fríggjadagur 17. august 2012síða 25

25 Fríggjadagur 17. august 2012 · Nr. 95 Sosialurin Hugskot og viðmerkingar – send sms til 225000 Ítróttur A-landsliðið Heldur ikki hesa ferð Fótbóltur Hagtølini ímóti íslendingum siga tað mesta, men dysturin mikukvøldið var ein av teimum, har tey bæði málini á muni vóru í meira lagi – og har tað kundi gingið nógv betri, um alt bara lagaði seg nóg væl Hilmar Jan Hansen Fyri at koma til sakina beinanvegin, so var eitt tað besta við føroyska A-landsliðnum í Reykjavík miku­ kvøldið, at menn vóru ikki yvir­ impo­neraðir, men fóru í holt við upp­gávuna, sum var hon ímóti javnlíkum og ikki nakrari yvir­ makt. Tað í sjálvum sær var nokk so stuttligt, tí hetta var altso fyrstu ferð síðani teir báðar EM-undan­ kapp­ingardystirnar í 2003, at Ísland stillaði upp ímóti okkum við síni sterkastu uppstilling. Tað gekk væl hjá føroyingunum at gera vart við seg fyrstu løtuna, og burtursæð frá sera keðiliga mál­ inum eftir hálvan tíma, ið legði Ísland á odda 1-0, var fyrri hálv­ leikur slett ikki so galin. Menn tordu at bjóða av og at spæla bóltin, og ferð eftir ferð eydnast at bróta íslend­ingar av, áðrenn teir av álvara fingu bygt álopini upp. – Tað gekk fínt, og hóast teir fingu eitt keðiligt mál í fyrra hálvleiki, fingu vit spælt eitt sindur. Eg haldi, at serliga ímóti endanum á seinna hálvleiki gekk væl hjá okkum, sigur Pól Jóhannus Justinussen, sum heilt ímóti endanum bleiv sendur fram í álopið, og tá so íslendingar ta einu ferðina settu ferð á, endaði tað við 2-0, heldur enn kanska 1-1, sum føroyska vónin var tað síðsta kor­terið. Við øðrum orðum, so vunnu ís­lendingar eisini dyst nummar 24 ímóti føroyingum, eins og teir hava gjørt tað 22 ferðir áður. Eina ferð hava vit vunnið og eina ferð spælt javnt, men hóast munurin á vøllinum ikki altíð hevur verið so stórur, hevur ikki ligið so væl fyri at koppa grannunum við sjálvum úrslitinum. Fyrra málið keðiligt Sjálvandi er altíð keðiligt at fáa mál ímóti sær, og serliga tað fyrra var øgiliga keðiligt, tí tað var full­komu­ liga óneyðugt. Føroyska verjan mest­sum svav, tá Jóhann Berg Guðmundsson bleiv taklaður, so inn­leggið fór upp í loft og datt niður í før­oyska brotsteigin, har Kolbeinn Sigþórsson slapp at standa púra leys­ur og ótarnaður við einum hálv­ um sparki fekk prikað bóltin í mál. Seinna málið kom í seinasta min­uttinum, tá Pól Jóhannus ikki longur var afturi á bakkinum, men sendur longur fram at leggja trýst á. Íslendingar gjørdu skjótt av og sendu Grétar Rafn Sigurðsson av­ stað í síni høgru síðu, sum legði flatt innfyri, har Kolbeinn Sigþórsson enn eina ferð var á rætta staðnum og skoraði sítt seinna mál. – Eg vil ikki siga, at 2-0 lýsir dystin serliga væl, tí sjálvt um íslendingar kanska høvdu bóltin meira, høvdu vit eisini stórar kjansir. Tað kendist væl at spæla, tí vit royndu at halda bóltin á vøllinum og spæla hann runt, og tað var bara positivt, at vit vóru væl við. Við eitt sindur av hepni kundu vit saktans fingið ein javnleik, sigur Jóan Símun Edmundsson, ið sjálvur átti eina ta næsk­astu føroysku royndina, tá hann sendi á stongina. – Ein góður bóltur kom frá Pól Jóhannusi, og eg royndi so at takla meg fram til bóltin, men tíverri fór hann á innarsíðuna av stongini og til málmannin, í staðin fyri at fara í málið. Aðrir kjansir vóru eisini í dystinum, og avloysarin hjá Jóan Símuni, Finnur Justinussen, átti nokk tann størsta avbrennaran av øll­um, tá Jónas Þór Næs legði ein av sínum mongu góðu sendingum inn­fyri, men Finnur onkursvegna ikki fekk sett bóltin í málið. Eisini endaði eitt gott føroyskt álop við, at Bogi Løkin vann bóltin frá ís­ lendska mál­manninum, men tað bleiv ov spískt og endaði við horna­ sparki. Avrikið ikki so galið Føroyingarnir trýstu dúgliga ímóti endanum, og síðstu 15-20 min­utt­ ir­nar riggaði tað rættiliga væl, og hóast manningin á íslendska liðnum taldi stjørnur úr enskum, italskum, hollendskum og norðurlendskum fótbólti, so sást eingin munur á hesa løtuna. Roynt var heilhjartað eftir útjavnandi málinum, sam­ stundis sum samanspælið í løtum var heilt gott – og onkuntíð við nógv­um sendingum, uttan at nakar íslendingur slapp fram at bólt­inum. – Vit fóru eftir einum avriki, meira enn einum úrslit, og avrikið var eisini flott, haldi eg. Úrslitið kundi verið betri, sjálvt um tað kanska samanumtikið var í lagi, at teir vunnu, men vit høvdu einar tríggjar stórar kjansir, ið skuldu givið mál, staðfestir hjálparvenjarin, Jóannes Jakobsen, ið helt, at henda dyst­in vóru tað nógvir á føroyska lið­num, sum leveraðu vøruna. – Vit fáa heilt avgjørt brúkt henda dystin, nú vit fara at fyri­ reika okkum til dystin ímóti Týsk­ landi. Hjá okkum ræður um at halda fast við tað, sum var gott, og so at royna at betra tað, sum ikki var so gott. Vit royndu so okkara besta, men hesa ferð lukkaðist tað bara ikki ordiliga, sjálvt um vit høvdu fleiri møguleikar at koma afturí­aftur, meðan tað enn var 1-0. At vit so spentu bogan í meira lagi, so ís­lendingar revsaðu okkum við 2-0 mál­inum, gjørdist bara ikki við, tí vit royndu so. Yvir 7.000 áskoðarar vóru til dystin á Laugardalsvøllinum miku­kvøldið, men allíkavæl var tað mangan tann lítla føroyska fjøldin, ið hoyrdist best – ikki minst við góðari hjálp frá Atlantic Brass Quintet, ið setti sín dám á við góðum og løttum horntónum. So um tað kann vera nakar uggi, end­aði tað nokk við einum teprum før­oyskum sigri uttan fyri hvítu strik­ur­nar – og annars var avrikið á sjálvum vøllinum slett ikki so galið… hilmarjan@sosialurin.fo Pól Jóhannus Justinussen og Fróði Benjaminsen í hornatøkum við Bjarna Ólaf Eiríksson og Ragnar Sigurðsson um ein luftbólt í íslendska brotsteiginum í dystinum á Laugardalsvøllinum mikukvøldið Mynd: Oliver Joensen/Norðlýsið Ísland - Føroyar 2-0 (1-0) Laugardalsvøllurin, Reykjavík, mikukvøldið 15. august 2012 klokkan 20.45 1-0: Kolbeinn Sigþórsson, 30. 2-0: Kolbeinn Sigþórsson, 90. Ísland: Gunnleifur Gunnleifsson, FH – Birkir Már Sævarsson, Brann Bergen (Grétar Rafn Steinsson, uttan felag, 69.), Kári Árnason, Rotherdam, Ragnar Sigurðsson, FC København (Indriði Sigurðsson, Viking, 46.), Bjarni Ólafur Eiríksson, Stabæk (Ari Freyr Skúlason, Sundsvall IF, 69.) – Rúrik Gíslason, OB (Arnór Smárason, Esbjerg BK, 81.), Aron Einar Gunnarsson, Cardiff (Eggert Gunnþór Jónsson, Wolverhampton, 46.), Gylfi Þór Sigurðsson, Tottenham, Jóhann Berg Guðmundsson, AZ Alkmaar (Eiður Smári Guðjohnsen, uttan felag, 69.) – Birkir Bjarnason, Pescara, Kollbein SigÞórsson, Ajax Gult kort: Birkir Bjarnason Venjari: Lars Lagerbäck Føroyar: Jákup Mikkelsen, ÍF (Gunnar Nielsen, Manchester City, 46.) – Jónas Þór Næs, Valur (René S. Joensen, Brøndby IF, 71.), Rógvi Baldvinsson, Bristol Rovers, Odmar Færø, B36, Pól Jóhannus Justinussen, NSÍ – Fróði Benjaminsen, HB, Christian Lamhauge Holst, Silkeborg IF, Hallur Hansson, HB – Daniel Udsen, Helsingør (Bogi Løkin, ÍF, 80.), Jóan Símun Edmundsson, Viking Stavanger (Finnur Justinussen, Jönköping Södra, 65.), Símun Samuelsen, HB (Pætur Dam Jacobsen, EB/Streymur, 65.) Gult kort: Fróði Benjaminsen, Pætur Dam Jacobsen Venjari: Lars Olsen Dómari: Laurent Kopriwa, Luxembourg Hjálpardómarar: Antonio De Corelis & Claudio De Carolis, Luxembourg Fjórði dómari: Gunnar Jarl Jónsson, Ísland Áskoðarar: 7.256