fríggjadagur 9. november 2012síða 54

nr. 128 · 2. november 2012 6 VIKUSKIFTI TIPS FRÁ barbaru barbara@sosialurin.fo Vit kunnu keypa so vøkur og dýr klæði, sum vit vilja, vit kunnu eiga tað nýggjasta nýggja, tað vakrasta hárið, tað besta smyrslið, men uttan vælveru, er alt hetta óneyðugt. Vit mugu finna okkara innara vakurleika fram, og tað gera vit allarbest, tá ið vit kenna okkum væl. Her eru nøkur boð uppá, hvussu tú kanst fáa vælveru í gerandisdagin Vælveran er altavgerandi Halt frí Mangan gloyma vit heilt at halda frí, og njóta vikuskiftið saman við okkara kæru. Men í roynd og veru er tað sera týdningarmikið at taka nakrir dagar, har tú veruliga kemur í samband við tíni kæru, og samstundis fær samband við teg sjálva. Fyri mítt viðkomandi er tað sera gevandi at taka eitt vikuskiftið inn ímillum, og fara út at ferðast – um enn tað ikki er so langt. Í Føroyum hava vit millum annað møguleikan at fara til Gjáar, Suðuroynna, Klaksvíkina, Viðareiðis eitt vikuskiftið, og um man er til luksus, so kann Hotel Føroyar og matstovan Koks viðmælast. Ven tríggjar ferðir um vikuna Vit vita øll, at er gott at venja, men fleiri okkara koma ongantíð inn í eina fasta rytmu viðvíkjandi venjing, og tí gerast úrslitini hareftir. Men vit vita eisini, at vit kenna okkum betri um vit javnan venja eitt sindur, og harvið royna at halda vektini niðri. Fitness World í Danmark hevur gjørt eina kanning millum fleiri hundrað fólk, sum venja har javnan, og úrslitið vísur greitt, at tað er best at venja tríggjar ferðir um vikuna. Venur tú meira enn tað, so er vandi fyri at tú troyttast av venjingini, tí tað tekur ov nógva tíð. Venur tú minni, ja so er vandi fyri at tú ikki fær uppí lag at fara. Ein annar sera vælumtóktur møguleiki fyri at røra seg eitt sindur, er at venja heima. Í hesum døgum er venjingin, sum eitur Insanity, sera vælumtókt. Tú kanst ogna tær Insanity umvegis internetið, og so kanst tú venja heima hvønn dag, ella so ofta tær lystir. Tak myrkrið í álvara Í Føroyum eru vit von við myrkur, og tí hugsa vit kanska ikki so nógv um tað. Men tað er sera týdningarmikið at hugsað um teir avleiðingar, sum myrki kann geva. Um veturin fáa vit ikki nokk av D-vitaminum, og tí fylgir tunglyndi og annað ofta við. Tak javnan D-vitaminir um veturin, og keyp tær eina Bright Light lampu, sum tú kanst hyggja í hvønn dag, fyri at fáa ljós inn í eyguni. Soleiðis kunnu vit fyribyrgja tunglyndi, og ikki lata myrki ávirka okkum alt ov nógv. Ger tað tú elskar Tá ið tú arbeiðir fulla tíð, ella hevur eina ørgrynnu av uppgávum hvønn dag, so er lætt at gloyma teg sjálvan burtur í øllum rokinum. Men vit mugu eisini minnast til at forkela okkum sjálvi. Mær dámar til dømis væl at vera saman við vinkonunum hóast eg kanska ikki havi tíð. Men um tað er at liggja í baðikarinum, keypa klæðir ella bara at lurta eftir tónleiki, so minst til at gera tað innímillum. Hugsa um tað, sum tú elskar at gera, og set nakrar løtur av til tað hvørja viku! Loys spenningar í kroppinum Hóast mong ikki hugsa um tað, so er tað sera týdningarmikið at javnan fáa mýkt vøddarnar í rygginum. Serstakliga tey, sum sita við einari teldu hvønn dag, ella venja nógv, eru noydd at fáa massagu javnan, tí annars kann pínan í rygginum gerast sera ring at sleppa av við. Í mið­ býnum í Havn ber til at fáa Thai Massagu, og sum skilst eru hesar sera góðar. Haraftrat hevur Cosmetu nakrar viðgerðir fyri ryggin. Tey klóku mæla okkum til at fáa massagu einaferð um mánaðin, og soleiðis tryggja okkum, at ryggurin ikki fær álvarsaman skaða yvir longri tíð.