fríggjadagur 22. juni 2012síða 48

nr. 71 · 22. juni 2012 8 VIKUSKIFTI Endiliga feria ...men hvat skal eg minnast til? Passið Altíð og óansæð hvar tú fert. Og minst til at tryggja tær í góðari tíð, at passið framvegis er galdandi. Kanna reglurnar í tí landinum, tú skalt til. Onkustaðni krevja tey nevniliga, at passið skal vera galdandi upp í 6 mðn eftir, at tú ert komin heim aftur. Tað tekur upp til tvær vikur at endurnýggja passið – kanna tí hetta í góðari tíð. Visum og koppsetingar Kanna í góðari tíð, hvørjar treytir eru galdandi fyri ferðafólk í tí landinum, tú ætlar tær til. Skalt tú hava visum ella verður viðmælt ferðafólki at fáa sær ávísar koppsetingar fyri at fyribyrgja álvarsomum sjúkum? Bæði kunnu taka nakað av tíð at avgreiða, og tú mást tú vera í góðari tíð. Chek-inn-tíðir Tá tað stendur í ferðaskjølunum, at check-in til dømis er ein tíma undan fráferð, so merkir tað, at tú skalt vera liðugur at cheka inn minst ein tíma undan fráferð. Ikki at tú skalt byrja at cheka inn tá. Til USA er tað av trygdaráðum tveir tímar undan fráferð. Um óhapp skuldi verið: ICE Skuldi tú komið út fyri einum óhappi, hyggja bjargingarfólkini í telefonbókina á tíni telefon, fyri at vita, hvar tey skulu ringja. Allarflestu fólk hava fartelefon uppiá sær, og bjargingarfólk fara altíð ígjøgnum telefonbókina á fartelefonini. Men tað kann vera ilt at vita, júst hvør skal kunnast um óhappið. Men ein háttur vinnur nú frama um allan heim. ICE merkir: In Case of Emergency, og bjargingafólk biðja øll um at leggja nøkur nummur hjá ymsum avvarandi fólkum inn á telefonbókina undir ICE1, ICE2, ICE3 osv. Á tann hátt fáa tey altíð fatur á tínum nærmastu skjótt og lætt – og uttan nakran kostað fyri nakran. Gev boð um hvar tú ert Lat altíð vinir og familju vita hvar tú fert – bæði hvar ferðamálið er, men eisini um tú fert á útferðir ella túrar á ferðastaðnum. Skuldi okkurt hent tær, eru tá fólk sum vita, hvar tú ert. Og skuldi okkurt hent har heima, er eisini betri, um fólk vita, hvar tey kunnu fáa fatur á tær. Pengar ella kort? Tað er ikki allastaðni, at kort verða góðtikin sum gjaldsháttur og tí er gott at veksla nakað av reiðum peningi til galdandi valuta. Minst til, at tað kostar at taka pening út í fremmandum londum í fremmandum valuta og tí er snilt at taka stórar upphæddir út hvørjaferð. Minst tó samstundis til ikki at hava allan peningin uppiá tær í senn. Tummilsreglan er, at tú ikki skalt hava meiri pening uppi á tær, enn tú hevur ráð at missa. Hav ongantíð pening og kort sama stað – til dømis í sama lumma ella í somu tasku – um tú skuldi verið fyri stuldri. Avrit av øllum pappírum Tekur tú avrit av øllum týdningarmiklum pappírum: passi, ferðaskjølum, koyrikorti, tryggingarskjølum, visum o.ø. ert tú betri fyri, um tú skuldi verið fyri stuldri. Hav eisini nummarið til at sperra gjaldskort og fartelefon við á ferðini, um tað skuldi verðið neyðugt. Sólkrem Hóast tað skuldi verið einfalt, so eru tað eru sera nógvar leysasøgur um sólkrem, sum kunnu ørkymla. Nýt altíð ein faktor, sum er minst 15. Smyr tjúkt av kremi uppá, minst ein fullan lógva til allan kroppin. Ein tummilsregla sigur, at tú skalt smyrja teg inn 2. hvønn tíma og hvørjarferð tú hevur verið og svomið. Tunn klæði verja eisini væl móti sólini og eru góð til smábørn. Børn hava serliga sarta húð og skulu smyrjast sera væl inn. Til ber at keypa sólfaktor-spray, um tey halda tað vera møðsamt við allari smyrjingini. Børn undir 6 mánaðir eiga ikki at nýta sólkrem, tí húðin tolir tað ikki – tey skulu latast í tunn klæði og sólhatt. Á strondini Far aldri at svimja, tá onnur ikki eru í nánd. Hygg væl eftir skeltum, vegleiðingum og ávarðingum – tey eru har ikki til stuttleika. Lær varliga strondina og sjógvin at kenna, far ikki langar svimjitúrar beinanvegin. Slepp aldri børnunum úr eygsjón, tá tit eru á strondini ella við svimjihylin. Hvat gera tey lokalu? Ynskir tú at sleppa burtur frá øllum hinum ferða­ fólkunum er eitt gott prei at spyrja tey lokalu, hvar tey fara, tá tey fara út. Spyr ikki á hotellunum, tí tey hava mangan avtalur við ávísar matstovur og náttklubbar, men spyr vaskikonurnar, taxasjafførarnar ella damurnar í supermarknaðinum. Spyr ikki, hvar tú skalt fara, men heldur hvar tey plaga at fara. Tá kanst tú finna sannar lokalar perlur. Kontoavritið Í nógvum londum við stórari ferðavinnu verður svikað við gjaldskortunum. Kennir tú tølini á kortinum, kanst tú nýta tað at keypa við á netinum og at gera ávísar flytingar við. Hóast tú hevur kortið hjá tær, kann tað verða nýtt av øðrum svikarum samstundis, um tað er eydnast teimum at lúra tølini av. Minst tí til at kanna kontoavritið gjølla, tá tú kemur heim, og kanna, um tað eru upphæddir og keyp, sum tú als ikki kennist við. lagt til rættis: Eydna Skaale