hósdagur 13. mars 2014síða 19

19 Fríggjadagur 14. mars 2014 · Nr. 31 Sosialurin Hugskot og viðmerkingar – send sms til 225000 Rock/Málm, Jazz, Blues og Fólk Byrta Elektro pop bólkurin Byrta hevur seinasta árið av álvara gjørt um seg. Janus Rasmussen (Bloodgroup) og Guðrið Hansdóttir manna bólkin Byrta, og hava tey bæði havt eitt virkið lív sum tónleikarar. Í 2012 hittust tey bæði í Íslandi, og síðani hava tey saman gjørt løgini hjá Byrta. Í 2013 góvu tey saman út fløguna “Byrta”. Bólkurin Byrta er tilnevndur til Ársins Nýggja bólk/Einstakling, Ársins Bólk/ Einstakling, Ársins Fløgu við fløguni “Byrta” og Ársins sang við “Loyndarmál. Allan Tausen Allan Tausen hevur í mong ár verið virkin tónleikari í Føroyum, og í 2013 gav hann út sína fyrstu fløgu undir egnum navnið, ið kallast “Unknown”. Fløgan hevur 11 løg, og hevur Allan sjálvur skrivað 8 løg á fløguni, meðan eitt lag er hansara egna tulking av lagnum “Go rest high on that mountain” hjá Vince Gill, eitt lag er ein tulking av “Call me the breeze” hjá JJ Call, og tað síðsta er ein instrumental útgáva av “Villar Víddir” hjá Kára P. Allan er tilnevndur til Ársins Nýggja Bólk/Einstakling og lag hansara “Heyah” er tilnevnt til Ársins Sang. Kári Sverrisson & Bendar Spónir Kári Sverrisson er ein føroyskur tónleikari, sangari, sangskrivari og tónasmiður. Eru vit til, spurdi Kári Sverrisson í sanginum, á Amnesty International fløguni fyri sløkum 15 árum síðani. Tað var tað fyrsta, sum føroyingar veruliga hoyrdu til sangskrivaran og sangaran Kára Sverrisson. Kári var sentralur limur í tónleikabólkinum Enekk, sum var ein tann mest nýskapandi bólkurin í føroyskari tónleikasøgu. Sum einstaklingur hevur Kári javnan framførslur við tónleiki hjá sær sjálvum og øðrum. Í 2013 gav Kári út fløguna “Nøkur fá fet aftrat”, har hann leggur lag til yrkingar hjá Jóannes Nielsen. Kári er tilnevndur til Ársins Sangara ella Einleikara. Kári og Bendar Spónir eru tilnevndir til Ársins Bólk ella Einstakling, Ársins Fløgu við “Nøkur fá fet aftrat” og Ársins Sang við “Stóra lívmóðurin”. Jón Aldará & Hamferð Jón Aldará er sangari í doom metal bólkinum Hamferð, sum síðani 2008 hevur gjørt um seg bæði í Føroyum og uttanlands. Bólkurin gav í 2010 út fyrstu fløguna “Vilst er síðsta fet”, og í 2013 kom fløgan “Evst”. Jón Aldará er tilnevndur til Ársins Sangara, bólkurin Hamferð er tilnevndur til Ársins Bólk ella Einstakling og Ársins fløgu við “Evst”. Høgni Lisberg Síðani 2003 hevur Høgni Lisberg verið virkin og viðurkendur tónleikari í Føroyum. Fyrsta fløgan “Most Beautiful Things” kom út í 2003, og síðani hevur Høgni útgivið tríggjar fløgur undir egnum navnið. Tær eru “Morning Dew” (2005), “HOGNI-hare!hare!” (2008) og “ConMan” í 2012. Høgni er tilnevndur sum Ársins Sangari ella Einleikari. Marius og Svævar Knútur Hans Marius Weihe Ziska er ein føroyskur tónleikari, sangskrivari og sangari. Hann framførir bæði sum einstaklingur og í tónleikabólkum, eitt nú í bólkinum Marius. Hansara tónleikalívsleið byrjaði, tá hann sum 16 ára gamal luttók í Prix Føroyar við Flux. Síðan hevur hann framført á konsertum og tónleikafestivalum bæði í Føroyum og í øðrum londum, eitt nú í Danmark og Týsklandi. Marius gav út fløguna “Recreation” í 2013 saman við íslendsku Svævar Knútum, og er tilnevndur til Ársins Sang við “Tokan”. Týr Bólkurin, við tí kenda víkingarokkinum, hevur havt eina drúgva karrieru innan tónleik, og hevur gjørt um seg bæði í Føroyum og uttanlands. Við 8 útgávum, har ímillum “How Far to Asgaard” (2002), “Ólavur Riddararós” (2002), “Eric the Red” (2003), “Ragnarok” (2006), “By The Light Of The Northern Star” (2009), “The Lay of Thrym” (2011), hevur Týr vunnið sær ein stóra fjepparaskara kring heimin. Í 2013 góvu teir enn eina fløgu út við heitinum “Valkyrja”. Bólkurin er tilnevndur til Ársins Bólk ella Einstakling, Ársins Fløgu við “Valkyrja”, og sangur teirra “Nation” er tilnevndur til Ársins Sang.