobsen